हाई प्रोफाइल व्यक्तिका उजुरी खोतल्दै प्रहरी

A+ A A-

पूर्वसभामुख कृष्णबहादुर महरा र पूर्वमन्त्री तथा कांग्रेस सांदस मोहमद अफ्ताव आलम पक्राउपछि हौसिएको प्रहरीले हाई प्रोफाइल व्यक्तिका आपराधिक गतिविधिबारे अनुसन्धान गर्ने भएको छ ।

आपराधिक कार्यमा संलग्न भएकाहरू राजनीतिक आवरणमा राज्यका उच्च तहमा पुग्न थालेपछि प्रहरीले त्यस्ता व्यक्तिविरुद्धको उजुरी खोतल्न थालेको हो ।

प्रहरी प्रधान कार्यालयले आफूमातहतका सबै संयन्त्रलाई हाई प्रोफाइल व्यक्तिकाे विगतका गतिविधि र कुनै पनि प्रहरी कार्यालयमा उजुरी परे नपरेको बारे अनुसन्धान गरी जानकारी गराउन सर्कुलर गरेको छ ।

प्रहरी प्रधान कार्यालयको निर्देशनपछि जिल्ला प्रहरी कार्यालयहरूले उजुरीको ढड्डा पल्टाउन सुरु गरिसकेका छन् । हाई प्रोफाइलको विगतमा कुनै उजुरी परेको देखिए जुनसुकै हालतमा पनि कानुनी दायरामा ल्याइने प्रहरी प्रधान कार्यालयले जनाएको छ ।

१९ कात्तिकमा पक्राउ परेका पूर्वसभामुख कृष्णबहादुर महरा भने हाल पुर्पक्षका लागि जेल चलान भइसकेका छन् । उनीमाथि संसद् सचिवालयकी महिला कर्मचारी रोशनी शाहीमाथि बलात्कार प्रयास गरेको उभियोग छ । मुद्दाको अन्तिम किनारा भने लाग्न बाँकी छ ।

त्यस्तै, नेपाली कांग्रेस सांसद मोहमद अफ्ताव आलममाथि २०६४ मा जिउँदै इँटाभट्टामा हालेर जलाएको अभियोग छ । पहिलो संविधानसभा चुनावमा रौटहमा बम विस्फोटमा घाइते भएकाहरूलाई यसरी जलाइएको भनिएको छ ।

उनको हाल जिल्ला अदालत रौतहटमा थुनछेक बहस भइरहेको छ । प्रहरीले उनीमाथि हत्या, ज्यान मार्ने अद्योग, विस्फोटक पद्धार्थबारे मुद्दा चलाएको छ ।

हाई प्रोफाइल जुवाडे अझै हिरासतमै

१० कात्तिकमा महानगरीय प्रहरीवृत्त महाराजगञ्जको टोलीले २ करोड ६७ लाख नगदसहित पक्राउ गरेका २५ जना हाई प्रोफाइल जुवाडे अझै हिरासतमै छन् ।

महाराजगञ्ज पीपलमार्गस्थित विक्रम गौतमको घरमा जुवा खेलिरहेको अवस्थामा पक्राउ परेका उनीहरूलाई प्रहरीले पक्राउ गरेको थियो । ठूलो मात्रामा हारजित हुने गरी जुवा खेलिरहेको अवस्थामा कौडासहित उनीहरूलाई पक्राउ गरिएको थियो ।

पक्राउ पर्नेहरूमा बलराम सापकोटा, सीताराम खड्का, सोभित सिलवाल, प्रदीप बोगटी, रामकृष्ण केसी, श्रणकुमार गोयल, सुमन अग्रवाल, इन्दु श्रेष्ठ, रञ्जन राजवंशी, सुमन गुरुङ, रोशन तामाङ, राम तामाङ, कृष्ण भण्डारी, पवित्रकुमार कार्की, मुक्ति लामा, भक्त तामाङ, शम्भु बुढाथोकी, प्रेम थापामगर ,अशोक श्रेष्ठ, सुमन गुरुङ, सोहिल कार्की रहेका छन् ।

उनीहरूमध्ये केही ए क्लासका ठेकेदार, केही ठूला व्यवसायी रहेका छन् । पक्राउ परेको १० दिनपछि २५ कात्तिकमा जिल्ला प्रशासन कार्यालय काठमाडौंले ३० हजार धरौटीमा छोडेलगत्तै उनीहरू फेरि पक्राउ परेका हुन् ।

हाल उनीमाथि सम्पत्ति शुद्धीकरण अनुसन्धान विभागले अनुसन्धान गरिरहेको छ । मंगलबार विभागमा उपस्थित भएका उनीहरूको सम्पत्तिबारे विभागले अनुसन्धान थालिसकेको छ । उनीहरूमाथि अनुसन्धानका लागि आयोगले विशेष अदालतबाट २० दिनको म्याद लिएको छ ।

सम्पत्ति शुद्धीकरण अनुसन्धान विभागले तीन महिना थुनामा राखेर अनुसन्धान गर्न पाउने कानुनी व्यवस्था छ । विभागले २० दिन थुनामा राखेर अनुसन्धान गर्न म्याद पाएलगत्तै उनीहरू काठमाडौंका विभिन्न अस्पतालमा भर्ना भएर बसेका छन् ।

१० जना ललितपुरको जावलाखेलस्थित अल्का अस्पतालमा भर्ना भएको प्रहरीले जनाएको छ ।

प्रकाशित मिति: बिहीबार, कात्तिक २८, २०७६ १७:१५