आज दिनभर : आईसीसी वरीयतामा दीपेन्द्रकाे छलाङ, सुदूरपश्चिममा फेरि गडबडी (भिडियाे)

आज दिनभर : आईसीसी वरीयतामा दीपेन्द्रकाे छलाङ, सुदूरपश्चिममा फेरि गडबडी (भिडियाे)

A+ A A-

नेकपा एमालेका अध्यक्ष केपी शर्मा ओली १५ वैशाखमा हुने उपनिर्वाचनका लागि आफ्नाे पार्टीबाट उम्मेदवार बनेका सुहाङ नेम्वाङलाई जिताउन आफैँ इलाम–२ मा खटिएका छन् । उनले बुधबार चुनावी सभालाई सम्बाेधन गर्दै सुहाङलाई जिताउन आग्रह गरे ।

सुदूरपश्चिम प्रदेशमा संसदीय दलका नेता दीर्घबहादुर सोडारीको नेतृत्वमा सरकार गठन गर्ने नेकपा एकीकृत समाजवादीले औपचारिक निर्णय गरेकाे छ । एमालेले सोडारीलाई समर्थन नगर्ने बताइरहेकाे छ ।

मुख्यमन्त्री नियुक्ति विवादमा १० वैशाखमा सर्वोच्च अदालतमा सुनुवाइ हुनुअघि नै विश्वासको मत लिने गण्डकी प्रदेशका मुख्यमन्त्री खगराज अधिकारीले तयारी गरेका छन् । ७ वैशाखमा प्रदेशसभाको अधिवेशन बोलाउन प्रदेश प्रमुखलाई सिफारिस गरिएकाे छ । मुद्दा किनारा नलागी अधिवेशन बोलाउन लागेकोमा कांग्रेसले आपत्ति जनाएकाे छ ।

एकल जातीय चिन्तनबाट नेपालको शासन सत्ता चलिरहेको पूर्वउपप्रधानमन्त्री राजेन्द्र महतोले आरोप लगाएका छन् ।एकल जातीय पहिचानको कुराले जातीय सद्भावलाई खण्डन गर्ने एमाले उपाध्यक्ष रामबहादुर थापाको भनाइ छ ।

लगातार चुनाव बहिस्कारको पक्षमा उभिँदै आएको विप्लव नेतृत्वको नेकपाले २०८४ को निर्वाचनमा भाग लिने भएकाे छ । विद्यमान व्यवस्था अन्तर्गत हुने चुनाव पनि आन्दोलन र क्रान्तिकै मोर्चा भएको विप्लवको दाबी छ ।

जाहेरवालाको रकम फिर्ता गरेपछि सरकारी वकिलको कार्यालयद्वारा काठमाडौंस्थित नयाँ कृषि सहकारीको रकम हिनामिना प्रकरणको मुद्दा नचल्ने निर्णय भएकाे छ । पक्राउ परेका तीनै जना रिहा भएका छन् । रिहा भएकामध्ये अर्को सहकारी ठगीमा संलग्न भएको पाइएपछि लीलाबहादुर गुरुङ फेरि पक्राउ परे ।

सुरक्षाको कारण देखाउँदै रुसले मस्को पूर्वमा रहेका तीन शहरका विमानस्थलमा उडानमा अस्थायी प्रतिबन्ध लगाएकाे छ । कृत्रिम वर्षामा गडबडी हुँदा दुबईमा भीषण वर्षा भएकाे छ ।

साउदी अरबलाई हराउँदै नेपाल अपराजित रहँदै समूह विजेताका रूपमा एसीसी प्रिमियर कपको सेमिफाइनलमा प्रवेश भएकाे छ । दीपेन्द्रसिंह ऐरी टी–२० अलराउन्डरको वरीयतामा १४ स्थान सुधार गर्दै ११ औँ नम्बरमा आउन सफल भएका छन् । एसोसिएट राष्ट्रका खेलाडीतर्फ उनी पहिलो नम्बरमा छन् ।