कोरोना कहर : सबैभन्दा सुरक्षित गोल घरका कैदी, नयाँ कैदीले क्वारेन्टाइनमा बस्नुपर्ने

कोरोना कहर : सबैभन्दा सुरक्षित गोल घरका कैदी, नयाँ कैदीले क्वारेन्टाइनमा बस्नुपर्ने

A+ A A-

कारागारभित्रको गोल घरमा राखिएका कैदी कोरोना भाइरस (कोभिड- १९)को त्रासबाट सबैभन्दा सुरक्षित रहेका छन् । कारागारभित्रकै कैदीहरूसँग समेत उनीहरूले भेटघाट गर्न नपाउने भएपछि गोल घरभित्रका कैदी कोरोनाको त्रासबाट सुरक्षित रहेको सुन्धारा कारागारका प्रमुख जेलर लक्ष्मी बाँस्कोटाले बताए ।

गोल घर देशभरमा सुन्धाराको जगन्नाथ देवल कारागारभित्र मात्र छ । उसो त सरकारले कोरोना भाइरस रोकथामका लागि भन्दै देश पूरै ‘लकडाउन’ गरेका कारण कारागारका कैदीहरू सुरक्षित रहनेमा कारागार प्रशाासन विश्ववस्त रहेको डिल्लीबजार कारागारका प्रमुख जेलर अरुण पोखरेलको भनाइ छ ।

‘देश लकडाउन छ । कारागारमा रहेका कैदीहरूका आफन्तलाई भेटघाटमा रोक लगाएका छौँ । बाहिर कसैमा भएको संक्रमण भित्र नफैलियोस् भनेर सचेत छौँ । भित्र साबुन-पानीले हात धुनेदेखि स्यानिटाइजर उपलब्ध गराएका छौँ । कैदीहरूमा कोरोनाको त्यस्तो त्रास छैन , पोखरेलले भने ।

कैदीहरूको नियमित स्वास्थ्य परीक्षण हुने पनि उनको भनाइ छ । त्यस्तै, नयाँ आउने कैदीलाई समेत स्वास्थ्य जाँच गरी आवश्यकताअनुसार कारागार परिसरमै क्वारेन्टाइनमा राखेर मात्र अन्य कैदीहरूको सम्पर्कमा राखिने पोखरेलले बताए ।

त्यस्तै, सुन्धारा कारागारमा कैद सजाय काट्न आउने नयाँ कैदीका लागि १ सय ५० शय्याको क्वारेन्टाइन बनाइएको जेलर लक्ष्मी बाँस्कोटाको भनाइ छ ।

‘यसबाहेक भित्रका कैदीलाई पनि हामीले २० वटा क्वारेन्टाइन बनाएका छौँ । भित्रका कैदीहरूको समय समयमा स्वास्थ्य जाँच हुन्छ । कसैमा उच्च ज्वारो देखिए क्वारेन्टाइनमा राख्ने व्यवस्था मिलाएका छौँ’, जेलर बाँस्कोटाले भने ।

उनका अनुसार बाहिरका मान्छेसँग सम्पर्क नगरे कोरोनाको त्रासबाट कैदी सुरक्षित हुने देखिएको छ ।

कोको छन् गोल घरमा ?

केन्द्रीय कारागार सुन्धाराको गोल घरभित्र ७ जना कैदी छन् । उनीहरूमध्ये १ जना तेस्रो लिंगी र ३ जना विदेशी नागरिक राखिएको जेलर बाँस्कोटाले बताए ।

यसरी गोल घरभित्र रहनेमा मोरङ उर्लाबारी- ४ का चूूूडामणि उप्रेती ‘गोरे’, नेपालगञ्ज- ३ बाँकेका अभिषेकराज सिंह, काठमाडौं बाफलका समीरमानसिंह बस्नेत, विदेशी नागरिकहरूमा फ्रान्सेली नागरिक चार्ल्स सोभराज, बेलायती नागरिक मुकदुर हुसेन र साउदी अरबका बाबरी सेभ छन् ।

गोरे ३३ किलो सुन काण्ड र सनम शाक्य हत्याका मुख्य अभियुक्त हुन् । उनको मुद्दा हाल जिल्ला अदालत मोरङमा विचाराधीन छ । उनी पुर्पक्षका लागि जेल चलान भएका हुन् ।

त्यसरी नै अभिषेकराज सिंह ‘सिरियल किलर’का रूपमा चिनिएका अपराधी हुन् । २०७० सालमा पक्राउ परेका उनीे धार्मिक आवरणमा विभिन्न अपराध गर्दै आएका थिए । उनीमाथि १८ जनाभन्दा बढी व्यक्तिको शृङ्खलाबद्ध हत्या गरेको अभियोग थियो ।

उनी ललितपुरको नख्खु कारागारमा जन्मकैदको सजाय भोगिरहेका थिए । तर, गत २० वैशाखमा नख्खु कारागारभित्रै भक्तबहादुर सुनारलाई खानामा केमिकल मिसाएर हत्या गरेपछि उनलाई केन्द्रीय कारागार सुन्धाराको गोल घरमा राखिएको छ ।

यसरी नै समीरमान बस्नेत गुण्डागर्दीमा संलग्न अभियुक्त हुन् । उनीमाथि निर्माण व्यवसायी शरदकुमार गौचनको हत्या अभियोग छ ।

विदेशी नागरिकहरू फ्रान्सका चार्ल्स सोभराज ‘विकिनी किलर’का नामले संसारभर चिनिएका कुख्यात अपराधी हुन् । सोभराज १४ वर्षअघिदेखि सुन्धारा कारागारमा जेल जीवन भुक्तान गरिरहेका छन् । उनीमाथि विभिन्न देशका नागरिक हत्या गरेको अभियोग छ ।

नेपाल घुम्न आएकी १ महिलाको हत्या अभियोगमा उनी हाल जन्मकैदको सजाय भोगिरहेका छन् । साउदी अरबका बाबरी सेभमाथि बाल यौनदुराचारको अभियोग छ ।

२ सय ८६ जना कैदी रिहा

७ चैतयता देशभरका कारागारबाट १ सय १२ जना कैदी र बाल सुधार गृहबाट १ सय ७४ गरी २ सय ८६ जना रिहा भएका छन् । उनीहरुलाई अदातलकै आदेशअनुसार छाडिएको कारागार व्यवस्थापन विभागका सूचना अधिकारी देवर्षि सापकोटाले बताए ।

‘देशभरका कारागारबाट २ सय ८४ जना कैदीले छुट्न निवेदन दिएका थिए, त्यसमध्ये १ सय १२ जना मात्र छुटेका छन् । अन्यको प्रक्रियामै छ भने कतिपयलाई जेलमै राख्न आदेश भएको छ , सापकोटाले भने ।

७ चैतमा सर्वोच्च अदालतको फुल बेन्चले १ वर्ष वा सोभन्दा कम कैद सुनाइएका कैदीबन्दीहरू मुलुकी फौजदारी कार्यविधि संहिता, २०७४ को दफा १५५ बमोजिम सम्बन्धित अदालतको आदेशले छुट्न आदेश गरेको थियो ।

सम्बन्धित समाचार