उपचुनावको परिणामः नयाँ दलको परीक्षण, पुरानैको भरोसा

A+ A A-

प्रतिनिधिसभा र प्रदेशसभा सदस्य उपचुनावले केकपा (एमाले) लाई उत्साहित बनाएको छ । प्रतिनिधिसभा र प्रदेशसभा सदस्यको उपचुनाव भएका दुवै क्षेत्रमा एमालेले जित निकालेको छ ।

एमाले प्रमुख सचेतक महेश बर्तौला चुनावमा आफ्नो दलप्रति मतदाताले भरोसा देखाएको बताउँछन् । 'अन्य राजनीतिक पार्टीमा सङ्गठित व्यक्तिले पनि सूर्यलाई मत हालेको देखिन्छ । विचारका हिसाबले आफ्ना दलको नेतालाई मान्ने तर मुलुक सञ्चालनको जिम्मेवारीमा एमाले खोज्ने प्रवृत्ति मतदातामा देखियो । यो एमालेका लागि नयाँ जिम्मेवारी पनि हो,' बर्तौला भन्छन् ।

एमालेलाई पहिचानविरोधी भनेर केही व्यक्तिले लगाउँदै आएको आरोप अस्वीकृत भएको उनको भनाइ छ । पहिचानका नाममा अतिवादी प्रवृत्तिलाई समाप्त पारिएको जनाउँदै उनले जनताले युवालाई अनुमोदन गरेको स्पष्ट देखिएको बताए । विधायकको मुख्य भूमिका कानुन निर्माण भएकाले संसदमा कानुनी पृष्ठभूमिका प्रतिनिधिलाई नै जनताले रोजेका उनको प्रतिक्रिया छ ।

'प्राप्त मतभारबाट उत्साहित मात्र नभएर आफूप्रति गरिएको भरोसालाई डगमगाउन नदिई मुलुकलाई ‘सुखी नेपाली समृद्ध नेपाल’ निर्माणको राष्ट्रिय सङ्कल्पमा दृढ भएर अघि बढ्छौँ,' उनले भने ।

सत्तारुढ माओवादी केन्द्रका मुख्य सचेतक हितराज पाण्डेले उपनिर्वाचनबाट देशले राजनीतिक परिपक्वता खोजेको सङ्केत गरेको प्रतिक्रिया दिए । उनका अनुसार मुलुकलाई अघि बढाउन दुई/तीन आयाम छन् । 'अब सबै मिलेर काम गर्नुपर्छ । देशको समृद्धिका लागि मिलेर जाऔँ भन्ने सन्देश पाइएको छ । राजनीतिमा अघि बढ्न त्याग, समर्पण, परिपक्वता आवश्यक हुन्छ भन्ने सन्देश आयो,' उनले भने ।

कांग्रेस सचेतक सुशीला थिङले आफ्नो दलले निर्वाचनको परिणामलाई सकारात्मक रूपमा लिएको प्रतिक्रिया दिइन् । आफ्नो दल निर्वाचनमा पराजित भए पनि कांग्रेसप्रतिको जनताको भरोसा कायमै छ भन्ने देखिएको उनको तर्क छ ।

'निर्वाचनले एमाले र नेपाली कांग्रेसमै जनताको भरोसा छ भन्ने देखाएको छ । यसबाट नयाँ राजनीतिक दलको पनि परीक्षण भएको छ,' उनले भनिन् । आफ्ना मतदाता यथावत् रहेको र तिनले कांग्रेसलाई माया गरिरहेको जनाउँदै उनले अब पार्टी जनताका माझमा पुग्न र अलि बढी खट्नुपर्ने आवश्यकता महसुस भएको बताइन् ।

राष्ट्रिय स्वतन्त्र पार्टी (रास्वपा) का प्रमुख सचेतक सन्तोष परियारले उपनिर्वाचनले सङ्गठन विस्तार र पार्टी बनाउनका लागि जनतासँग लामो संवाद गर्न सन्देश दिएको प्रतिक्रिया दिए । 'पछिल्लो राजनीतिक परिवर्तनसँगै रास्वपाले जनसमर्थन पाउँछ भन्ने बुझाइ स्थापित गर्न अझ बढी काम गर्नुपर्ने देखियो । त्यो बाँकी काम यथाशीघ्र गरेर अघि बढ्न निर्वाचनबाट सन्देश मिलेको छ,' उनले भने ।

उपचुनावमा आएको मतमाथि विचारविमर्श र समीक्षा गर्ने ठाउँमा आफूहरूलाई पुर्‍याएको बताउँदै परियारले नतिजालाई सबै आयामले सोच्नुपर्छ भन्नेमा दलको आगामी बैठकमा छलफल हुने जानकारी दिए ।

प्रकाशित मिति: मंगलबार, वैशाख १८, २०८१ १३:०२