अपडेटः उदयपुरको बेलका तनावग्रस्त, प्रहरीसहित १ दर्जन प्रदर्शनकारी घाइते

A+ A A-

उदयपुरको बेलका नगरपालिका तनावग्रस्त बनेको छ । स्थानीय जनप्रतिनिधि र कर्मचारीले मनलाग्दी र अनियमितता गरेको आरोप लगाउँदै विपक्षी नेपाली कांग्रेससहितको विपक्षी गठबन्धनले नगरपालिका घेराउ गरेको छ ।

यस क्रममा प्रहरी र प्रदर्शनकारीबीच झडप हुँदा केही प्रहरीसहित दर्जनभन्दा बढी प्रदर्शनकारी घाइते भएका छन् । टाउको र खुट्टामा चोट लागेका उनीहरूको स्वास्थ्य केन्द्रस्थित स्थानीय स्वास्थ्य चौकीमा उपचार भइरहेको छ ।

सत्ता पक्ष अर्थात् नेपाल कम्युनिस्ट पार्टी (नेकपा)का कार्यकर्ता पनि भेला भएकाले मुठभेडको सम्भावना रहेको स्थानीय पत्रकार सुमनसागर खतिवडाले बताए ।

१ हजारभन्दा बढीको संख्या कांग्रेसका कार्यकर्ता नगरपालिकाअगाडि प्रदर्शन गरिरहेका छन् । दुवै पक्षका नेता, कार्यकर्ता भेला भएकाले इलाका प्रहरी कार्यालय रामपुरलाई स्थिति नियन्त्रणमा लिन धौधौ परेको छ ।

साउनकाे पहिलो साता नगरपालिकाका उपप्रमुख राजकुमारी चौधरीले नगरपालिकामा मनलाग्दी र भ्रष्टाचार बढेको भन्दै राजीनाको घोषणा गरेयता विपक्षी कांग्रेस आन्दोलित बनेको हो ।

११ साउनमा चौधरीले विज्ञप्ति निकालेर आत्मआलोचना गर्दै राजीनामा नगर्ने बताइसकेकी छन् ।

स्थानीय सरकार र नेकपाले उपमेयरलाई थमथमाएर भ्रष्टाचार र अनियमिततालाई प्रोत्साहन गरेको भन्दै कांग्रेससहितका विपक्षी दल आन्दोलित बनेका हुन् ।

कांग्रेसका युवा नेता लवराज अधिकारीले जनप्रतिनिधि र कर्मचारीमाथि भ्रष्टाचार आरोप लागिरहँदा नगरप्रमुख दुर्गाकुमार थापाले आफूनिकट वडाअध्यक्षको नेतृत्वमा छानविन समिति गठन गरी ढाकछोप गर्ने प्रयास गरेको आरोप लगाए ।

उनले भने, 'उहाँ (नगरप्रमुख)ले आफूलाई दादा नै सम्झनुभयो । हामीले निष्पक्ष छानबिनको माग मेयरले भन्नुभयो– तिमीहरूले २०/५० जना ल्याएर नगरपालिकाअगाडि उभ्याउँदैमा मैले गरिहाल्नुपर्ने के छ ? हाम्रा मागप्रति उहाँले बेवास्ता मात्र नभएर हेपाहा प्रवृत्ति देखाउनुभयो । यति मात्र होइन, भ्रष्टाचारविरुद्धको आन्दोलन भइरहेका बेला २०/२५ जना गुण्डा पठाएर विचलित पार्ने दुप्रयास पनि गर्नुभयो ।'

प्रकाशित मिति: आइतबार, साउन १८, २०७७ १९:१५