ठमेलमा रेशम-रञ्जिता वार्ता: सरकार र संसदीय दल रञ्जिताले र पार्टी रेशमले चलाउने समझदारी

ठमेलमा रेशम-रञ्जिता वार्ता: सरकार र संसदीय दल रञ्जिताले र पार्टी रेशमले चलाउने समझदारी

A+ A A-

नागरिक उन्मुक्ति पार्टीभित्रको विवाद मत्थर हुने दिशातर्फ मोडिएको छ ।

शनिबार काठमाडौंको ठमेलमा नाउपाकी अध्यक्ष रञ्जिता श्रेष्ठ चौधरी र संरक्षक रेशम चौधरीबीच भएको छलफलमा पार्टी र सरकारका विषयमा विषयमा समझदारी जुटेको छ ।

नाउपाका महासचिव ठाकुरसिंह थारुले अध्यक्ष श्रेष्ठ र संरक्षक चौधरीबीच पार्टी र सरकारका विषयमा सहमति जुटेको बताए । उनले संरक्षक चौधरीले पार्टी चलाउने र अध्यक्ष श्रेष्ठले सरकार र संसदीय दल चलाउने समझदारी जुटेको बताए ।

'सरकार र संसदीय दल अध्यक्ष श्रेष्ठले चलाउनुहुन्छ । पार्टी रेशमले चलाउने गरी समझदारी बनेको छ । यसमा लिखित सहमति पनि हुन्छ,' थारुले भने ।

संरक्षक चौधरीले पनि पत्नीसमेत रहेकी अध्यक्ष श्रेष्ठसहितको फोटो फेसबुकमा राख्दै पार्टी र सरकार दुवै अध्यक्ष श्रेष्ठलाई चलाउन आग्रह गरेको उल्लेख गरेका छन् । संरक्षक चौधरीले आफ्नो पार्टीले लुम्बिनी र सुदूरपश्चिम प्रदेश सरकारलाई दिएको समर्थन फिर्ता लिने पनि बताएका छन् । उनले लेखेका छन्, 'हामी छिट्टै लुम्बिनी र सुदूरपश्चिम सरकारबाट समर्थन फिर्ता लिन्छौँ ।'

यो पनि: रञ्जितासहितको फोटो राख्दै रेशम चौधरीले लेखे- छिट्टै लुम्बिनी र सुदूरपश्चिम सरकारबाट समर्थन फिर्ता लिन्छौँ

यसअघि २१ फागुनमा केन्द्रमा सत्ता गठबन्धन परिवर्तन भएपछि सुदूरपश्चिम प्रदेश सरकारमा सहभागी हुने वा नहुने भन्ने विषयमा अध्यक्ष श्रेष्ठ र संरक्षक चौधरीबीच विवाद भएको थियो । विवाद चर्किँदै गएपछि अध्यक्ष श्रेष्ठले सुदूरपश्चिम प्रदेश सरकारमा सहभागी मन्त्रीलाई फिर्ता बोलाएकी थिइन् भने संरक्षक चौधरीले सरकारमै रहन निर्देशन दिएका थिए ।

विवादले उग्र रूप लिइरहेका बेला तत्कालीन कमल शाह नेतृत्वको सुदूरपश्चिम प्रदेश सरकारमा चौधरीनिकट पाँच जना नै सांसद मन्त्री बनेका थिए । पछि केन्द्रमा ३० फागुनमा प्रधानमन्त्री पुष्पकमल दाहाल प्रचण्डलाई विश्वासको मत दिने विषयमा पनि अध्यक्ष श्रेष्ठ र संरक्षक चौधरीबीच कुरा मिलेको थिएन । अध्यक्ष श्रेष्ठले प्रधानमन्त्री प्रचण्डलाई विश्वासको मत दिन ह्वीप जारी गरेकी थिइन् ।

ह्वीप जारी गरेपछि नाउपाका चार जना नै सांसदले प्रधानमन्त्री प्रचण्डलाई विश्वासको मत दिएका थिए । विवाद चर्किँदै गएपछि अध्यक्ष श्रेष्ठ र संरक्षक चौधरीबीचको विवाद सर्वोच्च अदालतसम्म पुगेको छ ।

प्रकाशित मिति: शनिबार, वैशाख १५, २०८१ १२:४३