कांग्रेस संसदीय दलको चुनावले शेखर-गगन समूह विभाजनको संघारमा

A+ A A-

नेपाली कांग्रेसको १४औँ महाधिवेशन अगाडि एकजुट भएर महाधिवेशनमा शेरबहादुर देउवासँग प्रतिस्पर्धा गर्ने बताएको देउवा इतर समूह अन्तिममा छिन्नभिन्न भयो । इतर समूहकै प्रकाशमान सिंह र डा. शेखर कोइराला सभापतिको उम्मेदवार बने भने वरिष्ठ नेता रामचन्द्र पौडेल देउवासँग नजिकिए । अहिले संसदीय दलको चुनाव हुने बेला फेरि त्यस्तै दृष्य देखिएको छ ।

एउटै समूहमा रहेर देउवासँग प्रतिस्पर्धा गरेका डा. शेखर कोइराला र महामन्त्री गगन थापा दुवैले संसदीय दलको नेताकाे उम्मेदवार बन्ने बताउँदा शेखर-गगन समूह भत्किने अवस्थामा पुगेको हो । अंक गणितले देउवा स्पष्ट बहुमतमा छन् भने शेखर-गगन समूह कमजोर छ । त्यसमाथि यो समूह विभाजन हुने सम्भावना बढेपछि देउवालाई सहज भएको छ । यद्यपि शेखर-गगन समूहका केही नेताहरू भने समूह विभाजन नहुने एकै जना मात्र उम्मेदवार हुने बताउँछन् ।

चुनावअघि नै प्रधानमन्त्रीमा दाबी गर्ने भनेर प्रचारमा गएका महामन्त्री गगन थापा जनताबाट अनुमोदन भए । प्रधानमन्त्रीमा दाबी रहने कुरा सन्देश दिए पनि चर्को प्रचार नगरी चुनावमा गएका कोइरालाले पनि चुनाव जिते ।

संसदीय दलको नेताको चुनावमा एक जनामात्रै उम्मेदवार बन्ने भनिए पनि अन्तत: साझा व्यक्ति चयन गर्न इतर समूहलाई गाह्रो हुने देखिएकाे छ । मोरङबाट चुनाव जितेर काठमाडौं आउन्जेलसम्म कोइराला संसदीय दलको नेतामा महामन्त्री थापालाई छाड्न तयार थिए । तर, नेता मीनेन्द्र रिजालले संसदीय दलमा नउठ्ने मनस्थितिमा रहेका कोइरालाई उम्मेदवार हुन मनाएका छन् ।

‘पहिला शेखर दाइ गगनजीलाई छाड्न तयार हुनुहुन्थ्यो । तर, मीनेन्द्र दाइले नछोड्ने बनाउनुभएछ,’ इतर समूहका एक नेताले शिलापत्रसँग भने, ‘उहाँहरू एकै जिल्ला भएर होला । राजनीतिको अन्य पक्षमा प्रभाव पार्ने भएकाले पनि हुनसक्छ । अहिले डा. साब पनि उठ्ने मनस्थितिमा हुनुहुन्छ ।’

इतर समूहका नेताहरू भने आफ्नो समूहमा एक मात्र उम्मेदवार होउन् र एकताको सन्देश बलियो रूपमा जाओस् भन्ने चाहन्छन् । ‘म हिजो तलबाट टिम भएर आएको हो । टिम एक भएर जानुपर्छ भन्ने पक्षमा छु,’ इतर समूहका नेता तथा सांसद दिक्पाल शाहीले शिलापत्रसँग भने ।

पार्टीभित्र छलफल हुन बाँकी रहेकाले समय आउँदासम्म सहमति हुने र समूहबाट एक मात्र उम्मेदवार हुने नेता सञ्जय गौतम बताउँछन् । ‘समय बाँकी छ । जो भए पनि एक मात्र उम्मेदवार हुने हो । त्यसमा हाम्रो प्रयास हुन्छ,’ गौतमले शिलापत्रसँग भने ।

संसदीय दलमा इतर समूहबाट एक जना मात्र उम्मेदवार बन्ने नेता रामनाथ अधिकारी बताउँछन् । ‘म धादिङमा नै छु । काठमाडौं आएपछि कुराकानी हुन्छ । हाम्रो समूहबाट एक जनाामात्रै उम्मेदवार बन्नुहुन्छ । काठमाडौं पुगेर बाँकी कुरा बुझ्नुपर्छ,’ अधिकारीले शिलापत्रसँग भने ।

प्रकाशित मिति: शुक्रबार, पुस १, २०७९ १६:४८