लकडाउन : प्रहरीको एउटा गल्ती, जसले सङ्गठन नै आलोचित बनायो

A+ A A-

आज सरकारले पहिलो चरणमा गरेको ‘लकडाउन’को अन्तिम दिन । ठीक १ साताअघि विश्वभर महामारीको रूपमा फैलिएको कोरोना भाइसर (कोभिड- १९) रोकथामका लागि भन्दै सरकारले ‘लकडाउन’ गरेको थियो । त्यो मंगलबार (आज)बाट सकिएको छ ।

तर, सरकारले त्यसलाई बढाएर आजबाटै लागूू हुने गरेर थप ८ दिनको दोस्रो चरणको ‘लकडाउन’ सुरु भएको छ । सरकारले गरेको यस निर्णयको आम जनसमुदायबाट स्वागत नै भएको छ ।

आम जनसमुदायको हित र सुरक्षाका लागि ‘लकडाउन’ अवधि अझै थप्नुपर्ने माग आम जनताकै थियो । त्यसैलाई मध्यनजर गरेर सरकारले ‘लकडाउन’ अवधि थप गरेको हो । आवश्यक परे यो अवधि अझै थप्ने सरकारको गृहकार्य छ ।

त्यसो त सरकारले अतिआवश्यक वस्तुका लागि प्रयोग हुने सवारी साधन र मानिसलाई निर्बाध रूपमा चल्न, हिँड्नसमेत अनुमति दिएको थियो । त्यसबाहेक उपत्यकामै हजारौँ सवारी साधन र मानिसले ‘लकडाउन’ उल्लङ्घन नगरेका भने होइन ।

यसरी ‘लकडाउन’ उल्लङ्घन गर्नेलाई प्रहरीले कानुनी कारबाही गरेर छाडिसकेको छ ।

सुरक्षाकर्मीको भूमिका

यो १ साताको ‘लकडाउन’ अवधिमा सुरक्षाकर्मीले खेलेको भूमिकालाई नजरअन्दाज गर्न मिल्दैन । मध्य चैतको उखरमाउलो गर्मीमा चौबीसै घण्टा सकडकमा उभिएर खटिनु सुरक्षाकर्मीका लागि कम सकसपूर्ण थिएन र छैन ।

उसो त, पानी र बिस्कुट मात्र होइन, आवश्यक पर्दा भोकभोकै भए पनि जनताको सुरक्षार्थ खटिनु सुरक्षाकर्मीको कर्म र धर्म नै हो । उपत्यकामा यसरी खटिएका सुरक्षाकर्मीलाई मानवीय भावले कतिले सहयोग नै गरेका थिए ।

पानी, खाजा र बिस्कुट बोकेर कतिपय दाताहरूले सुरक्षाकर्मीका लागि मानवीय धर्म निभाएकै हुन् । त्यसलाई पनि नजरअन्दाज गर्न मिल्दैन । अहिले सुरक्षाकर्मीको मनोबल घट्ने गरेर दाताहरूले सुरक्षाकर्मीलाई दिएको पानी र बिस्कुटको सेल्फी फोटो सामाजिक सञ्जालमा भाइरल बनाएको भन्दै प्रहरी प्रधान कार्यालयले दाताहरूले दिने त्यस्तो सहयोग नलिन निर्देशन नै दिएको छ ।

गृह मन्त्रालयले कोरोना भाइरस नियन्त्रणमा खटिएका सुरक्षाकर्मीलाई दैनिक हिसाबले तबलको ५० प्रतिशत भत्ता व्यवस्था गरेको छ । महामारीको बेला खटिने सुरक्षाकर्मीको मनोबल कमजोर नहोस् भनेर प्रहरी प्रधान कार्यालयको अनुरोधमा गृह मन्त्रालयले उक्त भत्ता उपलब्ध गराउने जनाएको हो ।

एक ठाउँमा चुक्दा...

यसरी ‘लकडाउन’का बेला सुरक्षा निकाय नेपाल प्रहरी र सशस्त्र प्रहरीले धेरै राम्रा काम गरेका छन् । कतिपय दैनिक मजदुरी गरेर खानेलाई राहतसम्म उपलब्ध गराएका छन् ।

कतिपय अलपत्र परेका यात्रुलाई गन्तव्यसम्म पुर्‍याउन सहयोगसमेत गरेका छन् । तराईको एउटा सडकमा एक जना वृद्धाले बोकेको खाना पकाउने ग्याँस साइकलबाट खसेको तस्वीर र त्यसलाई मिलाएर लैजान सहयोगी भूमिका खेलेकी एउटी महिला प्रहरीको व्यवहारले ती वृद्धाले बुझेको प्रहरीको परिभाषा नै बदलिदियो ।

त्यो अहिले सामाजिक सञ्जालमा भाइरल छ । उक्त फाेटाे नेपाल टाइमले खिचेकाे छ । उनलाई लागेको थियो, प्रहरीले लाठी मात्र हान्छन्, अझ यस्तो ‘लकडाउन’को बेला त के कुरा !’

तर, ती महिला प्रहरीको भूमिकाले उनको अनुहारमा चमक मात्र देखिएन, उनले प्रहरीलाई आजसम्म बुझेको परिभाषा नै बदलिदियो ।

त्यो ३ दिनअघिको तस्वीर थियो । उसो त ‘लकडाउन’ र अरू समयको जस्तो कर्फ्यू र आन्दोलन नभएका कारण सुरक्षाकर्मीले सडकमा आउनेलाई लाठी चार्ज गर्नै पर्ने जरुरी पनि छैन । यसको अर्थ सबै सडकमा आउने मानिस ठीक हुन् भन्ने होइन ।

तर, यसरी आउनेमध्ये कोही अतिआवश्यक कामले हिँडेका हुन सक्छन् भन्ने हेक्का सुरक्षाकर्मीले राख्नै पर्छ । सोमबार त्यही कुरा नबुझ्दा प्रहरी सङ्गठनको सामाजिक सञ्जालमा चर्को विरोध भइरहेको छ ।

२ दिनअघि एक जना महिला प्रहरीले तराईकी एक वृद्धाको प्रहरीलाई हेर्ने आँखा बदलिदिइन् । त्यसको २ दिनपछि अर्की महिला प्रहरीले त्यही प्रकृतिको घटनामा प्रहरी निर्दयी, मानवीय सम्वेदनाहीन हुन्छ भन्ने देखाइन् । सशस्त्र प्रहरी बलको पनि हालत यस्तै छ ।

भएको के थियो ?

सोमाबार बिहानबाटै एउटा फोटो सामाजिक सञ्जालमा भाइरल छ । उक्त फोटोमा एक जना युवा खाना पकाउने ग्याँस काँधमा राखेर उठबस गरिरहेका छन् । छेवैमा महिला प्रहरी ‘प्लेकार्ड’ बोकर उठबसको निर्देशन दिइरहेकी छन् ।

तस्वीर कुन ठाउँको हो, खुलेको छैन । त्यसरी नै नेपाल-भारत सीमा क्षेत्रमा रहेको भारतीय बजार लौकहाबाट औषधि किनेर घर फर्किने क्रममा २ युवालाई सशस्त्र प्रहरीले निर्घात कुटपिट गरेका थिए ।

लकडाउन उल्लङ्घन गरेको आरोपमा उनीहरूमाथि कुटपिट गरिएको हो ।

कुटपिटबाट बालन बिहुल गाउँपालिका- ३ मौवहा निवासी हरेकृष्ण साह र चन्द्र यादव घाइते भएका छन् ।

सशस्त्र प्रहरी बल नेपाल बोर्डर आउट पोस्ट रामनगर कोदरकट्टी प्रहरी टोलीले उनीहरूलाई बलान नदीमा रोकेर कुटपिट गरेको तस्वीर भाइरल भएको थियो ।

यसका कारण ‘लकडाउन’को अवधिमा सुरक्षाकर्मीले गरेको राम्रो काम पनि ओझेलमा परेको छ । उनीहरूमाथि कारबाही प्रक्रिया अघि बढेको प्रहरी प्रधान कार्यालयले जनाएको छ ।

उता, सशस्त्र प्रहरी बलले भने कुटपिटमा संलग्न सशस्त्र प्रहरी जवान मनोजकुमार चौधरीलाई निलम्बन नै गरेको छ ।

सम्बन्धित समाचार

प्रकाशित मिति: मंगलबार, चैत १८, २०७६ १२:३०