विद्युत् प्राधिकरणको चरम लापर्वाहीः सेवाग्राही जोखिममा

A+ A A-

नेपाल विद्युत् प्राधिकरण भक्तपुर शाखाको उत्तरतर्फको झ्याल बाहिर सेवाग्राहीको भीड देखिन्छ ।

एकातिर पानी पर्ने मौसममा ओत लाग्ने ठाउँ छैन, अर्कोतिर फाराम भर्न सहज हुने कुनै टेबुल छैन । कोरोनाको कहरमा सुरक्षाका लागि सहज हात धुने व्यवस्था होस् वा स्यानेटाइजरको सहज व्यवस्था छैन ।

नयाँ मिटरका लागि फाराम लिने, भर्ने र बुझाउन सेवाग्राहीको भीड रहेको उत्तरतर्फको झ्याल अगाडि नै विद्युत् प्रवाह भएको हाइटेन्सन लाइनको ठूलाठूला खम्बा र ट्रान्समिटर, जहाँ ठूला अक्षरले खतरा भनेर लेखिएको बोर्ड छ, ठीक त्यसैको तल घाँस र भिरालो जमिनमा सेवाग्राहीको भीड छ ।

जिल्ला समन्वय समिति भक्तपुरले सुरु गरेको अनुगमन अभियानका क्रममा समितिका प्रमुख नवराज गेलालको नेतृत्वमा गएको अनुगमन टोलीले देखेको नेपाल विद्युत् प्राधिकरण भक्तपुर शाखाको यो चरम लापर्वाहीको दृश्य हो ।

प्राधिकरणले खतरा लेखेको खम्बामुनि नै उभिएर सेवाग्राहीले नयाँ मिटरको फाराम लिने, भर्ने र बुझाउने गरेका छन् । फाराम भर्दा नबुझेको कुरा सोधपुछ गर्न प्राधिकरणले कुनै कर्मचारीको व्यवस्था गरेको छैन ।

नयाँ मिटरका लागि निवेदन दिन आएका भातेढिकुरका हिमाङ तामाङले अघिल्लो दिन फाराम लिन २ बजे आउँदा काउण्टर बन्द भएपछि आज ११ बजे आएको बताए ।

‘हिजो आउँदा बन्द भयो भनेर फर्काइयो, आज ११ बजे नै आए । ५५ रुपैयाँमा फाराम किनेर भरे पनि बिग्रेपछि अर्को फाराम किन्नुपर्ने रैछ, नबुझेको सोध्ने मान्छे छैन, पानी पर्दा बस्ने प्रतीक्षालय छैन, माथि हे¥यो डरलाग्दो खतरा लेखेको खम्बा छ, त्यहीमुनि टुक्रुक्क बसेर घुँडामा राखेर फाराम भरेर बुझाउनु पर्छ ।’

जिल्ला समन्वय समिति भक्तपुरका प्रमुख नवराज गेलालको नेतृत्वमा उपप्रमुख सरिता कुँवर, जिसस प्रशासकीय प्रमुख, जिसस सदस्य र पत्रकारको टोलीले नेपाल विद्युत् प्राधिकरण भक्तपुर शाखाको अनुगमन गरेको हो ।

अनुगमनको क्रममा विद्युत् प्राधिकरणले चरम लापर्वाही गरेको पाइएको जिसस प्रम्ख गेलालले बताए । सेवाग्राहीले देख्ने गरी नागरिक वडापत्र राख्नुपर्नेमा कार्यालयमा नागरिक वडापत्र छैन । नयाँ मिटर जडान गर्न सेवाग्राहीले निकै कुर्नुपर्छ ।

निवेदन आएको ३ दिनमा नयाँ मिटर दिन्छौँ भन्ने कार्यालय प्रमुख राजकुमार रमणले दाबी गरे पनि अनुगमनका क्रममा १० दिनमा पनि नयाँ मिटर जडान गर्न नसकेको र मिटर जडान गर्न घुस खुवाउनु पर्ने बाध्यता रहेको सेवाग्राहीको गुनासो छ ।

भक्तपुरमा भएको व्यापक चुहावट रोक्दै सात प्रतिशतमा झार्न सफल भएको कार्यालय प्रमुख रमणको दाबी छ ।

एउटा पोल सार्दा प्राधिकरणले ४ लाखसम्म लिने गरेको तर त्यही पोल स्थानीय तहले सार्दा ५० देखि ७० हजारमा सकिनेबारे राखेको जिज्ञासामा कार्यालयका प्रमुख रमणले प्राधिकरणको ज्याला नै महँगो हुने गरेको बताए ।

पोल सार्न स्थानीय तहले १ जना ज्यामीको १ हजार रुपैयाँमा काम लगाउने गरेको तर प्राधिकरणले भने ५ हजार लिने गरेको बताउँदै नियमानुसार जाँदा पनि महँगो हुने बताए ।

अनुगमनपछि जिसस प्रमुख नवराज गेलालले विद्युत् प्राधिकरणको सेवा अस्तव्यस्त रहेको पाइएको बताउँदै कोरोना भाइरस सङ्क्रमणको सुरक्षादेखि सेवा दिने काममा समेत लापर्वाही गरिएको पाइएको बताए ।

प्राधिकरणलाई सेवा सुधार्न निर्देशन दिएको बताउँदै उहाँले पुनः जाने अनुगमनमा यस्तै पाइए कारबाही प्रक्रिया अगाडि बढाउने बताए । रासस

प्रकाशित मिति: बुधबार, साउन २१, २०७७ २१:२९