के हो कतार विश्वकप लोगोको अर्थ र महत्त्व ? (भिडियाेसहित)

A+ A A-

कतारमा हुने विश्वकप २०२२ को आधिकारीक लोगो सार्वजनिक भएको छ । कतारको राजधानी दोहामा स्थानीय समयअनुसार राति ८ बजेर २२ मिनेटमा नयाँ लोगो सार्वजनिक गरिएको थियो ।

कतारका बुर्ज दोहा, कतारा कल्चरल भिलेज एम्फिथिएटर, सौक वाकिफ र अल जुबारा फोर्टलगायत ठूला तथा महत्वपूर्ण बिल्डिङहरुमा एकैपटक प्रोजेक्सन गर्दै नयाँ लोगो सार्वजनिक गरिएको थियो ।

कतारका अलावा विश्वका विभिन्न देशका २४ मुख्य सहरहरुमा पनि सोही समयमा लोगो सार्वजनिक गरिएको थियो । लण्डन, पेरिस, योहानेसबर्ग, मेक्सिको सिटी, मुम्बई, सियोललगायत विभिन्न शहरका केन्द्रमा लोगो सार्वजनिक गरियो ।

मड्रिडको कल्लाओ स्क्वायरको ठूलो स्क्रिनमा लागो देखाइएको थियो भने मिलानको आर्को डेला पेसमा लोगोको प्रोमोसनल भिडियो देखाइएको थियो । यस्तै, रसियाको मस्कोस्थित न्यू अर्बट एभेन्यूको भव्य स्क्रिनमा पनि लागो सार्वजनिक भएको थियो ।

लोगोले के अर्थ र महत्त्व बोकेको छ ?

आयोजकका अनुसार लोगोको ‘कर्भ’ स्वरुपले कतारको मरुभूमिमा भएका ड्युन अर्थात बालुवाका ढिस्का बुझाउँछ भने ‘लुप’जस्तो देखिने आकारले अंक ८ र अनन्त (इन्फाइनाइट) बुझाउँछ । अंक ८ विश्वकपका खेल आयोजना हुने कतारका ८ वटा स्टेडियमको प्रतिक हो । यस्तै, इन्फाइनाइटको अर्थ प्रतियोगिताले असंख्य मान्छेहरुबिच स्थापित गरेको अन्तरसम्बन्ध हो ।

तर, लोगोको अर्थभन्दा पनि सार्वजनिक गरिएको समयको महत्व बढी छ । कतारले रातिको ८ बजेर २२ मिनेट अर्थात २०ः२२ मा लोगो सार्वजनिक गर्यो, जसले विश्वकप आयोजना हुने वर्ष अर्थात् सन् २०२२ को संकेत गर्छ ।

यस्तै, लागो सार्वजनिक भएको मिति ३ सेप्टेम्बर थियो । ब्रिटिस साम्राज्यबाट अलग्गिदै कतारले ३ सेप्टेम्बर, १९७१ मा स्वतन्त्र राष्ट्रको हैसियत पाएको थियो । मिडल इस्टमा पहिलोपटक विश्वकप आयोजना गर्न लागेको कतारले स्वतन्त्रता दिवसको अवसरमा आफुतर्फ विश्वको ध्यानाकर्षण गराएको हो ।

साथै, कैयौं विवाद र कठिनाईपछि कतारले विश्वकप आयोजना गर्ने अनुमति पाएको थियो । विश्वको ध्यान केन्द्रित हुने सो प्रतियोगिताको लागो सार्वजनिक गर्ने समय र माहोलको प्रवृत्तिले कतारलाई विश्वले हेर्ने नजरिया फेर्नुपर्ने समय आएको उद्घोष समेत गरेको छ ।