कर्णालीमा बाढीपहिरोबाट ४३ जनाको मृत्यु, ८ बेपत्ता, २८ घाइते

A+ A A-

बाढीपहिरोमा परी कर्णाली प्रदेशमा वैशाखदेखि १९ साउनदेखि ४३ जनाको मृत्यु भएको छ भने ८ जना बेपत्ता भएका छन् ।

यस्तै, बाढीपहिरोका कारण अन्य २८ जना घाइते घाइते भएका छन् । कर्णाली प्रदेश प्रहरी कार्यालयका अनुसार बाढी पहिरोका कारणले सयौं घरबारविहीन भएका छन् ।

बाढी पहिरोमा परेर सबैभन्दा बढी मानवीय क्षति कालीकोट जिल्लामा भएको र पहिरोको जोखिममा परेर जाजरकोटमा सबैभन्दा बढी विस्थापित भएको कर्णाली प्रदेश प्रहरी कार्यालयका प्रवक्ता तथा प्रहरी वरिष्ठ उपरीक्षक राजेशनाथ बाँस्तोलाले जानकारी दिए ।

‘कालीकोटमा बाढीपहिरोमा परेर २१ जनाको मृत्यु भएको छ भने ६ जना बेपत्ता र ९ जना घाइते भएका छन् । कालीकोटमा १३ घरमा पूर्ण क्षति र १ सय १५७ घरधुरी विस्थापित भएका छन्,’ उनले भने, ‘त्यसपछि जाजरकोट जिल्लामा १५ जनाको मृत्यु, २ जना बेपत्ता र ७ जना घाइते भएका छन् भने करिब ५५ घर पूर्ण रूपमा क्षति र करिब ४ सय घरधुरी विस्थापित भएका छन् ।’

कर्णाली प्रदेश प्रहरी कार्यालयका अनुसार बाढी पहिरोमा परी सुर्खेतमा १ जनाको मृत्यु भएको छ भने ५ घर पूर्ण क्षति, दैलेखमा १ जनाको मृत्यु, ६ जना घाइते, ११ घरमा पूर्ण क्षति, सल्यानमा १ जनाको मृत्यु र रुकुमपश्चिममा ४ जनाको मृत्यु, ६ जना घाइते, ६ वटा घरमा पूर्ण क्षति भएको छ ।

त्यस्तै, बाढीपहिरोका कारण हुम्लामा ३८ घरमा क्षति भएको र मुगुमा एउटा घरमा क्षति भएको कर्णाली प्रदेश प्रहरी कार्यालयले जनाएको छ ।

बाढी पहिरोका कारणले कर्णालीमा ३ करोड ६७ लाख ३९ हजार ७ सय ७१ रुपैयाँबराबरको धनमालको क्षति भएको प्रदेश प्रहरी कार्यालयले जनाएको छ ।

बाढीपहिरोमा परेर सुर्खेतमा ४५ लाख ७ हजार, दैलेखमा १७ लाख ९५ हजार, जाजरकोटमा ३२ लाख २७ हजार, कालीकोटमा ५६ लाख ५९ हजार ७ सय ७०, रुकुमपश्चिममा २९ लाख १ हजार, हुम्लामा १८ लाख ९८ हजार र मुगुमा ७० हजार रुपैयाँ बराबरको धनसम्पति क्षति भएको प्रवत्ता बाँस्तोलाले जानकारी दिए ।

प्रकाशित मिति: सोमबार, साउन १९, २०७७ २३:२९