सर्वसाधारणको करोडौँ लगानी कब्जा गर्दै निदान अस्पतालका सञ्चालक, ५ वर्षसम्म न शेयर प्रमाणपत्र, न रकम फिर्ता

सर्वसाधारणको करोडौँ लगानी कब्जा गर्दै निदान अस्पतालका सञ्चालक, ५ वर्षसम्म न शेयर प्रमाणपत्र, न रकम फिर्ता

A+ A A-

ललितपुरकाे पुल्चोकस्थित निदान अस्पतालका सञ्चालकहरूबीच शेयर खरिदबिक्री विवाद चर्किएको छ । अस्पतालको स्तरोन्नतिका लागि थप रकम संकलन गर्ने क्रममा शेयर खरिद गरेकाहरूले ५ वर्षदेखि शेयर प्रमाणपत्र नपाएपछि लगानीकर्ता विरोधमा उत्रिएका छन् ।

विगत २ वर्षदेखि उनीहरूले निरन्तर लगानीबापतको शेयर प्रमाणपत्र वा रकम फिर्ता माग गरिरहेका छन् । अस्पतालमा लगानी गरेका ३७ जनाले लिखित रूपमा उक्त माग गरेका हुन् । उनीहरूले शेयरबापत कम्पनी रजिष्ट्रारको कार्यालयबाट प्रमाणपत्र दिनुपर्ने, त्यसरी दिन नसके नियमअनुसार सावाँब्याजसहित रकम फिर्ता गर्नुपर्ने बताएका छन् । उनीहरूले रकम फिर्ताका लागि पटकपटक छलफलसमेत गरेका छन् ।

सञ्चालक अभिषेक श्रेष्ठ र अञ्जन श्रेष्ठले अस्पताल कब्जा गर्न लगानीकर्तालाई शेयर प्रमाणपत्र नदिएको आरोप लागेको छ । अस्पतालमा साधारण लगानीकर्ताहरूको करिब १२ करोड रुपैयाँ लगानी रहेको बताइएको छ ।

त्यसो त, निदान अस्पताल सञ्चालनमा डोल्मा फाउन्डेसनको करिब १० करोड लगानी रहेको बताइन्छ । उक्त लगानी पनि विवादमा तानिएको छ । आईएनजीओको लगानीको विषयमा विवाद भएपछि उक्त फाउन्डेसनबाट सञ्चालक समितिमा रहेका जोसेफ सिल्भानुसले सञ्चालक समिति सदस्यबाट राजीनामा पनि दिइसकेका छन् ।

लगानीकर्ताहरूको भनाइमा २०७५ सालमा श्रेष्ठद्वयले अस्पतालको स्तरोन्नतिका लागि थप शेयर संकलन गरेका थिए । त्यसरी थप लगानी गर्ने तथा पुराना लगानीकर्ताहरूको तर्फबाट ३ वैशाख २०७९ मा सञ्चालक अभिषेक श्रेष्ठको नाममा बुझाएको पछिल्लो निवेदनअनुसार शेयर खरिद गर्न अग्रिम रूपमा रकम बुझाउने लगानीकर्ताहरूलाई शेयर रकम फिर्ता गर्न श्रेष्ठ र उनको समूह राजी भएकाे थियाे । तर, हालसम्म पनि रकम फिर्ता भने भएकाे छैन । सञ्चालक समितिका सदस्यद्वय प्रमोदसागर सिंह प्रधान र सुन्दरकुमार जोशीले बुझाएको निवेदनमा रकम फिर्ता गर्ने निर्णय भएको लामो समय भइसक्दा पनि अस्पतालले कुनै कदम नचालेको उल्लेख छ ।

NIdan Letter (5)1677417701.jpg

लगानीकर्ताहरूको तर्फबाट सञ्चालक सदस्यद्वय प्रधान र सिंहले सञ्चालक अभिषेक श्रेष्ठलाई लेखेको निवेदनमा भनिएको छ, ‘सो निर्णय भएको लामो समय व्यतित भइसक्दासमेत तपाईंबाट अग्रिम रूपमा रकम बुझाउने लगानीकर्ताहरूमध्ये फिर्ता लिन चाहने लगानीकर्ताहरूलाई रकम फिर्ता गर्नेतर्फ कुनै कदम चालिएको पाइएन । तसर्थ हामीहरूले उक्त निर्णयबमोजिम फिर्ता लिन चाहने लगानीकर्ताहरूलाई यथाशीघ्र रकम फिर्ता गर्न लिखित तथा मौखिक रूपमा पटकपटक तपाईंलाई अनुरोध गरेको व्यहोरा तहाँलाई विदितै छ । हाम्रो पटकपटकको अनुरोधका बावजुद उक्त निर्णय भएको करिब दुई महिना बित्तिसक्दा पनि तपाईंबाट रकम फिर्ता लिन चाहने लगानीकर्ताहरूलाई हालसम्म रकम फिर्ता गर्ने काम भएको छैन । अत: आज मिति २०७९ वैशाख २ गतेदेखि ५ दिनभित्र सावाँ तथा नियमअनुसार ब्याज रकमसमेत थप गरी सो रकम पूर्ण रूपमा फिर्ता गरिदिनुहुन पुनः अनुरोध गर्दछौँ ।’

NIdan Letter (1)1677417690.jpg

उनीहरूले पत्रमा थप पनि लेखेका छन्, 'अन्यथा यस सम्बन्धमा हुन सक्ने कानुनी कारबाही तथा सोबाट हुने दुष्परिणामका लागि सञ्चालकद्वय आफूहरू (प्रमोद र सुरेन्द्र) जिम्मेवार नरहेको अस्पताल सञ्चालकलाई जानकारी गराउँछौँ ।'

पछिल्लोपटक लेखेको यो निवेदनभन्दा पहिला २१ चैत २०७८ मा ३७ जना लगानीकर्ताले सामूहिक रूपमा निवेदन दिएका थिए । ती ३७ जनाले आफूले दिएको रकम र त्यसको मितिसमेत उल्लेख गरेर सञ्चालक जोसेफ सिल्भानुस, निशिन्ता भट्ट, प्रमोदसागर सिंह प्रधान, अभिषेक श्रेष्ठ, अञ्जन श्रेष्ठ र सुरेन्द्रकुमार जोशीलाई पत्र लेखेका छन् ।

त्यही विवादपछि डोल्मा फाउन्डेसनका प्रतिनिधि जोसेफ सिल्भानुसले सञ्चालक समितिबाट राजीनामा दिएको बताइएको छ । ३७ जना लगानीकर्ताको तर्फबाट निवेदन दिएपछि सञ्चालक समितिमा रहेका प्रमोदसागर सिंह प्रधान र सुरेन्द्रकुमार जोशी पनि शेयर प्रमाणपत्र नपाउने पीडितको पक्षमा लागेका छन् । त्यसैले ३ वैशाख २०७९ मा जोशी र प्रधानले सञ्चालकमा रहेका अभिषेकलाई पत्र लेखेका छन् ।

बल्झिँदै विवाद

७ फागुन २०७८ मा बसेको सञ्चालक समितिको बैठकले अग्रिम रकम बुझाएका लगानीकर्ताले रकम फिर्ता लिन चाहेमा साँवा तथा नियमअनुसारको ब्याज रकमसमेत थप गरी रकम फिर्ता गर्ने निर्णय गरेको थियो । तर, बैठकको निर्णयअनुसार एक वर्षसम्म पनि रकम फिर्ता भएको छैन ।

पटकपटक लिखित र मौखिक रुपमा कम्पनी रजिष्ट्रार कार्यालय तथा निदान अस्पताल लिमिटेडको सञ्चालक समितिमार्फत समेत शेयर कायम गरी शेयर प्रमाणपत्र प्रदान गर्न वा सावाँब्याजसहित रकम फिर्ता गर्ने प्रयास भएको थियो । उक्त अस्पतालमा २ करोड ६५ लाखभन्दा धेरै लगानी गरेका तेजुलाल चौधरी लामो समयदेखिको शेयर विवाद नसल्टिएको बताउँछन् ।

नेपाली कांग्रेसका सांसदसमेत रहेका चौधरी नर्सिङ कलेज सञ्चालनका लागि उक्त अस्पतालमा लगानी गरेको बताउँछन । सरकारले नर्सिङ कलेज सञ्चालनका लागि कम्तीमा १ सय शय्याको अस्पताल हुनुपर्ने नियम ल्याएपछि चौधरीले आफ्नो लगानीको नाइटिङ्गेल नर्सिङ कलेज सञ्चालनको सहजताका लागि निदान अस्पतालमा लगानी गरेका थिए । शिलापत्रसँगको कुराकानीमा चौधरीले २ वर्षदेखि शेयर रकमसम्बन्धी विवाद भइरहेको बताए ।

चौधरीले शिलापत्रसँग भने, ‘२ वर्षदेखि विवाद भइरहेको छ, अग्रिम रकम बुझाएको हो, शेयर प्रमाणपत्र पाएका छैनौँ, अस्पतालदेखि कम्पनी रजिष्ट्रारको कार्यालयमा समेत पुग्यौँ समस्या समाधान भएको छैन । साथीहरू दौडधुपमा पनि लाग्नुभएको छ, मैले पनि रकम फिर्ता गर्न निवेदन दिएको छु ।’

व्यक्तिगत तर्फबाट सबैभन्दा धेरै लगानी गर्ने तिनै चौधरी हुन् । ५ देखि २० लाख रुपैयाँसम्म लगानी गर्नेहरूको संख्या धेरै रहेको छ । २०७४ सालमा रकम बुझाउनेहरूले समेत शेयर प्रमाणपत्र पाएका छैनन् । उनीहरूले रकम फिर्ता माग्दा पनि पाएका छैनन् ।

NIdan Letter (3)1677417692.jpg

अग्रिम रूपमा रकम बुझाएका लगानीकर्ताले २१ चैत २०७८मा सावाँ र नियमअनुसार ब्याज रकम १५ दिनभित्र फिर्ता गर्न अल्टिमेटम दिएका थिए । उक्त समयमा रकम नपाए कानुनी प्रक्रियाका लागि अगाडि बढ्ने लगानीकर्ताहरूले भनेका थिए । तर, सञ्चालक अभिषेक श्रेष्ठ र अञ्जन श्रेष्ठले लगानीकर्तालाई शेयर प्रमाणपत्र पनि दिएनन् र रकम फिर्ता पनि गरेनन् ।

लगानीकर्ताहरूको भनाइमा २५ मंसिर २०७७ मा अस्पताल सञ्चालक समितिको बैठकले ‘कम्पनीको उद्देश्यबमोजिम काम गर्नका लागि थप पुँजीको आवश्यकता परेको भन्दै जगेडामा रहेको रकम खरिदका लागि अनुरोध गरेको थियो । त्यही आधारमा अभिषेक र अञ्जन श्रेष्ठले आफन्त र आफूनिकटका व्यक्तिहरूलाई शेयर बिक्री गरेका थिए । लगानीकर्ताहरूको भनाइअनुसार अस्पतालले अग्रिम रकम लिएका लगानीकर्तालाई शेयर दिनेसम्बन्धी सञ्चालक समितिको निर्णयकाे कागजात कम्पनी रजिष्ट्रारको कार्यालयमा भेटिएन ।

अग्रिम रकम बुझाउनेहरूलाई शेयर प्रमाणपत्र दिलाउनेसम्बन्धी सञ्चालक समितिको निर्णय कम्पनी रजिष्ट्रारको कार्यालय नभेटिएपछि आक्रोशित लगानीकर्ताहरू सञ्चालक समितिविरुद्ध खनिन थालेका हुन् । त्यही कारण ८ फागुन २०७८ मा सञ्चालक समितिको बैठकले अग्रिम रकम बुझाउने लगानीकर्तालाई शेयर कायम गर्ने र पैसा फिर्ता गर्न चाहनेलाई कानुनअनुसार रकम फिर्ता गर्ने निर्णय गरेको थियो । र, उक्त रकम फिर्ता गर्ने जिम्मा अभिषेक श्रेष्ठले लिएका थिए ।

१० चैत २०७७ मा अस्पतालको निर्वाचन अधिकृतको कार्यालयले प्रकाशित गरेको मतदाता नामावलीमा त्यसरी शेयर खरिद गर्नेहरूको नामावली पनि प्रकाशन गरिएका थियो । तर, शेयर विवाद नटुंगिएका कारण उक्त साधारणसभा पनि हुन सकेको छैन । र एक विगत वर्षदेखि सञ्चालक समितिको बैठकसमेत बस्न नसकेको बताइएको छ ।

आफूहरूले शेयर पाउने आशामा कम्पनीलाई ठूलो रकम दिएको लगानीकर्ता स्वीकार गर्छन् । तर, कम्पनीमा विदेशी लगानी भएका कारण उद्योग विभागबाट भएका साबिक शेयर पर्चेज एग्रिमेन्टमा संशोधन नगरी कायम शेयरधनीबाहेक अन्यलाई दिन नमिल्ने र शेयरधनी मात्रै पहिलो अधिकार हुने लगानीकर्ताले थाहा पाएपछि अर्को विवाद निस्केको हो ।

उद्योग विभागबाट उक्त व्यवस्था बुझेपछि लगानीकर्ता कम्पनी रजिष्ट्रार कार्यालय पुगेर थप बुझ्ने प्रयास गरेका थिए । त्यतिबेला उनीहरूले पत्तो पाए, सञ्चालक समितिले अग्रिम रकम लिएकाहरूलाई शेयर दिनेबारेमा निर्णय नै पठाएको रहेनछ । लगानीकर्ता सुमित्रा मानन्धर गुरुङ आफूहरूलाई सञ्चालक समितिले पटकपटक झुक्याएर ठूलो मात्रामा रकम उठाएर शेयर प्रमाणपत्र नदिएको बताउँछिन् ।

NIdan Letter (6)1677417707.jpg

शिलापत्रसँगको कुराकानीमा मानन्धर अस्पतालका सञ्चालकद्वय श्रेष्ठले नियतवश शेयर नदिएको र रकम पनि फिर्ता नगरेको बताउँछिन् । उनले भनिन, ‘हामीले पटकपटक शेयर प्रमाणपत्र उपलब्ध गराउन आग्रह गरेका छौँ, शेयर लिन नचाहनेलाई रकम फिर्ता गर्न पनि भनेका थियौँ र त्यसअनुसार निर्णय पनि भएको हो । तर, निर्णय भएको एक वर्षसम्म पनि त्यसको सुनुवाइ भएन ।’

मानन्धरले १४ लाख रुपैयाँ लगानी गरेकी छिन् । र, मानन्धरकी बहिनीले थप रकम लगानी गरेकी छिन् । त्यसैगरी, नाइटिङ्गेल नर्सिङ कलेज अर्थात तेजु एजुकेसन फाउन्डेसनले २ करोड ६५ लाख, रोशनराज श्रेष्ठले २५ लाख, विना श्रेष्ठ केसीले २० लाख, इन्दु जोशीले १५ लाख, डोरनबहादुर सुनुवारले १९ लाख रुपैयाँ लगानी गरेका छन् ।

२१ चैत २०७८ मा शेयर प्रमाण वा रकम फिर्ताको मागसहित अस्पतालमा निवेदन दिने ३७ जना लगानीकर्ता धेरै लगानी गर्नेको सूचीमा देखिएका छन् । अधिकांश लगानीकर्ताले भने १० लाख रुपैयाँ लगानी गरेको देखिन्छ ।

प्रकाशित मिति: सोमबार, फागुन १५, २०७९ ०६:२९