छानबिनबिनै सामग्री हटाउने आदेश संविधानविपरीत : पत्रकार महासंघ

A+ A A-

नेपाल पत्रकार महासंघले सिधा कुरा डटकम अनलाइन र युट्युब च्यानलको ‘द डार्क फाइल’ शृंखलामा प्रकाशित सामग्री हटाउने सर्वोच्च अदालतकाे पछिल्लो आदेशप्रति गम्भीर चासो देखाएकाे छ । महासंघले मंगलबार एक प्रेस विज्ञप्ति जारी गर्दै छानबिनबिनै सामग्री हटाउन आदेश दिनु संविधानविपरीत हुने भनेकाे छ ।

सर्वाेच्च अदालतले साेमबार मुद्दाकाे अन्तिम निर्णय नभएसम्म कार्यक्रम उत्पादन, प्रसारण, पुनः प्रसारणलगायत सार्वजनिक गर्ने कुनै कार्य नगर्न/नगराउन र प्रसारित सामग्री पनि हटाउन आदेश दिएकाे थियाे ।

'छानबिनबिना सामग्री हटाउने आदेश संविधानको भावनासँग बाझिने हाम्रो ठम्याइ छ,' महासंघका महासचिव रोसन पुरीद्वारा हस्ताक्षरित विज्ञप्तिमा उल्लेख छ ।

'नेपालको संविधानले पूर्ण प्रेस स्वतन्त्रताको प्रत्याभूत गर्दै कुनै पनि सामग्री प्रकाशनपूर्व प्रतिबन्ध लगाउन नपाइने व्यवस्था गरेको छ । यो संवैधानिक व्यवस्थाका आधारमा नेपालको प्रेस तथा सम्पादकीय स्वतन्त्रताको फराकिलो परिधिलाई कुनै पनि निकायको आदेश तथा निर्देशनले सीमित गर्न सक्दैन र गर्न पनि हुँदैन भन्ने कुरामा नेपाल पत्रकार महासंघ प्रस्ट छ,' विज्ञप्तिमा उल्लेख छ ।

प्रचलित विधि र अभ्यासलाई बेवास्ता गरेर सञ्चार सामग्री प्रवाह गरेकै विषयमा फौजदारी कानुन आकर्षित गरिनुले त्यस आधारमा मनसाय जोकोहीबाट पनि प्रकट हुनु सर्वथा गलत रहेकाे महासंघकाे धारणा छ । यसले प्रेस स्वतन्त्रतामाथि निरन्तर हमला गर्ने गम्भीर खतरा निम्त्याउन सक्नेतर्फ सचेत हुन जरुरी रहेकाे पनि महासंघकाे विज्ञप्तिमा उल्लेख छ ।

'सञ्चारमाध्यममा प्रकाशित/प्रसारित सामग्रीको नियमनको दायित्व प्रेस काउन्सिलको हुनुपर्छ र प्रेस काउन्सिलले यो दायित्व जस्तोसुकै अवस्थामा पनि गम्भीरतापूर्वक निर्वाह गर्नुपर्छ भन्नेमा पत्रकार महासंघको स्पष्ट धारणा छ,' विज्ञप्तिमा अगाडि भनिएकाे छ,' 'सिधा कुरा डटकममा प्रकाशित सामग्रीको विषयमा सम्मानित सर्वोच्च अदालतमा प्रवेश गरिसकेको भए पनि नेपालको संविधानको मर्म, प्रेस स्वतन्त्रताको प्रचलित मान्यता र अभ्यास तथा सम्पादकीय स्वतन्त्रताको प्रवर्द्धनमा कुनै पनि आँच नआउने गरी यो विषयको निरुपण हुनुपर्नेमा महासंघले दृढ छ ।'

कुनै सञ्चारमाध्यममा प्रकाशित सामग्रीको सन्दर्भमा त्यसको सम्पूर्ण जिम्मेवारी तथा त्यो सामग्रीमा कुनै प्रश्न उठेमा त्यसको सत्य/तथ्य पुष्टि गर्ने दायित्व सम्बन्धित सञ्चारमाध्यमकै हुने उल्लेख गर्दै महासंघले सिधा कुरा डटकमलाई पनि पत्रकार आचारसंहिताकाे पूर्ण पालना गर्न आग्रह गरेकाे छ ।