बागमती : १९ अर्ब लागत अनुमानको सुरुङमार्ग निर्माण गर्न ७५ करोड बजेट

A+ A A-

बागमती प्रदेश सरकारले गौरवको आयोजनाका रूपमा अघि सारेको पोष्टबहादुर बोगटी सुरुङमार्ग (भीमफेदी–कुलेखानी) सुरुङमार्ग निर्माण गर्न ७५ करोड रुपैयाँ बजेट छुट्याएको छ ।

सुरुङसहित पहुँचमार्ग र पुलसहितका संरचना निर्माण गर्न १९ अर्ब ३२ करोड रुपैयाँ लागत अनुमान रहेको उक्त सुरुङमार्गका लागि आगामी आर्थिक वर्ष २०७८/०७९ मा सरकारले ७५ करोड रुपैयाँ बजेट विनियोजन गरेको हो । संघीय सरकारको सहलगानीमा सुरुङमार्ग निर्माण कार्य सुरु गर्न बजेट छुट्याइएको आर्थिक मामिला तथा योजनामन्त्री कैलाश प्रसाद ढुंगेलले जानकारी दिए ।

सरकारले आर्थिक वर्ष २०७५/०७६ देखि सुरुङमार्गलाई बर्सेनि नीति तथा कार्यक्रममा राख्दै आएको छ । चालु आव २०७७/०७८ मा १ अर्ब रुपैयाँ बजेट विनियोजन गरिएको थियो । सरकार स्थापनाको ३ वर्ष नाघिसक्दासम्म सुरुङमार्गको सम्भाव्यता अध्ययन, संघीय सरकारसँग सहलगानीमा निर्माण गर्ने योजना र परामर्श दाता छनोटभन्दा बाहेकको काम भएको छैन । दुई वर्षअघि नै ग्लोबल टेण्डर गर्ने दाबी गर्दै आएको भौतिक पूर्वाधार विकास मन्त्रालयले हालसम्म पनि टेण्डर आह्वान गर्न सकेको छैन ।

बागमतीको प्रमुख प्रतिपक्ष दल नेकपा माओवादी केन्द्रले सुरुङमार्ग निर्माण समयमा हुन नसक्ने भन्दै उक्त योजना छाड्न सरकारलाई दबाब दिएको थियो । हेटौँडा–काठमाडौं जोड्ने सडक स्तरोन्नति र द्रतमार्ग निर्माणले गर्दा भीमफेदी–कुलेखानी सुरुङमार्गको कुनै औचित्य नरहेने माओवादी केन्द्रको भनाइ थियो । प्रदेश सरकार स्थापना भएदेखि नै मुख्यमन्त्री डोरमणि पौडेलले गौरवको आयोजनाका रूपमा भीमफेदी–कुलेखानी सुरुङमार्ग पाँचवर्ष भित्र निर्माण गरिसक्ने लक्ष्य लिएका थिए ।

मध्यपहाडी लोकमार्ग (मदन भण्डारी राजमार्ग)अन्तर्गत बनाउन लागिएको सुरुङमार्गका लागि अन्तर्राष्ट्रिय परामर्शदाता छनोट प्रक्रिया सकरे टेण्डरको तयारी अन्तिम चरणमा पुगेको मन्त्रालयको दाबी छ । तर, मन्त्रालय स्रोतका अनुसार ग्लोबल टेण्डरको टुंगो भने लागिसकेको छैन । भीमफेदी गाउँपालिका–६ को बगरबाट इन्द्रसरोवर गाउँपालिका–२ कुलेखानी ड्यामसम्म सुरुङमार्ग बन्नेछ । ३ दशमलव २ सय १७ किलोमिटर लम्बाइको सुरुङ मार्गमा ७–७ मिटर चौडाइका दुईवटा बनाउने योजना छ ।

सुरुङमार्ग बनेपछि हेटौँडादेखि काठमाडौंसम्मको दूरी ६५ किलोमिटरमा छोटिने छ । प्रदेश सरकारले भीमफेदी–कुलेखानी सुरुङमार्ग निर्माणका लागि अन्तर्राष्ट्रियस्तरका ६ वटा परामर्शदाता कम्पनीको छनोट गरिसकेको छ । १२ अन्तर्राष्ट्रियस्तरका कम्पनीले आशयपत्र दर्ता गराएकोमध्ये नेपालको फुलब्राइट कम्पनीसहित, कोरिया, टर्की, सिंगापुर र अस्ट्रेलियाका कम्पनी छनोटमा परेका थिए । सुरुङमार्ग आयोजना ४२ महिनामा सम्पन्न गर्ने लक्ष्य बागमती सरकारको थियो ।

सुरुङमार्गको प्रमुख संरचनाका रूपमा रहेका दुईवटा सुरुङ एकआपसमा ४० मिटरको फरकमा समानान्तर रूपमा निर्माण गरिने जनाइएको छ । सुरुङका दुवैतिर गरी साढे २ किमी लामो एप्रोच सडक, ७५ मिटर र ३५ मिटर लम्बाइ भएका दुईवटा पुल निर्माण हुनेछन् ।

सडक निर्माणमा उल्लेख्य बजेट

सरकारले मदन भण्डारीमार्गअन्तर्गत भैँसे–भीमफेदी–कुलेखानी–सिस्नेरी–दक्षिणकालीको कुल ५३ किलोमिटरमध्ये भैँसे–भीमफेदी ११ दशमलब ५० किलोमिटरको सडक खण्ड दुई लेनमा स्तरोन्नति गर्ने कार्य आगामी वर्षभित्र सम्पन्न गर्ने लक्ष्य लिएको छ ।

कुलेखानीदेखि दक्षिणकालीसम्मको सडक आगामी आर्थिक वर्षमा सम्पन्न गर्न र बाँकी २१ किलोमिटर सडकलाई दुई लेनमा स्तरोन्नति गर्न आवश्यक बजेट छुट्याएको जानकारी दिए । ‘प्रादेशिक लोकमार्ग’ कार्यक्रममा पुष्पलाल चक्रपथ अन्तर्गतका सडकहरूलाई प्राथमिकतामा राखेर कार्यान्वयन गरिने नीतिलाई निरन्तरता दिने उनले बताए । प्रादेशिक सडक आयोजना कार्यान्वयन गर्न एक अर्ब २९ करोड बजेट विनियोजन गरिएको ढुंगेलले जनाएका छन् ।

‘मुख्यमन्त्री प्रादेशिक सडक कार्यक्रम’अन्तर्गत प्रदेशको मुख्य आर्थिक तथा बजार केन्द्र, धार्मिक, ऐतिहासिक, पर्यटकीय, औद्योगिक तथा अन्य महत्त्वका स्थलहरू जोड्ने रणनीतिक सडक वा उपमार्ग (बाईपास) जस्ता आयोजनाहरूका लागि ३ अर्ब २५ करोड बजेट विनियोजन गरिएको आर्थिक मामिला मन्त्री ढुंगेलले जानकारी दिए । सरकारले बितेका ३ वर्षमा सडक र पुल निर्माणमा प्राथिमकताका साथ बजेट बिनियोजन गरेको थियो ।

प्रकाशित मिति: मंगलबार, असार १, २०७८ २०:०३