पक्राउ परेको ११ दिनसम्म पनि सकिएन महराको बयान

A+ A A-

संसद् सचिवालयकी कर्मचारी रोशनी शाहीमाथि यौन दुर्व्यवहार गरेको आरोपमा पक्राउ परेका सभामुख कृष्णबहादुर महरालाई प्रहरीले अझै औपचारिक रूपमा बयान लिएको छैन ।

गत १९ असोजमा पक्राउ परेका महरालाई गत मंगलवार अनुसन्धानका लागि तीन दिन थुनामा राख्न अदालतले अनुमति दिएको थियो । पक्राउ परेको ११ दिन बितिसक्दा पनि महराको औपचारिक बयान अझै सुरू भएको छैन । प्रहरीले भने महरा बिरामी परेका कारण बयान लिन नसकिएको बताएको छ ।

अदालतले अनुसन्धानका लागि प्रहरीलाई दिएको म्याद सकिन अब एक दिन मात्र बाँकी छ । तर, काठमाडौं प्रहरीले उनको बयान भने नसकिएको जनाएको छ । प्रहरी स्रोतका अनुसार महराले रोशनी शाहीको कोठामा गएको प्रारम्भिक सोधपुछका क्रममा स्वीकार गरे पनि सम्पूर्ण बयान भने सकिएको छैन ।

‘हामीले सामान्य सोधपुछ गरेका छौं, रोशनी भेट्न गएको हो भनेर स्वीकार गर्नुभएको छ । बाँकी बिरामीका कारण सोधपुछकै क्रममा छौं,’ प्रहरी स्रोतले भन्यो ।

महरालाई काठमाडौं जिल्ला अदालतले मंगलबार थुनामै राखेर अनुसन्धान गर्न भन्दै १३ दिनको समय दिएको थियो । महरा १९ असोजमा बालुवाटारस्थित सभामुखको सरकारी निवासबाटै पक्राउ परेका थिए ।

अदालतले दिएको म्याद भोलि सकिँदै छ । प्रहरीका अनुसार उनलाई आइतबार अदालत पेश गर्ने जनाइएको छ । तर, उनको मुद्दा अदालतमा लिने वा फेरि म्याद थप्ने भन्नेबारे निर्णय भइनसकेको काठमाडौं प्रहरी परिसरका प्रमुख एसएसपी उत्तम सुवेदीको भनाइ छ ।

महराको स्वास्थ्यमा समस्या देखिएपछि नर्भिक अस्पतालमा उपचार भइरहेको छ । प्रहरीले रोशनीको कोठाबाट भेटिएको भनिएको चश्मा, रक्सीको बोतल लगायतका सामग्री बरामद गरेर फरेन्सिक चेकजाँचका लागि पठाएको प्रहरीले जनाएको छ ।

उक्त सामग्रीको कसको हो भनेर रिपोर्ट आइनसकेको एसएसपी उत्तम सुवेदीको भनाइ छ ।

प्रकाशित मिति: बिहीबार, असोज ३०, २०७६ १४:०५