गण्डकी प्रदेशसभामा एकीकृत समाजवादी शून्य, इन्द्रलाल एमालेमै

A+ A A-

गण्डकी प्रदेशसभामा माधवकुमार नेपाल नेतृत्वको नेकपा एकीकृत समाजवादीको सांसद सहभागिता नहुने भएको छ ।

एमालेमा नेपाल पक्षमा रहेका सांसद इन्द्रलाल सापकोटाले माधव नेपाललाई साथ नदिने भएपछि एकीकृत समाजवादीका कोही पनि सांसद प्रदेश सभामा नहुने भएका हुन् ।

प्रदेश सभामा एमालेका २७ सांसद रहेकोमा माधव पक्षका उनीमात्रै थिए । सापकोटा एमालेमै रहने चर्चा चले पनि पार्टी दर्ता हुँदासम्म केही बोलेका थिएनन् । कार्यदलको सहमतिअनुसार बढ्नुपर्ने तर्क गर्दै आइरहेका सापकोटा माधव नेपालले नयाँ पार्टी खोलेपछि केपी ओली नेतृत्वको एमालेमा लागेका हुन् ।

सापकोटा एमालेको बागलुङ जिल्ला अध्यक्ष हुन् । उनले माधव नेपालले खोलेको पार्टीमा नजाने जानकारी जिल्ला र केन्द्रका नेतालाई गराइसकेका छन् । एकीकृत समाजवादीको बागलुङ जिल्ला कमिटीमा सापकोटा संलग्न छैनन् । ‘केपी ओलीको अपराधपूर्ण कार्य स्वीकार गर्दैनौँ भनेर हामी विद्रोह गर्ने साथीहरू नयाँ पार्टीमा भयौँ । उहाँले आँट्नुभएन,’ बागलुङका माधव पक्षीय एक नेताले शिलापत्रसँग भने ।

सापकोटा एमालेमै रहेपनि बागलुङमा गत साता नै एकीकृत समाजवादीको जिल्ला कमिटी बनाइसकेको छ । लालबहादुर थापाको नेतृत्वमा ५१ सदस्यीय समिति बनेको हो । थापा यसअघि एमालेको जिल्ला सचिव थिए ।

केन्द्रमा केपी ओली र माधव नेपालको विवाद चलिरहँदा प्रदेशमा सांसद सापकोटा पृथ्वीसुब्बा गुरूङकै पक्षमा थिए । गठबन्धन दलका प्रस्तावित मुख्यमन्त्रीलाई शपथ नगराएको भन्दै २९ जेठमा गठबन्धनका बहुमत सदस्य प्रदेश प्रमुख निवासअघि धर्ना बसेका थिए । त्यतिबेला सापकोटासहित चार नेताले कुनै चलखेल नगरी पद छोड्न पृथ्वीसुब्बालाई सुझाएका थिए ।

६० सदस्यीय गण्डकी प्रदेश सभामा एमालेका २७ सांसद छन् । त्यस्तै कांग्रेसका १५, माओवादीका १२ (सभामुखसहित), जसपा र राष्ट्रिय जनमोर्चाका दुई/दुई जना सांसद छन् । एक जना स्वतन्त्र सांसद छन् भने एक स्थान रिक्त छ । बागलुङबाट निर्वाचित राष्ट्रिय जनमोर्चाका सांसद कृष्ण थापालाई पार्टीले कारबाही गरेपछि स्थान रिक्त छ । पदपूर्तिका लागि उपनिर्वाचनको मिति घोषणा भएको छैन ।

प्रकाशित मिति: सोमबार, भदौ १४, २०७८ २०:१८