रूपन्देहीमा गरिब पहिचानका लागि तथ्यांक संकलन गरिँदै

A+ A A-

रूपन्देहीमा गरिब घरपरिवार पहिचान गर्ने कार्य सुरु हुने भएको छ । संघीय भूमि व्यवस्था सहकारी तथा गरिबी निवारण मन्त्रालयअन्तर्गत जिल्लामा गरिब घरपरिबार पहिचानको कार्य सुरु हुने भएको हो । त्यसका लागि जिल्लामा गणक तथा सुपरिवेक्षक छनोट भई तालिमसमेत सम्पन्न भइसकेको छ ।

स्थानीय तहको प्रत्यक्ष निगरानीमा जिल्ला समन्वयन समितिमार्फत गरिब घरपरिवारको तथ्यांक संकलन गरिनेछ । जिल्लाका १६ वटै स्थानीय तहमा एकसाथ गरिब घरपरिवार पहिचानका लागि तथ्यांक संकलन गरिने जिल्ला समन्वयन समिति रूपन्देहीका प्रमुख एकराज विश्वकर्माले बताए ।

त्यसका लागि जिल्लामा गणक र सुपरिवेक्षक गरी १ सय ५५ जना नियुक्त भएका छन् । जसमध्ये सबैभन्दा बढी बुटवल उपमहानगरपालिकामा मात्र २७ गणक र ३ सुपरिवेक्षक रहेका छन् । गणकहरूले ५ महिनामा प्रत्येक घरमा पुगी मन्त्रालयको निर्देशिका बमोजिम गरिब घरपरिवारको तथ्यांक संकलन गर्ने उनले बताए ।

समन्वयन समितिले गणक र सुपरिवेक्षकका लागि छनोट भएका १ सय ५५ जनालाई १४ पुसदेखि ८ माघसम्म विभिन्न ६ वटा समूहमार्फत प्रशिक्षणसमेत दिएको छ । प्रशिक्षण प्राप्त गरेका गणक र सुपरिवेक्षकले सम्बन्धित पालिकाको निर्देशनमा घर–घरमा पुगेर तथ्यांक संकलन गर्ने जिल्ला समन्वय समिति रूपन्देहीका समन्वय अधिकारी रमाकान्त पाण्डेले बताए ।

गणकले प्रदेश, गाउँपालिका, घरपरिवारको परिचयात्मक विवरण, परिवारमूलीको विवरण, नाम, नागरिकता नं, आवास सम्बन्धी विवरण, पारिवारिक सम्पत्ती विवरणलगायत विषयमा सूचना संकलन गरिनेछ । त्यसको प्रशोधन गरी नतिजा प्रकाशन गरिनेछ । सर्भेक्षणपछि प्राप्त हुने परिणामका आधारमा गरिब वर्गको हितमा हुने गरी आयआर्जन, सीपमूलक, शिक्षा, स्वास्थ्य, बीमा, खाद्य सुरक्षा भत्तालगायत सामाजिक संरक्षणका कार्यक्रम मन्त्रालयबाट सञ्चालन गरिनेछ ।