अञ्जन श्रेष्ठ सञ्चालक रहेकाे निदान हस्पिटलद्वारा कराेडौँकाे शेयर हिनामिनाः शेयरधनीलाई न शेयरको प्रमाणपत्र, न रकम फिर्ता

अञ्जन श्रेष्ठ सञ्चालक रहेकाे निदान हस्पिटलद्वारा कराेडौँकाे शेयर हिनामिनाः शेयरधनीलाई न शेयरको प्रमाणपत्र, न रकम फिर्ता

A+ A A-

नेपाल उद्योग वाणिज्य महासंघका नवनिर्वाचित वरिष्ठ उपाध्यक्ष अञ्जन श्रेष्ठको लगानी रहेको अस्पतालले वर्षौंदेखि सर्वसाधारणको शेयर हिनामिना गरेको खुलासा भएको छ । श्रेष्ठसमेतको लगानी रहेकाे ललितपुरको पुल्चोकस्थित निदान हस्पिटलमा लगानी गरेका सर्वसाधारणको करिब १२ करोड रुपैयाँ हिनामिना भएको हो ।

उनीहरूले निदान हस्पिटलमा २०७४ सालमा शेयरबापत लाखौँ रुपैयाँ लगानी गरेका थिए । तर, उनीहरूलाई अस्पतालले शेयर प्रमाणपत्र दिएकाे छैन । पीडित सर्वसाधारणले शेयर प्रमाणपत्र नदिने भए रकम फिर्ता गरिदिन सञ्चालक श्रेष्ठ परिवारलाई पटकपटक आग्रह गरेका छन् । सञ्चालक अञ्जन श्रेष्ठ र अभिषेक श्रेष्ठले लगानी फिर्ता गर्ने वा शेयर प्रमाणपत्र दिने विषयमा अहिलेसम्म कुनै जवाफ दिएका छैनन् ।

शिलापत्रलाई प्राप्त कागजातअनुसार, २१ चैत २०७८ मा ३७ जना लगानीकर्ताले आफूहरूको रकम फिर्ता गरिदिन आग्रह गरेका थिए । त्यस दिन सञ्चालक समितिका जोसेफ सिल्भानुस, निशिन्ता भट्ट, प्रमोदसागर सिंह प्रधान, अभिषेक श्रेष्ठ, अञ्जन श्रेष्ठ र सुरेन्द्रकुमार जोशीलाई सम्बोधन गरेर ‘रकम फिर्ता सम्बन्धमा कानुनी सूचना दिएको बारे’ निवेदन दिएका छन् । त्यसबेला निवेदन दिनेमा नाइटिङ्गेल नर्सिङ कलेजका सञ्चालक तथा कांग्रेस सांसद तेजुलाल चौधरीदेखि महिला अधिकारकर्मी सुमित्रा मानन्धर गुरुङसम्म रहेका छन् ।

उनीहरूले दिएको निवेदनअनुसार, अस्पतालको उद्देश्यअनुसार काम गर्नका लागि थप पुँजीको आवश्यकता परेको र कम्पनीमा जगेडा शेयर बाँकी रहेकोमा उक्त जगेडा शेयर खरिद गर्न आग्रह गरिएबमाेजिम उनीहरूले खरिद गरेका थिए । लगानीअनुसारको शेयर कित्ता उनीहरूको नाममा नामसारी गरिदिने विश्वास पनि दिलाएका थिए । तर, २०७५ देखि शेयर प्रमाणपत्र नदिएको मात्र होइन, प्रमाण दिनका लागि कम्पनी रजिष्ट्रार कार्यालयमा कम्पनीले प्रक्रिया नै अगाडि नबढाएको तथ्य फेला परेपछि उनीहरू रकम फिर्ताको अभियानमा लागेका हुन् ।

अहिले शेयर प्रमाणपत्र नपाएका लगानीकर्ताहरू प्रमाणपत्र नलिने भन्दै सावाँब्याजसहित रकम फिर्ता मागिरहेका छन् ।

उनीहरूका अनुसार २५ मंसिर २०७७ मा सञ्चालक समितिको बैठकले दोस्रोपटक अस्पतालका लागि थप रकम आवश्यक परेको भन्दै शेयर खरिदका लागि आग्रह गरेको थियो । उक्त निर्णयपछि धेरै सर्वसाधरणले लगानी गरेका थिए । त्यसो त, पहिला नै शेयर लगानी गरेका केही सर्वसाधारणले पनि प्रमाणपत्र पाएका छैनन् ।

पीडित सर्वसाधारणका अनुसार हस्पिटलको साधारणसभाका लागि १० चैत २०७७ मा निर्वाचन अधिकृतको कार्यालयले प्रकाशित गरेको मतदाता नामावलीमा भने यी सबैको मतदाता नामावलीको रूपमा प्रकाशित गरिएको थियो । शेयरप्रमाणपत्र नपाएकाहरूलाई कसरी मतदाता नामावलीमा प्रकाशित गरियो भन्ने प्रश्न पनि उठेको थियो ।

उक्त विवाद बढ्दै गएपछि हस्पिटलको साधारणसभा पनि हुन नसकेको बताइएको छ । विवाद बढेकै कारण लगानीकर्तालाई रकम फिर्ता गर्ने बोर्ड बैठकले निर्णय पनि गरेको थियो । उक्त बोर्ड बैठकले रकम फिर्ता गर्ने जिम्मा अभिषेक श्रेष्ठलाई दिने निर्णय पनि गरेको बताइएको छ । उक्त निर्णयमा अञ्जन श्रेष्ठले समेत सहमति जनाएका थिए । यद्यपि, लामो समयसम्म रकम फिर्ता नभएपछि लगानीकर्ता भने आक्रोशित भएका छन् । लगानीकर्ता आफन्तहरू धेरै भएका कारण श्रेष्ठद्वयको सार्वजनिक रूपमा विरोध गर्न धकाइरहेका छन् ।

३७ जना लगानीकर्ताको निवेदनमा भनिएको छ, ‘हामीले शेयर पाउने कुरामा ढुक्क भई बसेको अवस्थामा कुनै पनि जानकारी नपाएकाले हामीले पटकपटक लिखित तथा मौखिक रूपमा जानकारी माग गर्दा छिट्टै नै शेयर दिने भनी तपाईं सञ्चालकलगायतले मौखिक मात्र जानकारी गराएको र पछि त हामीले गरेको फोनसमेत नउठाउने गरी सम्पर्कविहीन नै भएको अवस्था आएकाले यससम्बन्धमा के भएको रहेछ भनी कम्पनी रजिष्ट्रारको कार्यालयमा बुझ्दा त्यस कम्पनीमा विदेशी लगानीसमेत भएकाले उद्योग विभागबाट भएका साविक शेयर पर्चेज एग्रिमेन्टमा संशोधन नगरी कायम शेयरधनीबाहेक अन्यलाई शेयर दिन नमिल्ने, शेयरधनीहरूको मात्र पहिलो अधिकार हुने भएकाले हामीसहितको शेयर लगत प्रमाणित हुन नसक्ने आशयको निर्णय भएको पाइयो ।’

साथै, अन्यलाई शेयर दिनेसम्बन्धी सञ्चालक समितिको निर्णयलगायतका कुनै पनि कागजात कम्पनी रजिस्ट्रारको कार्यालयमा नभेटिएको पनि उनीहरूले बताएका छन् ।

उनीहरूले पत्र प्राप्त भएको मितिले १५ दिनभित्र सावाँ तथा प्रचलित कानुनअनुसार ब्याज र सावाँ रकममा २५ प्रतिशतले हुने क्षतिपूर्तिसमेत फिर्ता गरिदिन अन्तिमपटक आग्रह गरेको उल्लेख गरेका छन् । उक्त निवेदनको बोधार्थ स्वास्थ्य तथा जनसंख्या मन्त्रालय, उद्योग वाणिज्य तथा आपूर्ति मन्त्रालय र कम्पनी रजिष्ट्रारको कार्यालयलाई पनि दिएका छन् ।

उक्त निवेदनमा सञ्चालक श्रेष्ठ समूहले कुनै काम नगरेपछि फेरि ३ वैशाख २०७९ मा अर्को निवेदन दिएका थिए । सञ्चालक अभिषेक श्रेष्ठलाई सम्बोधन गरेर उनीहरूले त्यस दिन लेखेको पत्रमा पनि शेयर खरिद गर्न अग्रिम रूपमा रकम बुुझाउने लगानीकर्ताको रकम फिर्ता गर्न भनेका छन् ।

शेयर लगानीका लागि अग्रिम रकम बुुझाउनेहरूमध्ये निवेदन दिएका ३७ जना लगानीकर्तामध्ये सबैभन्दा धेरै लगानी नाइटिङ्गेल नर्सिङ कलेजको नाममा छ । कांग्रेस सांसद तेजुलाल चौधरीको लगानी रहेको उक्त कलेजले १८ साउन २०७६ मा ५० लाख, ३ मंसिर २०७६ मा २५ लाख, १८ फागुन २०७७ मा १५ लाख, ५ भदौ २०७६ मा १ करोड र २३ भदौ २०७६ मा ७५ लाख गरी २ करोड ६५ लाख रुपैयाँ लगानी गरेको छ । चौधरीले सञ्चालन गरेको नर्सिङ कलेजका लागि १ सय शय्याको अस्पताल आवश्यक परेको थियो ।

सरकारले नर्सिङ कलेज पढाउन १ सय शय्याको अस्पताल अनिवार्य हुनुपर्ने व्यवस्था गरेपछि चौधरीले निदान हस्पिटललाई ५० शय्याबाट १ सय शय्यामा स्तरोन्नति हुने भएपछि लगानी गरेको बताउँछन् । शिलापत्रसँगको कुराकानीमा चौधरीले आफ्नो कलेजलाई अस्पताल आवश्यक परेका कारण लगानी गरेको बताए । तर, अहिलेसम्म शेयरमा परिणत नभएपछि पटकपटक रकम फिर्ता मागेको उनको भनाइ छ ।

त्यसैगरी, गोपालबहादुर थापाले २४ जेठ २०७६ मा ७, नयनकृष्ण श्रेष्ठले २ वैशाख २०७५ मा र सोही दिन असिम राजभण्डारीले शेयर लगानी गरेका छन् । त्यसैगरी, २ वैशाख २०७५ मै रोमेन्द्रबहादुर अमात्य, बिना श्रेष्ठ केसी र १७ पुस २०७५ मा लगानी गरेको निवेदनमा उल्लेख छ ।

शोभादेवी श्रेष्ठले २० कात्तिक २०७४ मा र रोशनराज श्रेष्ठले २४ पुस र १० फागुन २०७४ मा दुईपटक लगानी गरेका छन् । निदान हस्पिटलमा लगानी गर्ने अधिकांश अञ्जन श्रेष्ठ र अभिषेक श्रेष्ठका आफन्तहरू नै रहेको पनि बताइएको छ । शिलापत्रसँगको सम्पर्कमा आएकी सुमित्रा मानन्धरले पनि पटकपटक प्रयास गर्दा पनि रकम फिर्ता नभएको बताइन् । उनले ३१ जेठ ०७६ मा १४ लाख रुपैयाँ लगानी गरेकी थिइन् । आफूले लगानी गरेपछि बहिनीले पनि १४ लाख रुपैयाँ लगानी गरेको सुमित्रा बताउँछिन् ।

यस विषयमा अञ्जन श्रेष्ठसँग पटक-पटक फोन सम्पर्क गर्दा पनि उनी सम्पर्कमा आउन चाहेनन् । त्यसैगरी निदान अस्पतालकी म्यानेजमेन्ट कन्सल्टेन्ट रोजिना तुलाधरले यस विषयमा अदालतमा मुद्दा रहेकाले आफूले टिप्पणी नगर्ने प्रतिक्रिया दिइन् ।

प्रकाशित मिति: शुक्रबार, वैशाख ८, २०८० १५:४६

शिलापत्र संवाददाता

प्रतिक्रिया दिनुहोस्

भर्खरै

अर्थ मन्त्रालयको स्वीकृतिपछि घट्यो ब्रोकरको कमिसन

सरकारले एकैपटक गर्‍यो ६० सहसचिव सरुवा, को कहाँ पुगे ?

भृकुटीमण्डपमा विद्यार्थी महोत्सव (तस्वीरहरू)

माधव नेपालको दाबी- उपेन्द्र यादवले राजीनामा नदिएको भए गलहत्याएर निकालिन्थ्यो

कोशी प्रदेशकी सांसद लिम्बू जसपातिर, निर्वाचन आयोगमा गरिन् सनाखत

लोकप्रिय

एमाले र माओवादीसँग कसरी बिग्रियो उपेन्द्रको सम्बन्ध ?

एउटै रेडियोमा काम गर्थे रवि र गगन, २५ वर्षपछि सम्बन्धमा कसरी बढ्यो खटपट ?

कलंकीबाट हराएकी स्नेहा सात दिनपछि पशुपतिमा भेटिइन्

सन्दीप लामिछानेको मुद्दामा कसरी जोडिए पारस ? यस्ता छन् परिघटना

ओलीलाई अँगालो हालेर प्रचण्ड बोक्न गएपछि मिसन २०८४ ले हावा खायोः गणेश कार्की (अन्तर्वार्ता)

विचार

नगरवधू आम्रपाली कसरी भिक्षु भइन् ?

खुसीको कुरा, नेपालीको आयु बढ्यो तर हेरचाह गर्ने कसले ?

इलाम- २ को उपनिर्वाचनपछि रास्वपा नेतृत्वले बुझाेस्- सधैँसधैँ आँधीहुरी आउँदैन

ब्लग

गोसाइँकुण्ड यात्राले स्वस्थ छु, चुस्त छु भन्ने भ्रमबाट मुक्त गरायो

म गे हुँ भनेर थाहा पाउँदा आमालाई सुर्ता भयो, 'अब यसलाई समाजले कति दुःख देला नि'

'बोक्सीको घर' हेरेपछि निदाउनै सकिनँ

शिक्षा

युनिग्लोब सेकेन्डरी स्कुल कमलादीले कक्षा काेठाबारे शिक्षकलाई दियो तालिम, १६० जना सहभागी

राइटपाथको ‘ग्रान्ड एजुकेसन कन्क्लेभ २०२४’: सहभागीहरूले प्राप्त गरे २०८१ रुपैयाँमै आईईएलटीएस गर्न पाउने अवसर

युनिग्लोब स्कुल कमलादीले ५० भन्दा धेरै विद्यालयका शिक्षकलाई तालिम दिँदै