कोशी प्रदेशका तराई जिल्लामा अचाक्ली बढ्यो गर्मी, दिउँसोमा घरबाहिर निस्कन कठिन

कोशी प्रदेशका तराई जिल्लामा अचाक्ली बढ्यो गर्मी, दिउँसोमा घरबाहिर निस्कन कठिन

A+ A A-

कोशी प्रदेशका तराईका जिल्लामा पछिल्लो दुई सातायता अत्यधिक गर्मीका कारण दिउँसोको समयमा घरबाहिर निस्कन कठिन भएको छ ।

औसत तापक्रम ३९–४० डिग्री सेल्सियसको हाराहारीमा पुग्दा सर्वसाधारणले सास्ती खेप्नु परिरहेको छ । चर्को गर्मी र तातो हावा ‘लू’ चल्दा बाहिर काम गरेर जीविका चलाउनेहरूको दैनिकी झनै कष्टकर बन्दै गएको छ भने गर्मीकै कारण अस्पतालमा बिरामीको चाप पनि बढेको छ ।

अहिले तराईका जिल्लामा उखरमाउलो गर्मीको प्रभाव बालबालिकादेखि वृद्धवृद्धासम्मलाई परेको छ । गर्मी बढ्दै गएपछि शहर बजारमा मानिसको चहलपहलसमेत घट्न थालेको छ । वैशाखको पहिलो सातादेखि तापक्रम बढेको जल तथा मौसम विज्ञान विभागले जनाएको छ ।

नागरिक उड्डययन प्राधिकरणअन्तर्गत विराटनगर विमानस्थलस्थित जल तथा मौसम विज्ञान विभागका अनुसार पछिल्लोपटक वैशाख ११ गते अत्यधिक गर्मी महसुस भएको छ । विराटनगर विमानस्थलस्थित जल तथा मौसम विज्ञान विभागका कर्मचारी सञ्जय सोडारीले वैशाखकै पहिलो हप्तादेखि धेरै नै गर्मी भएको बताए ।

चैत–वैशाख महिना भनेको वसन्त ऋतुको महिना हो । यो महिनालाई जाडो र गर्मीको सन्तुलन अर्थात् अनुकूल वातावरण भएको महिना बताइन्छ । तर, जलवायु परिवर्तनका कारण उत्पन्न बेमौसमी गर्मीले जनजीवन प्रभावित तुल्याएको हो । जलवायु परिवर्तनका कारण वर्षेनि गर्मी बढ्दै गएको वातावरणविद् रामचन्द्र अधिकारीले बताए ।

सन् २०२३ सर्वाधिक गर्मी भएको वर्ष थियो र अब प्रत्येक वर्ष झन्–झन् गर्मी बढ्ने वातावरणविद्को भनाइ छ । साधारणतया प्रिमनसुनमा गर्मी बढी हुने भए पनि यसवर्ष वसन्त ऋतुमै गर्मी अत्यधिक बढेको बताए । जलवायु परिवर्तनको प्रभावका कारण गर्मी अत्यधिक बढेको उनले बताए ।

कोशी प्रदेशको राजधानी विराटनगरका अस्पतालमा यतिबेला गर्मीका कारण हुने स्वास्थ्य समस्या लिएर आउने बिरामीको भने संख्या ह्वात्तै बढेको छ । उखरमाउलो गर्मी र तातो हावा चल्दा थकाई लाग्ने, कमजोरी हुने, बढी तिर्खा लाग्ने, टाउको दुख्ने, खुट्टा बाउँडिने, बेहोस हुने, वान्ता हुनेलगायतका असर देखिने गर्छन् ।

तातो हावाबाट बच्न गर्मीको समयमा सकेसम्म घरमै बस्न स्वास्थ्यकर्मीले सुझाव दिएका छन् । गर्मीका कारण हुनसक्ने स्वास्थ्य समस्याबाट बच्न सतर्कता अपनाउनु पर्ने नोबेल मेडिकल कलेजका वरिष्ठ फिजिसियन सुरेन्द्र साहले बताए ।

गर्मीबाट जोगिन पानी तथा झोलिलो पदार्थ प्रशस्त मात्रामा पिउन, छाता र पानी लिएरमात्र घरबाहिर निस्किन सुझाव उनले दिए । १० वर्षभन्दा कम र ६० वर्षमाथिका मानिसमा बढी प्रभाव पर्ने बताए ।

प्रकाशित मिति: शनिबार, वैशाख १५, २०८१ १३:३०