आफ्नै मैदानमा दक्षिण अफ्रिकासँग किन घुँडा टेक्छ भारत ?

A+ A A-

भारत–दक्षिण अफ्रिकाबीच ३ टी–ट्वेन्टी सिरिजको पहिलो म्याच आइतबार धर्मशालामा सुरु हुँदै छ । दुई देशबीच भएको यो छैठौं टी–ट्वेन्टी सिरिज हुनेछ । पछिल्लो सिरिज दक्षिण अफ्रिकामा भएको थियो । त्यतिबेला भारतीय टोलीले २–१ ले सिरिज जितेको थियो ।

दुई देशबीच भारतीय मैदानमा भएको यो दोस्रो सिरिज हुने छ । यसअघि सन् २०१५ मा भएको तीन म्याचको सिरिज दक्षिण अफ्रिकाले २–० ले आफ्नो पक्षमा पारेको थियो ।

एक म्याच वर्षाका कारण रद्द भएको थियो । भारतीय टोलीले घरेलु मैदानमा अफ्रिकी टोलीविरुद्ध सिरिज त टाढैको कुरा भयो, एउटा म्याच पनि जित्न सकेन ।

दुई देशबीच पहिलो पटक सन् २००६ मा एक म्याचको सिरिज खेलाइएको थियो जुन भारतले जितेको थियो । भारतीय टिमको त्यो पहिलो टी–ट्वेन्टी अन्तर्राष्ट्रिय म्याच थियो । त्यसयता भारतले १ सय १८ टी–ट्वेन्टी खेलिसकेको छ । यस क्रममा उसले ७४ मा जित निकालेको छ भने ४१ मा हार बेहोरेको छ । ३ प्रतिस्पर्धा नतिजाबिहीन बनेका थिए ।

भारत १२ मध्ये ८ सिरिजमा विजयी

भारतीय टिमले पछिल्लो २ वर्षमा १२ सिरिजमा भाग लिएको छ । यसक्रममा उसले ८ सिरिज जितेको छ । भारतले निदाहास ट्रफीमा बंगलादेश र श्रीलंकालाई पराजित गर्यो । यसपछि श्रीलंका, वेस्टइन्डीज (२ पटक), न्युजिल्याण्ड, दक्षिण अफ्रिका, आयरल्याण्ड र इंग्ल्याण्डलाई जित्यो । अस्ट्रेलियाविरुद्धको दुई सिरिज ड्र भयो र एकमा भारतले हारको सामना गर्नुपर्यो । न्युजिल्याण्डको टिमले एक सिरिजमा भारतलाई पाखा लगाएको थियो ।

दक्षिण अफ्रिका ७ मध्ये ५ सिरिजमा विजयी

दक्षिण अफ्रिकी टोलीले पछिल्लो २ वर्षमा ७ सिरिज खेलेको छ । यस क्रममा उसले पाँचमा सफलता हात पारेको छ । दुई सिरिजमा उसले हार बेहोरेको थियो । दक्षिण अफ्रिकाले बंगलादेश, जिम्बाव्बे, पाकिस्तान, श्रीलंका र अस्ट्रेलियालाई हरायो । तर, भारत र श्रीलंकाविरुद्धको खेलमा भने हार्यो ।

दक्षिण अफ्रिकाको चुनौती रोहित शर्मा

रोहित शर्मा दक्षिण अफ्रिकाविरुद्ध सबैभन्दा बढी रन बनाउने भारतीय हुन् । उनले ११ म्याचमा ३७.८८ को औसातमा ३ सय ४१ रन बनाएका छन् ।

उनीपछि दोस्रो नम्बरमा सुरेश रैना छन् । उनले ११ म्याचमा ३३.९० को औसतमा ३ सय ३९ रन बनाएका छन् । अर्कोतिर, बलरमा रविचन्द्रन आश्विन दक्षिण अफ्रिकाविरुद्ध सबैभन्दा सफल रहने गरेका छन् । उनले ६ म्याचमा १० विकेट लिएका थिए । दोस्रो स्थानमा भुवनेश्वर कुमार छन् । उनको नाममा ६ म्याचमा ८ विकेट छ ।

जेपी गुमिनी भारतका चुनौती

दक्षिण अफ्रिकी ब्याट्सम्यानको कुरा गर्ने हो भने जेपी गुमिनी भारतविरुद्ध सबैभन्दा सफल मानिन्छन् । उनले १० म्याचमा २ सय ९६ रन बनाएका छन् ।

उनीपछि दोस्रो स्थानमा एबी डिभिलियर्स छन् । उनले ९ म्याचमा २ सय ८ रन बनाएका छन् । बलरतर्फबाट जुनियर डाला सबैभन्दा सफल साबित भएका छन् । उनले ३ प्रतिस्पर्धामा ७ विकेट लिएका छन् । ५ म्याचमा ६ विकेट लिएका क्रिस मोरिस दोस्रो स्थानमा छन् ।

प्रकाशित मिति: शनिबार, भदौ २८, २०७६ १८:२०