अभियुक्त पक्रिन नेपाल प्रहरीले गुहार्‍याे इन्टरपोल

A+ A A-

गएको शनिबार विभिन्न बैंकका एटीएम बुथ ह्याक गरेर २ करोडभन्दा बढी रकम चोरी गर्ने चिनियाँ ह्याकर समूहका ६ जना पक्राउ परे पनि दुई जना अझै फरार छन् ।

फरार रहेका ती दुई जनालाई घटना भएको पाँच दिन बितिसक्दासमेत पक्राउ गर्न नसकेपछि उनीहरूको खोजीका लागि नेपाल प्रहरीले प्रहरीको अन्तर्राष्ट्रिय सञ्जाल इन्टरपोललाई पत्राचार गर्ने भएको हो ।

पाँच दिनसम्म खोजी गर्दासमेत पक्राउ पर्न नसकेपछि कतै नेपाल बाहिर गए कि भन्ने आशंकामा फरार अभियुक्तबारे इन्टरपोललाई पत्राचार गर्न लागिएको काठमाडौं परिसरका प्रवक्ता डीएसपी होविन्द्र बोगटीले बताए ।

प्रहरीको इन्टरपोल शाखा प्रमुख एवं निमित्त प्रहरी प्रवक्ता एसएसपी उमेशराज जोशीका अनुसार काठमाडौं प्रहरी परिसरको पत्र आउनासाथ इन्टरपोललाई जानकारी गराइने बताए ।

१ सय ९४ देश सदस्य राष्ट्र रहेको प्रहरीको अन्तराष्ट्रिय सञ्जाल इन्टरपोललाई पत्राचार भएपछि उनीहरूलाई जुनसुकै देशको प्रहरीले पनि पक्राउ गर्र्नुपर्ने हुन्छ । चीनसमेत इन्टरपोल सदस्य राष्ट्र हो ।

गत शुक्रबार नेपाल आएर शनिबार एटीएम बुथबाट पैसा चोरी गरी सोमबार चीन फर्किने योजना बनाएको ह्याकर समूहका पाँच जना शनिबार राति नै र एक जना भाग्दाभाग्दै त्रिभुवन अन्तर्राष्ट्रिय विमानस्थलबाट आइतबार पक्राउ परेका थिए ।

पक्राउ पर्नेहरूमा लिओ जाइलेई, सु लायङगाङ, क्यु युनक्विङ, चिनियाँ मूलका फ्रान्सेली नागरिक छु लुई, लिन जैनमेङ बिनबिन रहेका छन् । यस्तै, एटीएमबाट पैसा चोरी गरी फरार रहेका दुई जना चिनियाँ नागरिकको अवैध रकम साट्ने मनी एक्सचेन्जका सञ्चालक देवनाथ लामिछाने, म्यानेजर रेवती दवाडी र रोशन प्रधान श्रेष्ठ पनि पक्राउ परेका छन् ।

राष्ट्र बैंकले प्रहरीलाई दिएको जानकारीअनुसार नेपाल इलेक्ट्रोनिक पेमेन्ट सिष्टम (नेप्स) र अमेरिकाको भिसा सिष्टमको बीचमा छुट्टै सर्भर बनाएर ह्याकरहरूले एटीएमबाट पैसा निकाल्न सफल भएको डीएसपी होविन्द्र बोगटीले बताए । पक्राउ परेका माथि हाल काठमाडौैं प्रहरीले अनुसन्धान गरिरहेको छ ।

‘उनीहरूले कसरी ह्याक गरे, कताबाट ह्याक गरे, त्यसबारे केही बोल्न नमान्दा अनुसन्धान गर्न असहज भएको छ,’ डीएसपी बोगटीले भने ।

तातोपानी र रसुवा नाकामा सर्कुलर

फरार अभियुक्त स्थलमार्ग हुँदै चीन भाग्ने खतरा रहेको भन्दै प्रहरीले चीनसँग नाका जोडिएका तातोपानी र रसुवा नाकामा सर्कुलर जारी गरेको छ । फरार दुई जना चिनियाँ नागरिक हवाईमार्गबाट जाँदा पक्राउ पर्ने डरले स्थलमार्गको बाटो प्रयोग गर्दै चीन जानसक्ने भन्दै प्रहरीले नाकामा उच्च शतर्कता अपनाउन सर्कुलर जारी गरेको हो ।

काठमाडौं प्रहरीका अनुसार फरार रहेका दुवै जनाको फोटोसहित रसुवा नाका र तातोपानी नाकामा रहेका प्रहरी टोलीलाई पक्राउका लागि निर्देशन भइसकेको छ । नाका आवतजावत गर्ने चिनियाँ नागरिकमाथि प्रहरीले विशेष निगरानी बढाएको छ ।

ठमेलमा बस्ने चिनियाँ पनि निगरानीमा

केही दिनअघिबाट विभिन्न आपराधिक गतिविधिमा चिनियाँ नागरिक धमाधम पक्राउ पर्न थालेपछि प्रहरीले चिनियाँ नागरिकको गतिविधिलाई निगरानीमा राखेको छ ।

फरार रहेका दुई जनासमेत ठमेल क्षेत्रमा लुकेको हुन सक्ने भन्दै काठमाडौं प्रहरीले चिनियाँ नागरिक बस्दै आएका ठमेलका विभिन्न होटलहरूमा सर्च अभियान शनिबार देखि नै तीव्र पारेको छ ।

यस्तै, विभिन्न जडीबुटीको व्यापारका लागि काठमाडौं आएर लामो समयसम्म बसेका चिनियाँ नागरिकको गतिविधिसमेत निगरानीमा रहेको प्रहरीले जनाएको छ । मुख्यतः वैशाख महिनादेखि सिजन शुरू भएको बहुमूल्य जडीबुटी यार्सागुम्बाको व्यापारका लागि चिनियाँहरू ठमेल क्षेत्रमा लामो समयसम्म बस्दै आएका छन् ।

प्रकाशित मिति: बिहीबार, भदौ १९, २०७६ २३:५४