मानसिक स्वास्थ्य समस्या भएका एक जनाको उद्धार

A+ A A-

मोरङको रतुवामाई नगरपालिकाबाट एक जना मानसिक स्वास्थ्य समस्या भएका व्यक्तिलाई उपचारका लागि विराटनगर ल्याइएको छ ।

रतुवामाई–८ का ४६ वर्षीय दिनेश तिम्सिनालाई प्रदेश–१ का सामाजिक विकास मन्त्री जीवन घिमिरेद्वारा उद्धार गरी उपचारका लागि विराटनगर लगिएको हो ।

विभिन्न कारणले सडकमा जीवन बिताइरहेकाहरूलाई उद्धार गरी उपचार गर्ने अभियानअन्तर्गत मन्त्रालयले तिम्सिनालाई ल्याएको मन्त्री घिमिरले बताए । मन्त्री घिमिरेसहितको टोली तिम्सिनाको घर पुगेको थियो ।

विभिन्न कारणले सडकमा बस्ने अवस्था आएकाहरूको उपचार गरी प्रदेश–१ लाई सडक मानवमुक्त प्रदेश बनाउने उनले प्रतिबद्धता दोहोर्‍याए । सडकमा मागी खाने र उपचार नपाएर छट्पटाइरहेकाहरूको अवस्था हुन नदिने अभियानअन्तर्गत उनलाई उद्धार गरिएको मन्त्री घिमिरेले बताए ।

करिब २९ वर्षदेखि मानसिक स्वास्थ्यको समस्या झेल्दै आएका तिम्सिनालाई स्वास्थ्य उपचार गर्न विराटनगर ल्याइएको मन्त्रालयको सामाजिक महाशाखा प्रमुख दुर्गा भण्डारी बरालले बताइन् ।

आवश्यक उपचारपछि उनलाई परिवारमै जिम्मा लगाइने बताइन् । तिम्सिनाको मानव सेवा आश्रम विराटनगरमा उपचार हुनेछ । तिम्सिनामा मानसिक स्वास्थ्य समस्यासँगै मनोसामाजिक समस्या देखिएको आश्रमका अध्यक्ष रामजी अधिकारीले बताए ।

पारिवारिक अवस्था सामान्य रहेका कारण समयमा उपचार गर्न लैजान नसकिएको रतुवामाई–८ का वडाध्यक्ष नन्दकुमार चापागाईंले बताए । सामाजिक विकास मन्त्रालयले मानसिक स्वास्थ्य समस्या भएकाहरुको उद्धार गरी उपचार सुरू गरेपछि मन्त्रालयसँग उपचारका लागि आग्रह गरिएको उनले जानकारी दिए ।

सामाजिक विकास मन्त्रालयले मानव सेवा आश्रमसँगको सहकार्यमा मानसिक स्वास्थ्य समस्या भएकाहरूको अहिले उद्धार गरिरहेको छ । हाल प्रदेश–१ का विभिन्न जिल्लाका ७ जनाको मानव सेवा आश्रममा उपचार भइरहेको छ ।

प्रकाशित मिति: सोमबार, कात्तिक २५, २०७६ ११:०१