राकम कर्णालीमा १ सय शय्याको ट्रमा सेन्टर बन्दै

A+ A A-

दैलेखको आठबीस नगरपालिकामा १ सय शय्याको अस्पताल निर्माण हुने भएको छ ।

अस्पताल निर्माण र सञ्चालनका लागि कर्णाली स्वास्थ्य विज्ञान प्रतिष्ठान जुम्ला र आठबीस नगरपालिकाबीच सम्झौता भएको छ ।

सम्झौतापत्रमा १ सय शय्याको ट्रमा सेन्टरको अस्पताल निर्माणका लागि नगरपालिका, प्रतिष्ठानबीच समन्वय गर्ने सहमति भएको छ ।

अस्पताल निर्माणका लागि कर्णाली विज्ञान प्रतिष्ठान र आठबीस नगरपालिकाबीच १३ बुँदे सम्झौता पत्रमा सम्झौता गर्ने सहमति भएको छ ।

पत्रमा दुई पक्षको सम्बन्ध विस्तार हुँदै सहकार्य गर्ने, प्रदेश सरकार र संघीय सरकारसँग समन्वयन गरी दुई पक्षले अस्पताल निर्माण र सञ्चालन गर्ने, सर्वसुलभ विशेषज्ञ सेवाहरू उपलब्ध गराउने उद्देश्यका साथ सम्झौता भएको नगर–प्रमुख खड्गराज उपाध्यायले बताए ।

‘तत्कालका लागि एक्सरे मेसिन, ल्यावलगायतका सामग्रीहरू र डाक्टरहरूको फिल्ड भत्ताको व्यवस्था नगरपालिकाले गर्नेछ,’ उनले भने, ‘प्रतिष्ठानले डाक्टर र तलबको व्यवस्थापन गर्नेछ ।’

अस्पतालको लागत इष्टमेट नयाँ शहर आयोजनाले गर्ने नगर प्रमुख उपाध्यायले बताए ।

‘अस्पताल निर्माणका लागि यो पटक डीपीआर गर्ने र त्यसपछि लागतको इष्टिमेट हुनेछ,’ उनले भने, ‘यहाँ शिक्षण अस्पताल निर्माण भई सञ्चालनमा आए अछाम, दैलेख, कालिकोटलगाएत जिल्लाका नागरिकहरू प्रत्यक्ष रूपमा लाभान्वित हुने अपेक्षा गरिएको छ ।’

सर्वसाधरण नागरिकहरूले सहज रूपमा सेवा लिने र नेपालगञ्ज सुर्खेत जाने बाध्यता हड्ने नगरपालिकाका उप–प्रमुख दिपा बोहोराले बताइन् ।

मापदण्डअनुसारको नगरपालिकाले अस्पतालका लागि राकम कर्णालीमै १०५ रोपनी सार्वजनिक जग्गा पास गरिसकेको छ ।

कर्णाली राजमार्गमा सुविधासम्पन्न अस्पताल नहुँदा दुर्घटना भएपश्चात् अधिकांशले बाटोमै ज्यान गुमाउँदाको पीडा महसुस भएको हुँदा देश संघीयतामा प्रवेश गर्नुअघि नै अस्पताल निर्माणको पहल थालिएको उपप्रमुख बोहोराले बताइन् ।

प्रकाशित मिति: आइतबार, फागुन ११, २०७६ १३:३०