आज दिनभर : नाउपाले पनि दियाे कांग्रेसलाई झड्का, लाेडसेडिङ नहुने ऊर्जामन्त्रीकाे प्रस्टाेक्ति (भिडियाे)

आज दिनभर : नाउपाले पनि दियाे कांग्रेसलाई झड्का, लाेडसेडिङ नहुने ऊर्जामन्त्रीकाे प्रस्टाेक्ति (भिडियाे)

A+ A A-

प्रमुख विपक्षी नेपाली कांग्रेसले सहकारी प्रकरणको छानबिन निष्पक्ष गराउन गृहमन्त्रीबाट रवि लामिछाने बाहिरिनुपर्ने अडान कायमै राखेकाे छ । तर लामिछानेले भने सहकारीमा आफ्नो नाम जोडिए पनि पुष्टि गर्ने कुनै तथ्य नभएको प्रष्टीकरण दिएका छन् ।

रास्वपाका सभापतिसमेत रहेका गृहमन्त्री रवि लामिछानेमाथि प्रश्न उठाएकोबारे स्पष्टीकरण सोधिएपछि रमेश खरेलले रास्वपा परित्याग गरेका छन् ।

नागरिक उन्मुक्ति पार्टीले प्रदेशमा पनि एमाले–माओवादीसहितको गठबन्धनलाई समर्थन गर्ने निर्णय गरेकाे छ । याेसँगै नेपाली कांग्रेसले नेतृत्व गरेकाे सुदूरपश्चिम र लुम्बिनी प्रदेश सरकार ढल्ने भएका छन् ।

मेडिकल व्यवसायी दुर्गा प्रसाईका अंगरक्षकलाई अनुमति नै नभएको स्वचालित हतियार राख्न दिएको अनुमतिबारे संसदको राज्य व्यवस्था समितिका सांसदहरूले प्रश्न उठाएका छन् । हतियार अनुमतिबारे छानबिन गर्न गृह मन्त्रालयले जिल्ला प्रशासन कार्यालय झापाबाट विवरण मागेकाे छ ।

भारतबाट विद्युत खरिद सम्झौता नवीकरण नहुने र केही दिनमा लोडसेडिङ हुने हल्ला निराधार भएको ऊर्जामन्त्री शक्ति बस्नेतले बताएका छन् ।

सुपुर्दगी सन्धि नहुँदा सूर्यदर्शन सहकारी ठगिका मुख्य व्यक्ति जीबी राईलाई नेपाल ल्याउन नसकेको प्रहरी महानिरीक्षक वसन्तबहादुर कुँवरले बताएका छन् । छानबिनमा सहयोग नगर्ने तथा गाडी र पीएसओ समेत छाडेर हिँडेपछि माओवादी उपाध्यक्ष कृष्णबहादुर महरालाई पक्राउ गरेको उनले दाबी गरेका छन् ।

साताको चौथो कारोबार दिन बुधबार शेयर बजार परिसूचक नेप्सेमा दोहोरो अंकको गिरावट आएकाे छ । अघिल्लो दिनको तुलनामा नेप्से परिसूचक १०.८३ अंकले घटेर २०३० अंकमा कायम भयाे ।

मदिरा नीतिमा दिल्लीका मुख्यमन्त्री अरविन्द केजरीवालको गिरफ्तारीले भारतमा गम्भीर प्रश्न उठेकाे छ । भाजपालाई ५९ करोड चन्दा दिने विवादित व्यापारी नै केजरीवालविरुद्धका सरकारी साक्षी छन् ।