चिकित्सक र स्वास्थ्यकर्मी संक्रमित भएपछि बेनी अस्पतालको सेवा प्रभावित

A+ A A-

चिकित्सक र स्वास्थ्यकर्मी कोरोना भाइरस संक्रमित भएपछि म्याग्दीको सदरमुकामस्थित बेनी अस्पतालको सेवा प्रभावित भएको छ । चिकित्सक र स्वास्थ्यकर्मी कोरोना भाइरसबाट संक्रमित भएको अस्पतालमा भिड व्यवस्थापन गर्न आइतबारदेखि माघ १५ गतेसम्म सेवा बन्द गरेको हो । अस्पतालमा कार्यरत २३ जना चिकित्सक र स्वास्थ्यकर्मी कोरोना भाइरसको संक्रमण पुष्टि भएपछि आइसोलेसनमा बसेका छन् ।

बेनी अस्पताल व्यवस्थापन समितिका अध्यक्ष बेलबहादुर कटुवालले एक हप्ताका लागि फिबर क्लिनिक र आकस्मिक बाहेकका सेवा बन्द गरिएको जानकारी दिए । जनशक्ति व्यवस्थापन र भीड बढेकाले एक हप्ताका लागि ओपिडी सेवा बन्द गरेको भन्दै उनले आकस्मिक र ज्वरोका बिरामीको उपचारलाई भने निरन्तरता दिइने बताए ।

पचास शैय्या क्षमताको बेनी अस्पतालले हाल ६४ शैय्या बराबरको सेवा दिइरहेको छ । कोरोना संक्रमितको उपचारका लागि २० शैय्या क्षमताको एचडीयसहितको आइसोलेसन सञ्चालन गरेको छ । म्याग्दीका साथै पर्वतको जलजला गाउँपालिकाका दैनिक १०० जनाले सेवा लिने गरेका छन् ।

म्याग्दीमा हाल कोरोना भाइरसका सक्रिय संक्रमितको संख्या १५० जनाभन्दा बढी रहेको स्वास्थ्य कार्यालयले जनाएको छ । शिक्षक र विद्यार्थीहरुमा कोरोना संक्रमण देखिन थालेपछि माघ ५ देखि १५ गतेसम्मका लागि जिल्लाभरका विद्यालय बन्द भएका छन् ।

रघुगङ्गा गाउँपालिकाको कार्यालयको अत्यावश्यक बाहेकको सेवा माघ १२ गतेसम्मका लागि बन्द भएको छ । प्राकृतिक तातोपानीका कुण्ड र धार्मिकस्थलहरु माघ महिनाभरका लागि बन्द भएको छ । जिल्ला प्रशासन कार्यालयले पालिकाअनुसार आलोपालो गरेर सेवा दिन थालेको छ ।

सहायक प्रजिअ धिरेन्द्रराज पन्तले कोरोना सङ्क्रमण नियन्त्रणका लागि भीडभाड हुन नदिनका लागि अत्यावश्यक सेवाबाहेक नागरिकता, राहदानी, राष्ट्रिय परिचयपत्र, नाबालक परिचयपत्र, संघसंस्थालगायत विविध सिफारिससम्बन्धी सेवाका लागि पालो लगाइएको बताए ।

प्रकाशित मिति: आइतबार, माघ ९, २०७८ १९:५३