कोसी अस्पतालमा मृत्यु भएका व्यक्तिको कोरोना रिपोर्ट नेगेटिभ

A+ A A-

विराटनगरस्थित कोसी अस्पतालको आइसोलेसनमा भर्ना हुने क्रममा मंगलबार बिहान मृत्यु भएका उदयपुरको बेलकाका बेदप्रसाद न्यौपानेलाई कोरोना संक्रमण नभएको पुष्टि भएको छ ।

श्वासप्रश्वासमा समस्या र ज्वरो आएपछि विराटनगरको विराट मेडिकल कलेजमा आएका उनलाई कोरोना संक्रमण भएको आशंकामा कलेजले भर्ना नलिएपछि कोशी अस्पताल आउँदा भर्ना हुनै नपाई उनको मृत्यु भएको थियो ।

मृत्युपछि स्वाब संकलन गरेर कोरोना परीक्षण गर्दा नेगेटिभ देखिएको कोशी अस्पतालका मेडिकल सुपरिन्टेन्डेन्ट डा.चुमनलाल दासले जानकारी दिए । बेलका नगरपालिका–१ का ५५ वर्षीय न्यौपानेको मंगलबार बिहान मृत्यु भएको थियो ।

ज्वरो आउने, रिङ्गटा चल्ने, वाकवाकी लाग्ने, श्वास फेर्न गाह्रो हुनेलगायत कोरोनासँग मिल्ने लक्षण देखिएकाले उनमा कोरोना भएको आशंका गरिएको थियो । उनको रिपोर्ट नगेटिभ आएर कोरोना संक्रमण नभएको पुष्टि भएपछि शव परिवारका सदस्यलाई जिम्मा लगाइएको अस्पतालले जनाएको छ ।

सोमबार दिउँसो कोशी अस्पतालमै विराटनगर– ५ घर भएका ७७ वर्षीय वृद्धको कोरोना संक्रमणका कारण मृत्यु भएको थियो । उनको शव मोरङको कानेपोखरी जंगलमा लगेर नेपाली सेनाको टोलीले व्यवस्थापन गरेको छ ।

कोरोनाबाट मृत्यु भएका वृद्धकी श्रीमतीको रिपोर्ट नेगेटिभ

यसैबीच, कोरोना संक्रमणबाट मृत्यु भएका वृद्धकी श्रीमतीको पनि कोरोना रिपोर्ट नेगेटिभ आएको छ । श्रीमानलाई लिएर अस्पताल आएकी ६८ वर्षीया महिलाको मंगलबार कोरोना जाँच गर्दा नेगेटिभ रिपोर्ट आएको हो ।

रिपोर्ट नेगेटिभ आएका कारण सुरक्षितसाथ ‘होम क्वारेन्टाइन’मा बस्ने गरी उनलाई पठाइएको अस्पतालले जनाएको छ । कोरोनाका कारण मृत्यु भएका वृद्धमा भने केही दिनदेखि छाती दुख्ने, श्वास फेर्न गाह्रो हुने र ज्वरो आउने समस्या थियो ।

प्रकाशित मिति: मंगलबार, साउन २०, २०७७ २३:१३