इलाम २ः प्रारम्भिक मतपरिणाममा एमाले र 'पूर्वएमाले'बीच टक्कर

A+ A A-

इलाम निर्वाचन क्षेत्र नम्बर २ को प्रारम्भिक मतपरिणामअनुसार, एमालेका सुहाङ नेम्बाङले अग्रता लिएका छन् । ४ सय ५२ मतगणना हुँदा सुहाङको प्रतिस्पर्धा स्वतन्त्र उम्मेदवार डकेन्द्रसिंह थेगिमसँग भएको देखिन्छ । थेमिगले १ सय ६८ मत पाएका छन् । यो भनेको ६६ मतको अन्तर हो । थेगिम पूर्वएमाले हुन् ।

संसदको चौथो ठूलो दल राष्ट्रिय स्वतन्त्र पार्टीका मिलन लिम्बूले ९३ मत पाएका छन् । प्रारम्भिक मत परिणामअनुसार उनी तेस्रो स्थानमा देखिएका छन् । चौथो स्थानमा कांग्रेसका डम्बरबहादुर खड्का छन्, जसले ८९ मत पाएका छन् ।

२०७९ को चुनावमा निर्वाचित सुवास नेम्वाङको निधन भएपछि इलाम- २ मा उपनिर्वाचन भएको हो ।

उपनिर्वाचनमा कुल १८ प्रतिस्पर्धी छन् ।

चुनावी मैदानमा एमालेबाट सुहाङ लिम्बू, कांग्रेसबाट डम्बरबहादुर खड्का, राष्ट्रिय स्वतन्त्र पार्टीबाट मिलनकुमार योङहाङ लिम्बू, राष्ट्रिय प्रजातन्त्र पार्टीबाट लक्ष्मी गुरुङ, जनमत पार्टीबाट प्रेमकुमार थाम्सुहाङ, नेकपा (एकीकृत समाजवादी) बाट जीतकुमार राई छन् ।

यसैगरी, नेपाल मजदुर किसान पार्टीबाट श्यामबहादुर दर्जी, मंगोल नेसनल अर्गनाइजेसनबाट मनिबहादुर लिम्बू, राष्ट्रिय प्रजातन्त्र पार्टी नेपालबाट गणेशबहादुर चौहान, नेपाली जनता दलबाट रेशबहादुर सुनार, राष्ट्रिय मुक्ति आन्दोलन नेपालबाट जयवन्त विक्रम शाह, स्वतन्त्र उम्मेदवारका रूपमा अर्जुनबहादुर शाही, डकेन्द्रसिंह थेगिम, डाकप्रसाद बोहोरा, मनोज निरौला, योगेन्द्र गुरुङ र राज बस्याल उम्मेदवार छन् ।

१८ जना उम्मेदवार भए पनि मुख्यतः एमालेका सुहाङ, कांग्रेसका खड्का, रास्वपाका लिम्बू र स्वतन्त्र उम्मेदवार थेगिमबीच प्रतिस्पर्धा हुने अनुमान गरिएको छ ।

प्रकाशित मिति: आइतबार, वैशाख १६, २०८१ १४:३६