शेयर सदस्यहरू नै विरोधमा उत्रिएपछि विवादमा फस्यो निदान अस्पतालको साधारणसभा

शेयर सदस्यहरू नै विरोधमा उत्रिएपछि विवादमा फस्यो निदान अस्पतालको साधारणसभा

A+ A A-

ललितपुरस्थित निदान अस्पतालले आउँदो ९ भदौ २०८० का लागि आह्वान गरेको साधारणसभा विवादमा फसेको छ । स्थापनाकालदेखिका शेयर सदस्यहरू नै अस्पतालको लापर्वाहीपूर्ण व्यवस्थापनको विरोधमा उत्रिएपछि साधारणसभा विवादमा परेको हो ।

वर्षौंसम्म अस्पतालको साधारणसभा नगरेको व्यवस्थापनले अहिले अस्पताल आर्थिक रूपमा टाट पल्टिएपछि सर्वसाधारणको रकम हिनामिना गर्ने वैधानिक बाटो खोजेको आरोप लगाएका छन् । स्थापनाकाल २०७२ र २०७३ सालमा शेयर हालेका सर्वसाधारणले हिसाबकिताब खोजिरहेका छन् । सञ्चालक समितिमा रहेका अञ्जन श्रेष्ठ, अभिषेक श्रेष्ठ र म्यानेजमेन्ट कन्सल्ट्यान्ट रोजिना तुलाधरले अस्पताललाई आर्थिक रूपमा टाट पल्टाएको उनीहरूको आरोप छ । शेयरबापतको रकम बुझाएर शेयर प्रमाणपत्र प्राप्त गरेका तर त्यसपछि हिसाबकिताब कहिल्यै नदेखाएको र साधारणसभासमेत नगरेको उनीहरूको भनाइ छ । त्यसैले उनीहरूले व्यवस्थापन यी तीन जनाको मनोमानी शैलीको विरोधमा उत्रिनुपरेको दाबी गरिरहेका छन् ।

पीडित शेयरधनीहरूमध्ये अधिकांशले अस्पताल व्यवस्थापनसँग हिसाबकिताब माग्न थालेका छन् । व्यवस्थापन पक्ष हिसाब देखाउनेभन्दा पनि सम्पर्कमै नआउने गरेको पीडित शेयरधनीको भनाइ छ । शिलापत्रको सम्पर्कमा आएकी शेयरधनी मञ्जु श्रेष्ठले आफूहरूको लाखौँ रुपैयाँ शेयरका नाममा डुबेको बताइन् । उनका अनुसार व्यवस्थापन तथा सञ्चालक समितिमा रहेका व्यक्ति सम्पर्कमा आउनै नचाहेको र सम्पर्कमा आउँदा पनि हिजोको हिसाबकिताब देखाउने विषयमा केही नबताउने तथा शेयर फिर्ता माग्दा अस्पतालमा हिजो जोमार्फत लगानी गरेको उसैलाई माग्न जानू भन्दै गैरजिम्मेवार जवाफ दिने गरेको बताइन् । उनले आफूले म्यानेजमेन्ट कन्सल्ट्यान्ट रोजिना तुलाधरसँग पटक-पटक कुराकानी गरेको तर जोमार्फत शेयर हालेको उसैसँग माग्न जानू भन्दै गैरजिम्मेवार जवाफ दिएको बताइन् ।

पीडित शेयरधनीहरूको समूहले अघिल्लो साता सामूहिक छलफलसमेत गरेको थियो । उक्त छलफलमा व्यवस्थापनको गैरजिम्मेवार व्यवहार, व्यवस्थापनमा देखिएको कमजोरीका कारण शेयर डुबेको निष्कर्ष निकालेका छन् । उक्त गलत र गैरजिम्मेवार व्यवस्थापनविरुद्धमा उत्रिने पनि उनीहरूले बताएका छन् ।

यो पनि : सर्वसाधारणको करोडौँ लगानी कब्जा गर्दै निदान अस्पतालका सञ्चालक, ५ वर्षसम्म न शेयर प्रमाणपत्र, न रकम फिर्ता

अस्पतालमा झण्डै १ सय जना शेयर सदस्य रहेको बताइन्छ । सुरुवाती चरणमा शेयर हालेका सर्वसाधारणले २०७३ पछिको अस्पतालको खर्च र आम्दानीबारे सामान्य हिसाबकिताब नपाए पनि शेयर प्रमाण भने पाएका छन् । त्यसैले गर्दा उनीहरू कानुनी लडाइँका लागि बलियो अवस्थामा छन् ।

तर, ४० भन्दा बढी सर्वसाधारणले वर्षौंदेखि शेयर प्रमाणपत्र पनि पाएका छन् । उनीहरूबाट उठाइएको करोडौँ रुपैयाँको हिसाबकिताब पनि गरिएको छैन । अस्पतालका शेयरधनीहरूलाई प्रमाणपत्रसमेत नदिएर ४ दर्जनजति सर्वसाधारणको झण्डै १० करोड रुपैयाँको हिसाबकिताब व्यवस्थापनले देखाएको छैन । उनीहरूलाई भने कानुनी लडाइँका लागि पनि समस्या भएको छ । त्यसमध्ये अधिकांशले अस्पतालको नाममा रकम दिएको समयदेखिको सावाँब्याजसहितको रकम फिर्ता पनि मागिरहेका छन् ।

व्यवस्थापनले उक्त रकम फिर्ता दिने भनेर निर्णय गरेको २ वर्ष भइसक्दा पनि उक्त रकम दिएको छैन । अहिले अस्पताल सञ्चालन नै हुन नसक्ने अवस्थामा पुगेपछि भने उनीहरूलाई शेयर प्रमाणपत्र दिने बताउन थालेको छ । आउँदो साधारणसभाबाट उक्त निर्णय गर्ने पनि बताइएको छ । व्यवस्थापनको अक्षमताका कारण अस्पताल डुबेको भन्दै उनीहरू शेयर प्रमाणपत्र लिने पक्षमा छैनन् । उनीहरूले पहिला भएको सहमतिअनुसार नै रकम फिर्ता हुनुपर्ने माग राखिएको छ । साथै, अस्पतालको सुरुवाती चरणमै लगानी गरेका शेयर सदस्यले पनि पैसा फिर्ता माग्न थालेका छन् । तर, व्यवस्थापन पक्षका अञ्जनकुमार श्रेष्ठ, अभिषेक श्रेष्ठलगायतको टोलीले सुनुवाइ गरेको छैन ।

सर्वसाधारण शेयर सदस्यहरू आन्दोलित हुन थालेपछि नेपाल उद्योग वाणिज्य महासंघका वरिष्ठ उपाध्यक्षसमेत रहेका अञ्जन श्रेष्ठ भने साधारणसभा गरेर सञ्चालक समितिबाट छुटकारा लिन खोजिरहेका छन् । भोलिका दिनमा अस्पताल डुबेको अवस्थामा बैंकले कालो सूचीमा राख्ने डरले उनी सञ्चालक समितिबाट छुटकारा लिन खोजेको अस्पताल स्रोतको भनाइ छ ।

अस्पतालले विगत ८ महिनादेखि चिकित्सक, नर्स तथा कर्मचारीको तलब सुविधा पनि दिन सकेको छैन । कर्मचारीहरू लामो समयदेखि तलब रोकिएका कारण आन्दोलित भएका छन् भने चिकित्सकहरू अस्पताल छोडेर हिँडिसकेका छन् । ठूलो आर्थिक भारमा फसेको निदान अस्पताल बचाउन नसक्ने भएकाले अञ्जन श्रेष्ठले छोड्न लागेको बताइएको छ ।

यो पनि : अञ्जन श्रेष्ठ सञ्चालक रहेकाे निदान हस्पिटलद्वारा कराेडौँकाे शेयर हिनामिनाः शेयरधनीलाई न शेयरको प्रमाणपत्र, न रकम फिर्ता

त्यसैले श्रेष्ठ प्रमाणपत्र नपाएका शेयर सदस्यलाई पैसा फिर्ता दिनुभन्दा अहिले शेयर प्रमाणपत्र दिएर थामथुम पार्ने रणनीतिमा लागेका हुन् । कतिपयलाई भने शेयर रकमको पैसा फिर्ता दिन चेक दिएका छन् । तर, चेक साट्न जाँदा बैंक खातामा रकम नै नभएको पाइएको छ । यो समस्या अहिले कांग्रेस सांसद तेजुलाल चौधरीले नै भोगिरहेका छन् । उनले नाइटिङ्गेल फाउन्डेसनको नाममा झण्डै ३ करोड शेयर हालेका थिए ।

तर, उनलाई अस्पताल प्रशासनले शेयरको प्रमाणपत्र नै नदिएर वर्षौंदेखि अल्झाइरहेको थियो । सञ्चालक अभिषेक श्रेष्ठले बाबु पूर्वप्रधानन्यायाधीश कल्याण श्रेष्ठको धाकमा सर्वसाधारणको शेयरमा हालीमुहाली गरेको आरोप पनि पीडित पक्षले लगाइरहेका छन् । पूर्वप्रधानन्यायाधीश श्रेष्ठको आडमा व्यवसाय चलाउन पाइने नाममा अञ्जन श्रेष्ठ पनि सर्वसाधारण शेयरधनीको विपक्षमा उभिएको आरोप छ ।

पछिल्लोपटक चेक नसाटिएपछि तनावमा रहेका चौधरीलाई शेयर विवादको विषय लामो समयदेखि भएको बताएका छन् । तर, चेक नसाटिएको विषयमा भने उनले प्रस्ट बताएनन् । चौधरीले अहिले उक्त विषयमा थप केही नबोल्ने बताएका छन् ।

प्रकाशित मिति: मंगलबार, साउन ३०, २०८० १४:२१