किन पक्राउ परेनन् जीबी राई ? गृहमन्त्री लामिछानेकै भूमिकामाथि उठ्याे प्रश्न

किन पक्राउ परेनन् जीबी राई ? गृहमन्त्री लामिछानेकै भूमिकामाथि उठ्याे प्रश्न

A+ A A-

उपप्रधानमन्त्री तथा गृहमन्त्री रवि लामिछाने इलामको उपनिर्वाचनमा प्रचारप्रसार गर्ने क्रममा गाडीको ढोकामा उभिएर हात हल्लाउँदै आफ्ना पुराना व्यापार साझेदार गितेन्द्रबाबु राई (जीबी) का बारेमा बोलेको भिडियो सामाजिक सञ्जालमा भाइरल भइरहेको छ ।

उक्त भिडियोमा भिडबाट प्रश्न आउँछ– 'रवि दाइ, जीबी राईका बारेमा केही बताइदिनुहोस् ।'

अर्को प्रश्न पनि साेधिन्छ- 'जीबी राई कहिले पक्राउ पर्छन् ?'

गाडीको ढोकामा हात हल्लाइरहेका रवि लामिछाने उत्तर दिन्छन्- 'थाहा पाइहाल्नुहुन्छ । तपाईंले समाचार लेख्ने अवसर पाउनुहुन्छ । चिन्ता नगर्नुस् । ढुक्क हुनुस् । अहिले भनिहाल्नु हुँदैन । मलाई राम्रोसँग थाहा छ ।'

फेरि प्रश्न आउँछ- 'निर्वाचनअगाडि कि पछि ?' तर लामिछानेले त्यसको जवाफ दिँदैनन् ।

लामिछानेले जीबी राईका बारेमा बोलेको यो पहिलोपटक होइन । उनी गृहमन्त्री भएपछि पटकपटक छिट्टै अपराधीलाई समातिन्छ भन्दै आएका छन् । तर, अहिलेसम्म उनले जीबी राई कहाँ छन्, कुन देशमा गएर बसेका छन् भनेर खुलाएका छैनन् । तर, आमनागरिकले, पत्रकारले सोध्दा 'मलाई थाहा छ, अहिले भनिहाल्नु हुँदैन' भन्दै पन्छिएका छन् ।

१० चैतमा काठमाडौंमा आफ्नै पार्टीको कार्यक्रममा गृहमन्त्री लामिछानेले सहकारी ठगेर फरार भएका जीबी राईलाई जहाँ बसेको भए पनि समाएर ल्याउने बताएका थिए । उनले भनेका थिए, ‘आकाशमा होस्, पातालमा होस्, समाएर ल्याउँछौँ, समय लाग्ला, कसले भगायो, त्यो पनि खोज्छौँ ।’

लामिछानेले जीबी राईसँग आफ्नो कुनै सम्बन्ध नरहेको बताउँदै आएका छन् । उनले ग्यालेक्सी टेलिभिजनमा सँगै काम गरेको र टेलिभिजन छाडेपछि उनीसँगको नाता सम्बन्ध सकिएको बताउँदै आएका छन् ।

उनले भनेका थिए, ‘जीबी राई जीबी राई हो, म रवि लामिछाने हो, जीबी राई जोडिएका हरेक ठाउँमा रवि लामिछाने हुँदैन । ऊसँग टेलिभिजनमा काम गरेको हुँ, टेलिभिजनमै मेरो नाता सकिएको हो, त्योभन्दा बाहेक कहीँ कतै पनि सम्बन्ध छैन, ऊ दोषी रहेछ भने उसले सबक सिक्नुपर्छ, कारबाही हुनुपर्छ ।’

लामिछाने गृहमन्त्री भएको झण्डै दुई महिना पुग्न लागेको छ । तर, उनले अहिलेसम्म जीबी राईका बारेमा सोधीखोजी नै गरेको देखिँदैन । जीबी राई र उनको समूहले सहकारीका बचतकर्ताको १६ अर्बभन्दा बढी रकम दुरुपयोग गरेको आरोप छ । जसमा स्वयम् गृहमन्त्री पनि जोडिएका छन् ।

जीबी र लामिछाने जोडिएको कास्की पोखराको सूर्यदर्शन बचत तथा ऋण सहकारी संस्था, बुटवलको सुप्रिम बचत तथा ऋण सहकारी, काठमाडाैंकाे स्वर्णलक्ष्मी सहकारीबाट बचतकर्ताकाे अर्बाैं रकम अपचलन भएकाे छ । यी सहकारी संस्थाका बचतकर्ताले प्रहरीमा जाहेरीसमेत दिइसकेका छन् ।

जीबी राई समूहले नै नेपालगञ्जको समानता बचत तथा ऋण सहकारी, चितवनको सहारा चितवन बचत तथा ऋण सहकारी र वीरगञ्जको सानो पाइला बचत तथा ऋण सहकारी संस्थाबाट बचतकर्ताको रकम दुरुपयोग गरेको हो ।

सहकारी ठगी प्रकरणमा फरार रहेका जीबीविरुद्ध प्रहरीले इन्टरपाेलबाट रेड नाेटिस जारी गराएकाे छ भने जीबी समूहकै कुमार रम्तेल पक्राउ परेका छन् । गत साउनदेखि नै जीबी फरार छन् ।

यसअघि आफू प्रतिपक्षीमा हुँदा ८ माघ २०८० मा पत्रकार सम्मेलन गरी लामिछानेले सरकारले जीबी राईलाई पक्राउ किन नगरेको भनेर प्रश्न गरेका थिए । उनले भनेका थिए, ‘पूर्वउपप्रधानमन्त्रीलाई समाउन सक्ने सरकारले जीबी राईलाई किन समाउन सक्दैन ? तर, मलाई कताकता यो फाइल खोल्दै जाँदा उहाँहरूका आफन्त धेरैको नाम आउँछ कि भनेर हो कि, म हेर्दै छु उहाँहरूलाई ।’

सरकारलाई प्रश्न गरेको लगभग दुई महिना नपुग्दै लामिछाने आफैँ गृहमन्त्री भए । उनले सरकारलाई सोधेको प्रश्नको जवाफ काम गरेर दिनुपर्ने हो । तर, अहिलेसम्म 'मलाई थाहा छ, तर अहिले नभनौँ' भन्दै पन्छिने गरेका छन् । राई पक्राउ परेका छैनन् ।

राई भागेर नेपालबाहिर पुगेको भन्ने आधारमा जिल्ला प्रहरी कार्यालय, कास्कीको सिफारिसमा इन्टरपोलको नेसनल कन्ट्रोल ब्युरो (एनसीबी) काठमाडौंले रेड कर्नर नोटिस जारी गरेको नेपाल प्रहरीका प्रवक्ता डीआईजी भीमप्रसाद ढकालले शिलापत्रलाई बताए । उनले भने, ‘जीबी राई मलेसियमा छन् भन्ने जानकारी पाएर नै रेड कर्नर नोटिस जारी गरेका छौँ । डिप्लोम्याटिक लेबलबाट पनि प्रक्रिया जारी राखेका छौँ ।’

प्रहरी प्रवक्ताले नै मलेसियामा रहेको जानकारी पाएको बताउँदा गृहमन्त्री लामिछानेले किन अहिलेसम्म पक्राउ गराउन सकेनन् ? कतै आफ्नै पोल खुल्ने डरले पो हो कि भन्ने प्रश्न उठ्न थालेको छ । जबकि लामिछाने गृहमन्त्री बन्नुभन्दा दुई दिनपहिला २१ फागुनमा इन्टरपोलले जीबीविरुद्ध रेड कर्नर नोटिस जारी गरिसकेको थियो ।

सार्वजनिक रूपमा 'आफूलाई थाहा छ' भन्दै आएका गृहमन्त्रीलाई जीबी राईलाई पक्राउ गरी नेपाल ल्याउन कसले रोकेको छ भन्ने प्रश्न भेटिएकाे छैन ।

गृह मन्त्रालयका उच्च अधिकारीका अनुसार राई पक्राउ नपर्नुमा गृहमन्त्रीको चाहनाले काम गरेको बताउँछन् । ती अधिकारीले भने, ‘प्रहरीलाई राई मलेसियामा छन् भन्ने जानकारी छ । रेड कर्नर नोटिस जारी भएको छ । कूटनीतिक पहल पनि सुरु भएको थियो । तर, गठबन्धन फेरबदल भएपछि राई ल्याउने कुरा छायामा पारियो । नियतवश नै नल्याउन चाहेपछि राई पक्राउ पर्ने देखिँदैन ।’

सरकारमा जानुभन्दा पहिला माघसम्म भावुक हुँदै मकै पोलेर जनताले जम्मा गरेको पैसा राईले तिर्नुपर्ने भन्दै पत्रकार सम्मेलन गरेका लामिछानेले अहिले 'मलाई थाहा छ, छिट्टै ल्याउँछु' भन्छन् । तर, प्रहरीलाई प्रक्रिया अगाडि बढाउन दिँदैनन् ।

गत ११ चैतमा चितवन पुगेका गृहमन्त्री लामिछानेले जीबी राईलाई पक्राउ गर्न सरकारले पूरै शक्ति परिचालन गरेको दाबी गरेका थिए । उनले भनेका थिए, ‘सरकारले गरेका अनुसन्धान र अध्ययनका कुरा पहिले नै सार्वजनिक गर्न नहुने हो । राई छिट्टै पक्राउ पर्छन् ।’

लामिछानेले चितवनमा सहकारीको पैसा अपचलन गर्नेहरूको सम्पत्ति खोजेर भए पनि बचतकर्ताको पैसा फिर्ता गर्ने बताएका थिए । तर, अहिलेसम्म न राई पक्राउ परे, न बचतकर्ताको पैसा फिर्ता गर्न अपचलन गर्नेको सम्पत्ति नै खोज्न लगाए ।

जबकि अहिले गृहमन्त्री लामिछानेले हरेक ठाउँमा सहकारीका बारेमा जवाफ दिनुपरेको छ । इलामको उपनिर्वाचनमा उनले हरेक सभामा सहकारीका बारेमा जवाफ दिनुपर्‍यो । उनको जवाफबाट मतदाता सन्तुष्ट नभएकाे उनकाे पार्टी रास्वपाका उम्मेदवारले पाएकाे मतले प्रस्ट पारिसकेको छ ।

कुनै समय अरुलाई प्रश्न सोध्न खप्पिस लामिछाने अहिले आफैँ प्रश्नको घेरामा छन् । त्यो पनि जनता ठगेको प्रश्नको उत्तर दिनुपरेको छ । सहकारी ठगीमा उनको संलग्नताबारे बढी प्रश्न सोधिएका छन् ।

सहकारीपीडितले त 'जीबी राई कहाँ छ, रवि दाइलाई थाहा छ' भन्दै नारा लगाइरहेका छन् ।

चितवनका सहकारीपीडितले १५ वैशाखमा प्रमुख जिल्ला अधिकारीलाई जीबी राईलाई पक्राउ गर्नुपर्ने भन्दै ज्ञापनपत्र बुझाएका छन् । प्रमुख जिल्ला अधिकारी चिरञ्जीवी शर्मालाई बुझाएको ज्ञापनपत्रमा उनीहरूले उल्लेख गरेका छन्, 'सहकारी ठगी प्रकरणमा जोडिएका जीबी राईलगायत फरार सञ्चालकहरूविरुद्ध पक्राउ पुर्जी जारी भएको लामो समय भए पनि उनीहरू पक्राउ नपर्नुमा उच्चपदस्थ व्यक्तिहरू त सम्मिलित छैनन् ? गम्भीर शंकाको वातावरण बनेको छ ।'

प्रकाशित मिति: सोमबार, वैशाख १७, २०८१ १८:३२