उद्योग वाणिज्य महासंघका उपाध्यक्ष श्रेष्ठको अस्पतालले तिरेन हिमालयन बैंक ऋण, कालोसूचीमा पर्दै

उद्योग वाणिज्य महासंघका उपाध्यक्ष श्रेष्ठको अस्पतालले तिरेन हिमालयन बैंक ऋण, कालोसूचीमा पर्दै

A+ A A-

ललितपुरको पुल्चोकस्थित निदान अस्पतालले ऋण नतिरेपछि हिमालयन बैंकले कारबाही प्रक्रिया अगाडि बढाएको छ । उद्योग वाणिज्य महासंघका वरिष्ठ उपाध्यक्ष अञ्जन श्रेष्ठको सो अस्पतालले बैंकलाई साँवा र ब्याज गरी १६ करोड ४६ लाख ७६ हजार ६९४ रुपैयाँ ३१ पैसा तिनुपर्ने बैंकले जनाएको छ ।

सो बैंकबाट ऋण लिएर सञ्चालनमा आएको निदान अस्पताल अहिले पूर्ण रुपमा बन्द छ । बैंकको ऋण लिई स्थापना गरिएको अस्पताल बन्द भएपछि बैंकले ३५ दिने म्याद दिएर सो ऋण तिर्न भन्दै ताकेता गरेको छ । यदि ३५ दिनभित्र सावाँ ब्याज नतिरे कालोसूचीमा राखी ऋण असुली प्रक्रिया अगाडि बढाउने बैंकले जनाएको छ । साथै बैंकले सो ऋण लिँदाका जमानीबाट पनि असुलउपर गरिने बैंकले बताएको छ ।

अञ्जन श्रेष्ठ सञ्चालक रहेकाे निदान हस्पिटलद्वारा कराेडौँकाे शेयर हिनामिनाः शेयरधनीलाई न शेयरको प्रमाणपत्र, न रकम फिर्ता

महासंघको विधानअनुसार वरिष्ठ उपाध्यक्ष अर्को कार्यकालमा अध्यक्ष हुने व्यवस्था छ । चन्द्र ढकालपछि अध्यक्ष हुने लाइनमा रहेका व्यवसायी वरिष्ठ उपाध्यक्ष श्रेष्ठ बैंकको कालोसूचीमा पर्ने देखिएका हुन् ।

उता अस्पतालले वर्षौंदेखि सर्वसाधारणको शेयर हिनामिना गरेको पाइएको छ । सो अस्पतालमा लगानी गरेका सर्वसाधारणको करिब १२ करोड रुपैयाँ हिनामिना भएको हो ।

लगानीकर्ताहरूले निदान अस्पतालमा २०७४ सालमा शेयरबापत लाखौँ रुपैयाँ लगानी गरेका थिए । तर, उनीहरूलाई अस्पतालले शेयर प्रमाणपत्र दिएको छैन । पीडित सर्वसाधारणले शेयर प्रमाणपत्र नदिने भए रकम फिर्ता गरिदिन सञ्चालक श्रेष्ठ परिवारलाई पटकपटक आग्रह गरेका छन् । सञ्चालक अञ्जन श्रेष्ठ र अभिषेक श्रेष्ठले लगानी फिर्ता गर्ने वा शेयर प्रमाणपत्र दिने विषयमा अहिलेसम्म कुनै जवाफ दिएका छैनन् ।

शिलापत्रलाई प्राप्त कागजातअनुसार, २१ चैत २०७८ मा ३७ जना लगानीकर्ताले आफूहरूको रकम फिर्ता गरिदिन आग्रह गरेका थिए । त्यस दिन सञ्चालक समितिका जोसेफ सिल्भानुस, निशिन्ता भट्ट, प्रमोदसागर सिंह प्रधान, अभिषेक श्रेष्ठ, अञ्जन श्रेष्ठ र सुरेन्द्रकुमार जोशीलाई सम्बोधन गरेर ‘रकम फिर्ता सम्बन्धमा कानुनी सूचना दिएको बारे’ निवेदन दिएका छन् । त्यसबेला निवेदन दिनेमा नाइटिङ्गेल नर्सिङ कलेजका सञ्चालक तथा कांग्रेस सांसद तेजुलाल चौधरीदेखि महिला अधिकारकर्मी सुमित्रा मानन्धर गुरुङसम्म रहेका छन् ।