अब फिल्म खेल्ने रवीन्द्र मिश्रकाे संकेत

A+ A A-

विवेकशील साझा पार्टीको अध्यक्षबाट राजीनामा दिएका नेता रवीन्द्र मिश्रले चलचित्र क्षेत्रमा प्रवेश गर्ने संकेत गरेका छन् ।

बुधबार पार्टीको अध्यक्ष पदबाट राजीनामा दिएका रवीन्द्रले अब आफू चलचित्र क्षेत्रमा पनि पाइला चाल्न सक्ने संकेत गरेका हुन् । धेरैले आफूलाई अबको बाटोका सम्बन्धमा प्रश्न गरिरहेको उल्लेख गर्दै मिश्रले भनेका भनेका छन्, ‘कविता लेखूँला, किताब लेखूँला, परोपकारी काम गरूँला र मन लाग्यो भने सिनेमा पनि खेलूँला ।’

उनले आफ्नो राजीनामापछि पार्टीका कतिपय नेता तथा सदस्यहरूले समेत राजीनामा दिने तयारी गरेको देखिएकोले त्यसो नगर्न पनि आह्वान गरेका छन् । ‘कृपया, त्यसो नगरिदिनु होला । कुनै पनि पार्टीको नेताले नाजुक चुनावी परिणाम आएपछि जे गर्नु पर्ने हो, मैले त्यही नै गरेको हुँ । पार्टीको केन्द्रीय समितिको बैठक बस्न दिनुहोस् र त्यसले नै पार्टीको भावी प्रारम्भिक बाटो तय गर्नेछ भन्ने विश्वास लिएको छु’, मिश्रले भनेका छन् ।

उनले आफूलाई आफ्नो भाग्यले चाहिनेभन्दा धेरै दिइसकेकाले गुनासाे गर्ने ठाउँ नरहेकाे पनि बताएका छन् ।

'मलाई मेरो भाग्यले गुनासो गर्ने ठाउँ नै नराखी चाहिनेभन्दा बढी दिइसकेको छ । मलाई थप केही आवश्यक छैन । मेरो राजनीतिको प्रमुख उद्देश्य 'देशको दूरगामी हित र दशकौँसम्म जसको नाममा राजनीति गरियो र जसलाई राजनीतिको लाभले कहिल्यै स्पर्शै गर्न सकेन तिनलाई स्पर्श गर्नु' थियो', मिश्रले सामाजिक सञ्जालमा लेखेका छन्, 'त्यो सफलता अहिलेसम्म हासिल भएको छैन । त्यसका लागि 'विचारभन्दा माथि देश'लाई राख्नैपर्छ भन्ने मेरो मान्यता हो । त्यसैलाई शिरोधार्य गर्दै म प्रयासरत रहिरहनेछु । बाँकी, 'उपरवाले की इच्छा ।' --- शीर्षक सुधार गरिएको---