कुलमान भन्छन् : प्रचार गरिस् भन्छन्, आफूचैँ मिडिया छल्दै हिँड्नुपर्‍या'छ

A+ A A-

नेपाल विद्युत् प्राधिकरणमा काम सुरु गरेको २६ वर्षपछि कार्यकारी निर्देशक कुलमान घिसिङ मंगलबार बिदा भएका छन् ।

उज्यालोको हिरोको उपमा पाएका कुलमान २०५१ सालमा सातौँ तहको इन्जिनियरबाट प्राधिकरणमा छिरेका थिए । आइतबार उनको कार्यकाल सकिँदा सरकारमाथि उनकै पुन: नियुक्तिको दबाब परेकाे थियाे । साेमबारकाे मन्त्रिपरिषदले यतातर्फ ध्यानै दिएन ।

कुलमानले २९ भदौ २०७३ मा कार्यकारी निर्देशकको नियुक्ति पाएका थिए । कार्यकालमा १८ घण्टा लामो लोडसेडिङ अन्त्य र ३४ अर्बको सञ्चित घाटाबाट ५ अर्बको नाफा उनको कार्यकालको उपलब्धि मानिएकाे छ ।

प्राधिकरण र जनताको हितमा मात्रै काम गरेको हुँ : कुलमान

कुलमानले बिदाइ हुने क्रममा आफूले आफ्नो स्वार्थ नहेरी काम गरेको बताएका छन् । 'मैले प्राधिकरणको हित हेरेर आफ्नै स्वार्थ नहेरी काम गरेको मात्रै हो,' उनले बिदाइका क्रममा भने ।

अहिलेको उपलब्धि आफूबाट मात्रै सम्भव नभएको भए पनि कतिपय कुराको अडान भने यथार्थ रहेको उनको भनाइ थियो । सही ठाउँमा सही व्यक्तिको प्रयोग गर्ने नीति आफूले लिएको उनले बताए ।

उनले आफ्नो काममा मिडियाले चासो दिए पनि आफू प्रचारक नरहेको बताए । 'प्राधिकरणको कामलाई मिडियाले चासोपूर्वक हरेको हो तर मैले प्रचार गरेको छैन,' उनले भने, 'ममाथिको आराेप धेरै प्रचारक भयो भन्ने छ । म त धेरै तारिफ नहोस् भनेर छल्दै हिँड्नुपरेको अवस्था छ ।'

उनले प्राधिकरण बुझेको मानिसलाई अबको कार्यकारी निर्देशक बनाउन सुझावसमेत दिए । 'मै आउनुपर्छ भन्ने भएन तर प्राधिकरण बुझेको व्यक्ति आए राम्राे हुन्थ्याे,' कुलमानले भने ।

उनले पछिल्लो समय गरिएको कामले प्राधिकरणको प्रतिष्ठा बढेको भन्दै सबैलाई खुसी हुन आग्रह गरे । 'विद्युत् प्राधिकरणको कार्यकारी निर्देशक आउँथ्यो जान्थ्यो, कसैलाई चासो हुँदैन थियो । अहिले यति धेरै चासो छ कि प्राधिकरणको इमेज नै बढेको छ,' घिसिङले भने ।

बिदाइका क्रममा कर्मचारीले दोस्रो कार्यकालको स्वागतको प्रतीक्षामा रहेको बताएका छन् । आधिकारिक ट्रेड युनियनको तर्फबाट कुरा राख्दै संयोजक रामेश्‍वर पौडेलले पहिलो कार्यकालको बिदाइ गरिएको बताएका हुन् ।

'हामीले पहिलो कार्यकालको बिदाइ मात्रै गरेका हौँ, दोस्रो कार्यकालको स्वागत गर्ने प्रतीक्षामा छौँ,' पौडेलले भने । उनले कुलमानको कार्यकालमा अभूतपूर्व काम भएको भन्दै प्रशंसा गरे । धेरै ठूला चुनौती सामना गरेको र आगामी दिनमा पनि केही चुनौती सामना गर्न आवश्‍यक रहेको उनले बताए ।

'चार वर्षअघि प्राधिकरण उठाउनका लागि केही चुनौती सामना गर्नुपर्छ गर्नुस्, हामी साथ दिन्छौँ भनेका थियौँ । उहाँले सामन गर्नुभयो, सफलता पनि हात लाग्यो,' पौडेलले भने ।

प्रकाशित मिति: मंगलबार, भदौ ३०, २०७७ २१:३६