नेपालका प्रशिक्षक रोडी र वेस्ट इण्डिज ए का कप्तानको देश बारबाडोस (भिडियाे)

बारबाडोसकाे एक दृष्य

A+ A A-

क्यारेबियन द्विप क्षेत्रको अत्यन्तै सुन्दर टापु राष्ट्र हो, बारबाडोस । जहाँको क्षेत्रफल ४३० वर्गकिलोमिटर र जनसंख्या करिब तीन लाख छ । वेस्ट इण्डिजका हजारौँ टापुमध्ये एक बारबाडोस आसपास थुप्रै टापुहरू अवस्थित छन् । मार्टिनिक र सेन्ट लुसिया उत्तर पश्चिममा पर्छन् भने सेन्ट भिन्सेन्ट र ग्रेनाडा पश्चिममा छन् । दक्षिण पश्चिममा ट्रिनिडाड एन्ड टोबागो र भेनेजुएला, तथा दक्षिण पूर्वमा गुयाना पर्छन् ।

निकै सानो टापु राष्ट्र बारबाडोस जनसंख्याका आधारमा संसारका ठूला देशहरूको सूचीमा १८८औँ स्थानमा पर्छ । जनघनत्वका हिसाबले यहाँ प्रतिवर्गकिलोमिटरमा ६२४ जनाको बसोबास रहेको छ । जहाँका ३२ प्रतिशत मानिस शहरमा र ६८ प्रतिशत गाउँमा बस्छन् । बारबाडोसको राजधानी ब्रिजटाउन हो । जहाँको जनसंख्या करिब १ लाख छ ।

बारबाडोस देशको नाम कसरी राखियो भन्ने कुरा निकै रोचक छ । यहाँ एक प्रकारको ‘बियोर्डेड ट्री’ नामको रुख पाइन्छ । यसैको नामबाट यो देशको नाम बारबाडोस राखिएको हो । हाँगादेखि नै जरैजरा जमिनसम्म पुग्ने यो रुखलाई यहाँका मानिसले दाह्रीवाला रुख पनि भन्ने गर्छन् । जतिबेला बारबाडोस अंग्रेजको उपनिवेश थियो, त्यसबेला यहाँ भारतबाट काम गर्न ठूलो संख्यामा मजदुरहरू लगिएको थियो । त्यसैले यहाँका धेरै मानिस अहिले पनि हिन्दू धर्म मान्छन् । भारतीयहरूको बसोबासका कारण यहाँको खाना पनि नेपाल र भारतको खानासँग मिल्दोजुल्दो हुन्छ । असाध्यै सुन्दर सेतो बालुवाले भरिएका समुद्री किनारा र नीलो पानी, सफा मौसम आदिका कारण उत्तर अमेरिकाका धेरै मानिसहरू यहाँ छुट्टी मनाउन पुग्ने गर्छन् ।

अर्को रोचक कुरा के छ भने यहाँका कुनै पनि सपिङ मल, रेस्टुरेन्ट र होटलहरू बन्द हुँदैनन् । त्यसैले यहाँ जाने पर्यटकहरूले कुनै समयमा पनि असजिलो महसुस गर्नुपदैन । बारबाडोसमा सबैभन्दा गर्मी मौसम अप्रिलमा हुन्छ भने सबैभन्दा चिसो जनवरी र सबैभन्दा बढी वर्षा नोभेम्बर महिनामा हुन्छ । बारबाडोसमा पर्यटकलाई लोभ्याउने भनेको यहाँका चराहरू पनि हुन् । यहाँ २७० भन्दा बढी प्रजातिका चराहरू पाइन्छ । हरेक क्षेत्रमा अलग अलग प्रकारका सुन्दर पन्छीहरू देख्न सकिन्छ । यहाँका मानिसको सबैभन्दा ठूलो शोखमध्ये एक हो, रम पिउनु । त्यसैले यतिसानो टापुमा पनि १५ सयभन्दा बढी रमका पसल भएको बताइन्छ । यहाँबाट हरेक वर्ष ५७ मिलियन डलर बराबरको रम निर्यात हुनेगर्छ । रम आन्दानीको मुख्य स्रोत पनि हो ।

बारबाडोसका मानिसहरू हर समय मस्तीमा झुम्न रमाउँछन् । यहाँ बजन डान्स असाध्यै चर्चित छ । महिलाहरू सार्वजनिक कार्यक्रमदेखि घरमा समेत यो डान्स गर्ने गर्छन् । बारबाडोस विश्वका धेरै देशजस्तै बेलायतको उपनिवेश थियो । जहाँ बेलायतले करिब ३ सय वर्ष राज गर्‍यो । आज पनि बारबाडोसमा ब्रिटिस उपनिवेशको छाप देख्न सकिन्छ । यहाँका मानिसहरूको मुख्य भाषा अंग्रेजी हो भने नाम र खानपिन पनि ब्रिटिसहरूसँग मिल्दोजुल्दो हुन्छ । बारबाडोस यति सानो छ कि गाडीबाट करिब ३ घण्टामा पुरै देशलाई चक्कर लगाउन सकिन्छ । यो देशमा नेपालमाजस्तै क्रिकेटको क्रेज देख्न पाइन्छ । हरेक क्रिकेट खेलमा यहाँका मैदानहरू भरिभराउ हुने गर्छन् ।

नेपालमा टी–२० सिरिज खेल्न आएको वेस्ट इण्डिज ऐ क्रिकेट टोलीका कप्तान रोस्टन चेजदेखि काइल मेयर्स, साइ होप, जासोन होल्डर, ड्वेन स्मिथसम्म यही बारबाडोसका खेलाडी हुन् । नेपालले टी–२० विश्वकप खेल्नुअघि बलिङ प्रशिक्षकमा नियुक्त गरेका रोडी इस्टविक पनि यही बारबाडोसका हुन् । यो निकै सानो देश बारबाडोसमा संसारको तेस्रो पुरानो संसद छ । जहाँको संसदले सन् १६३९ देखि काम गरिरहेको छ । अंग्रेजहरूले यहाँ सन् १६२७ देखि तम्बाखु र कपासको खेती सुरु गराए । यहाँ सन् १६४० को दशकमा उखु खेती सुरु भयो । आज पनि बारबाडोसमा चिनीको उत्पादन ठूलो मात्रामा हुने गर्छ । बारबेरियन समेत भनिने यहाँका मानिसहरूबारे एउटा कहानी छ । उनीहरू भोलिका लागि हैन आजका लागि बाँच्छन् । भोलि के हुन्छ ? हैन उनीहरू आज खुसी हुन चाहन्छन् ।

बारबाडोसको मुद्रा बारबेरियन डलर हो । दुई बारबेरियन डलर करिब १ अमेरिकी डलर बराबर हुन्छ । यहाँका मानिसमा सुन लगाउने शौख निकै धेरै हुने गर्छ । तपाईंले वेस्ट इण्डिजका खेलाडीहरू सुनका मोटामोटा सिक्री लगाएर हिँडेको देख्नु भएको होला । यसैबाट यो क्षेत्रमा सुनका गहनाको महत्व बुझ्न सकिन्छ । यहाँको सबैभन्दा लामो नदी क्यारेनेज हो । कन्स्टिच्युसन रिभर पनि भनिने यो नदीको लम्बाई मात्रै ०.५७ किलोमिटर छ । यहाँको जनजीवनको महत्वपूर्ण हिस्सा समुद्र नै हो । तर सिँचाइका लागि यो नदी निकै महत्वपूर्ण छ । बारबाडोस संसारमै स्वादिष्ट सी फुडका लागि प्रशिद्ध छ ।

यहाँ हलिउडका चर्चित कलाकारदेखि खेलाडीहरू छुट्टी मनाउन यही आउँछन् । विश्व चर्चित गल्फ खेलाडी टाइगर वुड्सले आफ्नी स्वीडिस प्रेमिकासँग यही टापु राष्ट्रमा विवाह गरेका थिए । बारबाडोस ‘मेडिकल साइन्स’ मा संसारमै प्रख्यात छ । जस्तो बारबाडोसको फर्टिलिटी सेन्टरको सफलतातर अमेरिका र बेलायतको तुलनामा धेरै माथि छ । अर्को कुरा यहाँ उपचारका लागि लाग्ने खर्च अमेरिका र बेलायतको तुलनामा एक तिहाइमात्रै छ ।