कोशी प्रदेश नामकरण ठीक छ भन्ने एमालेको एजेन्डा उपनिर्वाचनमार्फत अनुमोदन भयाे : विष्णु रिमाल

कोशी प्रदेश नामकरण ठीक छ भन्ने एमालेको एजेन्डा उपनिर्वाचनमार्फत अनुमोदन भयाे : विष्णु रिमाल

A+ A A-

नेकपा एमालेका उपमहासचिव विष्णु रिमालले उपनिर्वाचनले आफ्नो पार्टी नेपाली जनताको सबैभन्दा भरपर्दो शक्ति भएको सन्देश दिएको बताएका छन् । इलाम क्षेत्र नम्बर २ र बझाङ प्रदेश सभा १ को उपनिर्वाचनमा एमाले उम्मेदवार विजयी भएलगत्तै उनले यस्ताे प्रतिक्रिया दिएका हुन् ।

मंगलबार अपराह्न पार्टी मुख्यालय च्यासलमा न्युज एजेन्सी नेपालसँगको संक्षिप्त कुराकानीमा उपमहासचिव रिमालले कोशी प्रदेश नामकरणको सन्दर्भमा पनि एमालेले लिएको अडानलाई जनताले अनुमोदन गरेको तर्क गरे । कोशी प्रदेशको नामकरण गलत भन्नेहरू, त्यस सन्दर्भमा चपाएर बोल्नेहरू उपनिर्वाचनमा हारेको र कोशी प्रदेश नामकरण ठीक छ भन्ने एमालेको एजेन्डालाई उपनिर्वाचनमार्फत जनताले अनुमोदन गरेको उनको भनाइ थियो ।

उपमहासचिव रिमालले उपनिर्वाचनको मत परिणाम सहज र उत्साहजनक रूपमा आएको उल्लेख गर्दै एमालेले भन्दै आएको एजेन्डाको आधारमा दलहरूलाई जनताले चुन्न पाउनुपर्छ भन्ने अडान पनि उपनिर्वाचनले सही छ भन्ने सन्देश दिएको जिकिर गरे । उनले उपनिर्वाचनले सुदूरपश्चिम प्रदेश सरकार स्थिर हुने सम्भावना बढेर गएको र पूर्वमा एकल जातीय पहिचानको अर्थहीन बहस र विवाद अन्त्य हुने अवस्था आएको बताए ।

उपमहासचिव रिमालले कांग्रेस र एमालेबीच तत्काल सत्ता सहकार्य हुने सम्भावना नरहेको बताए । उनले एमालेले चाहने हाे भने शेरबहादुर देउवा प्रधानमन्त्री हुने भए पनि त्यसो गर्न जरुरी नरहेको बताए । उपमहासचिव रिमालले एमाले वर्तमान सत्ता समीकरणलाई पूरै कार्यकाल कामयै राखेर अघि बढ्न लागिपर्ने बताए ।

प्रकाशित मिति: मंगलबार, वैशाख १८, २०८१ १४:१२