राष्ट्रिय महिला लिग : विराटनगर र वालिङको बराबरी, एपीएफले चन्द्रपुरलाई हरायो

राष्ट्रिय महिला लिग : विराटनगर र वालिङको बराबरी, एपीएफले चन्द्रपुरलाई हरायो

A+ A A-

राजधानीमा जारी राष्ट्रिय महिला लिग फुटबलमा वालिङ नगरपालिका स्याङ्जा र विराटनगर महानगरपालिका मोरङ बराबरी खेल्दा दिनको पहिलो खेलमा एपीएफले चन्द्रपुर नगरपालिका रौतहटलाई ६-० को फराकिलो अन्तरले हराएको छ ।

सातदोबाटोस्थित अखिल नेपाल फुटबल संघ (एन्फा) कम्प्लेक्समा बिहीबार भएको दोस्रो खेलमा वालिङ र विराटनगरले १-१ गोलको बराबरी खेले । प्रतिस्पर्धात्मक बनेको दिनको दोस्रो खेलमा वालिङले लिएको सुरुवाती अग्रतालाई दोस्रो हाफमा कायम राख्न नसक्दा अंक बाँडेको हो ।

वालिङले दोस्रो मिनेटमा नै सम्झना शर्माको हेड गोलबाट अग्रता लिएको थियो । तर, दोस्रो हाफमा विराटनगरले सुधारिएको खेल देखाउँदै खेलमा फर्किन सफल भएको थियो । विराटनगरकी आशा कुमारीले ६३औँ मिनेटमा फ्रिकिकबाट गोल गर्दै टोलीलाई हारबाट जोगाएकी थिइन् । त्यसपछि खेलमा फर्किन संघर्षरत वालिङ सुखद् नतिजाका लागि फर्किन प्रयास गरे पनि पाएका अवसर सदुपयोग गर्न सकेन ।

विराटनगरकी गोलकिपर कल्पना कार्कीले उत्कृष्ट बचाउ गर्दा वालिङ निराश भएको थियो । अंक बाँडेको वालिङले दोस्रो खेलमा वालिङले चौदण्डीगढी नगरपालिकासँग खेल्नेछ भने विराटनगरले एपीएफ क्लबको सामना गर्नेछ ।

यसअघि बिहीबारै सम्पन्न दिनको पहिलो खेलमा सावित्रा भण्डारीको ह्याट्रिकको मद्दतमा विभागीय टोली एपिएफले विजयी सुरुवात गर्‍यो । एपीफले चन्द्रपुर नगरपालिका रौतहटमाथि ६-० को फराकिलो जित निकाल्दै प्रतियोगितामा विजयी सुरुवात गरेको हो ।

राष्ट्रिय टोलीका खेलाडीको वर्चश्व रहेको एपीएफले मोफसलको टोली चन्द्रपुर नगरपालिकालाई दबाब राखेर खेल देखाएको थियो । एन्फाको मैदानमा एपीएफलाई जिताउन सावित्रा भण्डारीले ह्याट्रिक गर्दा कप्तान अनिता बस्नेत, अञ्जली कुमार योन्जन र प्रिति राईले एक/एक गोल आफ्नो नाममा लेखाए ।

अधिकांस समय बलमा पकड जमाएकी एपीएफका सावित्रा भण्डारीले १४औँ, ६२औँ र ७२औँ मिनेटमा गोल गर्दै ह्याट्रिक पूरा गर्दा २२औँ अञ्जली, ६४औँ मिनेटमा कप्तान अनिता र ८९औँ मिनेटमा पूजा राईले गोल गरेका थिए ।

सहज जित निकालेको एपीएफले स्पष्ट ३ अंक जोडेको छ । २१ माघसम्म सञ्चालन हुने महिला लिगमा तीन विभागीयसहित ७ टोलीको सहभागिता रहेको छ । प्रतियोगितामा शुक्रबार एन्फा कम्प्लेक्समा चौदण्डीगढी नगरपालिका उदयपुर र विभागीय टोली नेपाल पुलिस क्लबबीच प्रतिस्पर्धा हुनेछ ।

प्रकाशित मिति: बिहीबार, माघ ८, २०७७ १८:४८