दैनिक १ लाख ५० हजार थपियो संसद बैठक सञ्चालन खर्च

A+ A A-

कोभिड–१९ भाइरस संक्रमण रोकथामका लागि सतर्कता अपनाउँदा संघीय संसद बैठकको सञ्चालन लागत बढेको छ । कोभिड १९ को संक्रमणको जोखिमबाट बच्न र बचाउनका लागि सामाजिकदूरी कायम गर्नुपर्ने तथा २५ जना भन्दा धेरै भेला हुन नपाईने सरकारको निर्णयका वाबजुत संघीय संसदको छैटौ अधिवेशन चलिरहेको छ ।

कोभिड १९ रोकथाम तथा नियन्त्रणका लागि सरकारले लागु गरेको लकडाउन कै समयमा सुरु भएको संघीय संसदको छैटौ अधिवेशन संञ्चालनका लागि सामाजिक दुरी कायम गरि गरिने सिट व्यवस्थापन, फर्निचर मर्मत लगायत केही प्राविधिक शिर्षकमा थप लागत बढेको हो ।

त्यसैगरी बैशाख २६ गते देखि सुरु भएको संघीय संसदको छैटौ अधिवेशनका बैठक संञ्चालका लागि अपनाउनुपर्ने स्वास्थ्य सर्तकता भएको खर्च लगायतले प्रतिदिन बैठक संञ्चालन लागत बढाएको हो । सचिवालयका प्रवक्ता रोजनाथ पाण्डेले समान्य अवस्थामा प्रति दिन प्रति बैठक ७ लाख रुपैयाँ खर्च हुने गरेकोमा अहिले १ लाख ५० हजार रुपैयाँले प्रतिबैठक लागत बढेको बताए ।

अहिले संघीय संसद बैठक खर्च प्रतिदिन ८ लाख ५० हजार सम्म पुगेको छ । यो बैठक कार्यकक्ष सरसफाइ, प्रविधि जाँच, सुरक्षा प्रबन्ध, प्रत्यक्ष प्रशारणको चेकजाँच, जनशक्ति परिचालन, संसद भवनको बार्षिक भाडा, विजुली, पानी सांसदहरुको बैठकभत्ता, यातायात खर्च लगायत कोरोनाको सुरक्षामा अपनाइएका स्वास्थ्य सर्तकमा भएको खर्चहरुको एकमुष्ट रकम हो ।

तर यसमा सांसदहरु, बैठक संञ्चालनका लागि आवश्यक सचिवालयलका कर्मचारी, मर्यादापालक तथा अन्तराष्ट्रिय सम्मेलन केन्द्रका गरि झण्डै ८ सय जनाको कोरोना पीसीआर परीक्षण वापतको खर्च समावेश नभएको प्रवक्ता पाण्डेले बताए ।

सचिवालयले सामाजिकदूरी कायम गरि बैठकको सिट व्यवस्थापनको संरचना, फर्निचर मर्मत तथा ५० थान माइक थप गर्दा ३० लाख रुपैया खर्च भएको जनाएको छ । त्यसैगरी थर्मल गन २० थान, पीपीई ५ थान, एन ९५ मास्क २५ थान, केही सर्जिकल मास्क, सेनिटाईजन, साबुन तथा डिसइन्फेक्सनका सामाग्री खरिदमा ५ लाख थप खर्च भएको जनाएको छ ।

प्रवक्ता डाक्टर पाण्डेले कोभिड १९ संक्रमणको अबस्था लम्बिदै गएमा विषयगत समिति संञ्चालनका लागि पनि सामाजिक दुरी कायम गर्ने गरि हल र सिट व्यवस्थापन गर्नुपर्ने भएमा बैठक संञ्चालन खर्च थप वृद्धि हुने बताए ।

महामारीको संक्रामक अवस्थामा संञ्चालित संघीय संसदका दुवै सदनको बैठकमा सांसदहरुको उपस्थिति भने सन्तोषजनक देखिएको छैन । बजेट पुर्व, नीति तथा कार्यक्रमको साथै बजेटमाथिको सैद्धान्तिक छलफलमा सांसदहरुको उपस्थिति न्यून देखिएको छ ।

प्रकाशित मिति: बुधबार, जेठ २१, २०७७ १६:२७