काेराेनाबाट बौरिँदै खेलकुद : कतै अभ्यास खेल, कतै बन्द प्रशिक्षण

1575216340DSC_9125.jpg

A+ A A-

कोरोना भाइरस (कोभिड–१९) काे महामारीका कारण थला परेको खेलकुद जगत् आठ महिनापछि बौरिन लागेको छ । केही राष्ट्रिय स्पर्धा सुरु भएका छन् भने कतै अभ्यास खेल र बन्द प्रशिक्षण थालिएका छन् ।

कोरोना महामारीका कारण भएको लकडाउन खुलेपछि कात्तिककाे अन्तिम साता नेपाली राष्ट्रिय फुटबल टोलीले बंगलादेश गएर पहिलो पटक अन्तर्राष्ट्रिय अभ्यास खेल खेलेको थियो । दुईवटा अभ्यास खेल खेलेको फुटबल टोली स्वदेश फर्किइसकेको छ ।

त्यस्तै, ६ मंसिरमा छैटौँ धारा नेपालगञ्ज म्याराथन सम्पन्न भएको छ । कोरोना भाइरसको महामारीका कारण ठप्प भएको खेलकुदमा याे नै पहिलाे ठूलो घरेलु स्पर्धा हो । सोही म्याराथनलाई नेपाल ओलम्पिक कमिटी (एनओसी) ले ओलम्पिक छनोटका रूपमा समेत लिएको थियो ।

धारा नेपालगञ्ज म्याराथुनमा पुरुषतर्फ सशस्त्र प्रहरी बल (एपीएफ) का गोपीचन्द्र पार्की र महिला हाफ म्याराथनमा एपीएफकै पुष्पा भण्डारी च्याम्पियन बनेकी थिइन् । उपाधि जितेसँगै पार्कीले अर्को वर्ष जापानमा आयोजना हुने टोकियो ओलम्पिकको स्थान सुरक्षित गरेका छन् । २५ खेलाडीको सहभागिता रहेको म्याराथनमा पार्कीले २ घन्टा १८ मिनेट ५९ सकेन्डमा दौड पूरा गरेका थिए ।

एक दशक लामो माओवादी सशस्त्र द्वन्द्व अन्त्य गर्ने गरी सरकार र विद्रोही पक्षबीच ५ मंसिर २०६५ मा विस्तृत शान्ति सम्झौता भएको थियो । सोही शान्ति सम्झौताको स्मरण गर्दै द्वन्द्वको उद्गमस्थल तत्कालीन मध्यपश्चिम क्षेत्रको प्रमुख शहर नेपालगञ्जमा म्याराथन सञ्चालन हुँदै आएको छ ।

यसरी नै बिहीबारदेखि नेपाली क्रिकेट टिमको बन्द प्रशिक्षणसमेत सुरु भएको छ । राष्ट्रिय क्रिकेट टोलीले बन्द प्रशिक्षण सुरु गर्नुअघि गत मंगलबार सबै खेलाडीको कोरोना भाइरसको परीक्षणका लागि स्वाब संकलन गरिएको थियो ।

जसमध्ये कप्तान ज्ञानेन्द्र मल्ल, उपकप्तान दीपेन्द्र सिंह ऐरी, सन्दीप लामिछाने, रोहितकुमार पौडेल र स्टाफ प्रदीप लामालाई कोरोना संक्रमण देखिएको छ । कोरोना देखिएपछि उनीहरू भने हाल प्रशिक्षणमा सहभागी भएका छैनन् ।

उनीहरूबाहेक जगत टमाटा प्रशिक्षक रहेको बन्द प्रशिक्षणमा पूर्वकप्तान पारस खड्का, बसन्त रेग्मी, विनोद भण्डारी, शरद भेषवाकर, करण केसी, सोमपाल कामी, सुसन भारी, अविनाश बोहरा, सुवास खकुरेल, रोहितकुमार पौडेल, ललितनारायण राजवंशी, आरिफ शेख, भुवन कार्की, पवन सराफ, कुशल मल्ल, राशिद खान, कमलसिंह ऐरी, सन्दीप जोरा र किशोर महतो छन् ।

नेपाल क्रिकेट संघ क्यानका अनुसार, नेपालले विश्वकप लिग क्रिकेट दुईअन्तर्गत सन् २०२१ मा पाँच सिरिज खेल्ने तालिका छ । त्यसैको तयारीका लागि खेलाडीलाई बन्द प्रशिक्षणमा राखिएको हो । त्यस्तै, अन्य सामूहिक रूपमा नखेलिने खेलहरू मार्सल आर्ट जस्तै अरु खेलकुदका गतिविधि पनि विस्तारै सञ्चालनमा आएका छन् ।

तेक्वान्दो संघ बागमतीका अध्यक्ष केशव पुरी तेक्वान्दो खेलका गतिविधि केही मात्रामा सञ्चालनमा आइसकेकाे बताउँछन् । ‘हामीले कोरोना भाइरसबाट बाँच्ने आधारभूत मापदण्ड पूरा गरेर तालिम सञ्चानलमा ल्याइसकेका छौँ, राष्ट्रिय टोलीलाई नेपाली सेनाको क्याम्पमा राखेर तालिम सुरु गरिसकेका छौँ । अब बिस्तारै खेल लयमा फर्काउने कोसिस गर्दै छौँ,’ पुरीले भने ।

त्यसरी नै कराँते संघले पनि तालिम सञ्चालनमा ल्याएको छ । कोरोनाको त्रासभन्दा पहिलाको जस्तै अवस्था नभए पनि केही दिनयता कराँतेका तालिम नियमित रुपमा सञ्चानमा आएको कराते प्रशिक्षक चीन लामाले बताए । लामा कराते संघका केन्द्रीय सदस्यसमेत हुन् । खेलकुद परिषद्ले पनि कोरोना भाइरसको जोखिमबाट बच्ने आधाभूत मापदण्ड पूरा गरेर खेलकुद क्षेत्रलाई पहिलो अवस्थामै फर्काउन पहल भइरहेको राष्ट्रिय खेलकुद परिषद्का उपाध्यक्ष शिव कोइरालाले बताए ।

‘कोरोनाको त्रास छ भनेर अब पनि बसेर हुँदैन । सबै खेल संघहरूले आवश्यक तयारी पूरा गरेर खेलकुद गतिविधि अगाडि बढाउनुपर्छ । सबै खेलकुल गतिविधि पहिलाकै अवस्थामा फर्काउनैपर्छ,’ कोइरालाले भने ।

कोरोना भाइरसको महामारीका कारण खेलकुदसँगै व्यवसाय स्कुल, कलेज, मनोरञ्जन क्षेत्रका गतिविधि ठप्प प्रायः थिए । खेलकुद क्षेत्र बौरिन लागे पनि स्कुल, कलेज, सिनेमा हल अझै पूर्ण रूपमा सञ्चालनमा आउन सकेका छैनन् ।

प्रकाशित मिति: आइतबार, मंसिर १४, २०७७ १६:१०