रेक्टरमा कांग्रेसले अयोग्य व्यक्तिको सिफारिस गरेपछि ...

A+ A A-

सरकारले त्रिभुवन विश्वविद्यालयको रेक्टरमा नियुक्त गर्न नसक्दा आगामी १ महिनापछि हुने भनिएको स्वतन्त्र विद्यार्थी युनियनको निर्वाचन प्रभावित हुने भएको छ ।

स्ववियु निर्वाचनको रेखदेख, अवलोकन, स्वीकृति र व्यवस्थापनको जिम्मेवारी त्रिभुवन विश्वविद्यालयका रेक्टरले लिने गरेका छन् । विश्वविद्यालयको उपकुलपतिमा धर्मकान्त बाँस्कोटा र शिक्षाध्यक्षमा पेशल दाहाललाई सरकारले नियुक्त गरे पनि रेक्टर पदमा कसैलाई पनि नियुक्त गरेको छैन ।

राजनीतिक भागबण्डाको आधारमा विश्वविद्यालयको उपकुलपति तथा अन्य पदाधिकारीको नियुक्ति गर्ने प्रचलन रहँदै आएको छ । यसअनुसार सत्तारुढ दल नेपाली कांग्रेसको भागमा परेको विश्विद्यालयको रेक्टर पदमा कांग्रेस सभापतिले अयोग्य व्यक्तिलाई सिफारिस गरेपछि सरकाले उक्त नामलाई अस्वीकार गरेको छ ।

सभापति शेरबहादुर देउवा निकटका प्राध्यापक वासुदेव घिमिरेलाई देउवाले रेक्टरका लागि सिफारिस गरेको बुझिएको छ । काठमाडौंको त्रिचन्द्र क्याम्पसमा नेपाली विषय पढाइरहेका प्राध्यापक घिमिरेले कुनै पनि विषयमा पीएचडी नगरेका कारण शिक्षा, विज्ञान तथा प्रविधि मन्त्रालयले उनलाई रेक्टरमा नियुक्त नगरेको हो ।

प्रमुख प्रतिपक्षी दल नेपाली कांग्रेसलाई घिमिरेको सट्टामा अरू प्राध्यापकको नाम सिफारिस गर्न देउवालाई शिक्षामन्त्री गिरिराजमणि पोख्रेलले आग्रह गरे पनि देउवाले मानेका छैनन् । लोकतन्त्रवादी प्राध्यापकहरूले पीएचडीसमेत गरेका व्यवस्थापनतर्फका प्राध्यापक महानन्द चालिसेलाई नियुक्ति गर्न अनौपचारिक आग्रह गरेको थियो ।

त्रिभुवन विश्वविद्यालयले आगामी १४ फागुनमा स्ववियुको निर्वाचन गर्ने घोषणा गरेको छ । निर्वाचन हुने १ महिनाअघि निर्वाचनको कार्यतालिका निकाल्ने प्रचलन छ । तर, रेक्टर नहुँदा के गर्ने भन्ने विषयमा उपकुलपति बाँस्कोटा पनि अन्योलमा छन् । उनले विश्वविद्यालयका कुलपति तथा प्रधानमन्त्री केपी शर्मा ओलीसँग सल्लाह गर्ने भएका छन् ।

त्रिविको रेक्टर नै स्ववियु निर्वाचनको केन्द्रीय आयुक्त हुने र उसैले हरेक क्याम्पसमा प्रमुख निर्वाचन आयुक्त तोक्ने तथा विवाद भएमा निर्णय दिने अधिकार छ । विपक्षी दल नेपाली कांग्रेसभित्र देखिएको विवादको प्रभाव भ्रातृ संस्था नेपाली कांग्रेसमा पनि परेको भन्दै कांग्रेसले स्ववियु निर्वाचनलाई टार्न खोजेको छ ।

नेविसंघका त्रिभुवन विश्वविद्यालय इकाई सभापति श्यामचन्द्र अधिकारी भने स्ववियु निर्वाचनका लागि नेविसंघ तयार रहेको दाबी गरे । उनले भने, ‘नेविसंघ स्ववियु निर्वाचनबाट पछि नहट्ने भन्दै रेक्टर नियुक्ति गर्न नसक्नु सरकारको कमजोरी भएको बताए ।

हाल कृषि तथा वन विज्ञान विश्वविद्यालय, मध्यपश्चिम विश्वविद्यालय, पोखरा विश्वविद्यालय, सुदूरपश्चिम विश्वविद्यालयमा उपकुलपतिसहित अन्य पदाधिकारी खाली छन् । पूर्वाञ्चल विश्वविद्यालय र नेपाल संस्कृत विश्वविद्यालयमा उपकुलपतिसहित सेवा आयोगको अध्यक्ष र सदस्य हाल खालि छ ।

पदाधिकारी नियुक्तिको विषयमा प्रमुख प्रतिपक्षी दल नेपाली कांग्रेसलाई पनि भाग चाहिने भन्दै कांग्रेस सभापति देउवाले प्रधानमन्त्री केपी शर्मा ओलीसँगको भेटमा जनाइसकेका छन् ।

केन्द्रीय सदस्य रमेश लेखकलाई लिएर ९ माघ बिहीबार प्रधानमन्त्री निवास बालुवाटार गएका थिए । पुष्पकमल दाहाललाई सँगै राखेर देउवासँग वार्ता गरेका प्रधानमन्त्री केपी ओलीले त्रिविमा पीएचडी गरेको प्राध्यापकको नाम सिफारिस गर्न भनेका थिए । देउवाले पार्टीका साथीसँग सल्लाह गरेर नाम दिने भने पनि पठाएका छैनन् ।

कांग्रेसले हरेक विश्वविद्यालयमा एउटा भए पनि पदाधिकारी दिनुपर्ने माग गरेका थिए । प्रधानमन्त्री ओलीले उपयुक्त व्यक्ति सिफारिस गरे सरकारले स्वीकार्ने तर योग्यता नपुगेका व्यक्तिको हकमा सिफारिस कार्यान्वयन नगर्ने बताइसकेका छन् ।

प्रकाशित मिति: मंगलबार, माघ १४, २०७६ १६:३५