३ दशकमा सिन्धुपाल्चोकका ४०७ ले गुमाए ज्यान, २० बेपत्ता

A+ A A-

बुधबार राति भोटेकोसी नदीमा आएको बाढीले बगाएर बाह्रबिसे नगरपालिका र भोटेकोसी गाउँपालिकामा २ जनाले ज्यान गुमाए । २० जना अझै बेपत्ता छन् भने बाढीले ३६ वटा घर बगायो । बुधबार रातिको घटनामा परेर ७ जना घाइते बने ।

सिन्धुपाल्चोक भएर बग्ने भोटेकोसी र सुनकोसीले सिन्धुपाल्चोकमा मच्चाएको यो वितण्डा पहिलो भने होइन । यी दुईवटा नदीका कारण सिन्धुपाल्चोकमा विगत ३ दशकको अवधिमा ४०७ जनाले ज्यान गुमाएका छन् भने २० जना बेपत्ता छन् । बेपत्ता २० जना भने बुधबारको बाढीपछिका हुन् ।

राष्ट्रिय विपद् जोखिम न्यूनीकरण तथा व्यवस्थापन प्राधिकरणको तथ्यांकअनुसार भोटेकोसी र सुनकोसीले सिन्धुपाल्चोकमा २०४० सालयता ठूला वितण्डा मच्चाउँदै आएका छन् ।

यसअघिको तथ्यांक यकिन नभए पनि प्राधिकरणसँग त्यसपछिका तथ्यांक भने छन् । २०४० सालमा सिन्धुपाल्चोकको फलामेसाँघुनजिकै रहेको बलेफी खोला केही समय थुनिएर अकस्मात् फुटेपछि ९७ जनाले ज्यान गुमाए भने १५ वटा घर बगायो ।

त्यसको ४ वर्षपछि सुनकोसी नदी थुनिँदा ९८ जनाले ज्यान गुमाए भने २ सय २९ वटा घर नै बगाइदियो ।सो बाढीले जलविद्युत आयोजनादेखि मुख्य राजमार्गमा समेत नराम्रो क्षति गरेको प्राधिकरणको भनाइ छ ।

२०५३ सालमा पनि सिन्धुपाल्चोकले बाढी र पहिरोकै कारण ठूलो क्षति ब्यहोर्नुपरेको थियो । त्यसबेला भोटेकोसी र स्थानीय लार्चाखोलाको बाढीले ५४ जनाको ज्यान लियो भने एउटा पक्की पुल र १८ वटा घर बगाएको थियो ।

सिन्धुपाल्चोकले ब्यहोरेको अर्को ठूलो क्षति २०७२ सालमा हो । जुरेमा आएको पहिरोले सुनकोसी नदी थुन्दा १ सय ४५ जनाले ज्यान गुमाए ।

१७ साउन २०७२ मा नदी थुनिएका कारण ३ किलाेमिटर लामो र ४७ मिटर गहिरो ताल नै बनेको थियो ।निकै लामो प्रयासपछि तालबाट विस्तारै पानी त निकालियो तर सो घटनामा १५५ वटा घर बगेका थिए भने दुई किलोमिटर सडकसमेत भत्किएको थियो ।

जलविद्युत आयोजनादेखि विद्यालयसम्ममा क्षति गरेको सो पहिराेका कारण कतिपयको लाससमेत भेटिएन ।

यो वर्ष अर्थात् २०७७ मा पनि सिन्धुपाल्चोकवासी यी दुई नदीका कारण दु:खित बन्नुपरेको छ ।

बुधबारको बाढी र पहिरोले २ जनाको ज्यान गइसकेको छ भने १६ जना बेपत्ता छन् । भोटेकोसीले बाह्रबिसे नगरपालिका र भोटेकोसी गाउँपालिकाका ठाउँठाउँमा मानवीय र भौतिक क्षति पुर्‍याएको छ । बेपत्ता भएकाहरूको खोजी कार्य अझै जारी छ ।

दैनिक परेको पानीका कारण नदीको बहाव बढ्दा र भौगोलिक बनावटका कारण जताततै पहिरो गइरहेका कारण सिन्धुपाल्चोकले अझै कति मानवीय र भौतिक क्षति ब्यहोर्नुपर्ने हो, यकिन भन्न नसकिने प्राधिकरणको भनाइ छ ।

स्थानीयदेखि राजनीतिक दल र जिल्ला विपद् व्यवस्थापन समितिसहितका निकाय राहत र उद्धारमा जुटे पनि प्राकृतिक प्रकोपले कुन ठाउँमा कतिबेला मानवीय र भौतिक क्षति गर्ने हो भन्ने त्रासमा छन् यतिबेला सिन्धुपाल्चोकवासी ।

प्रकाशित मिति: शुक्रबार, असार २६, २०७७ १२:२९