बल्ने ढुंगाकाे लाेभमा ५० लाख स्वाहा

A+ A A-

बल्ने ढुंगाको लोभमा लाग्दा बच्चुराम गुरुङले ५० लाख रुपैयाँ गुमाए । स्वयम्भु भगवानपार्कका गुरुङले बल्ने ढुंगा किन्न जाँदा उनको ५० लाख रुपैयाँ लुटिएको हो ।

लुटेरा समूहका ६ जनालाई महानगरीय अपराध महाशाखाको टोलीले आइतबार पक्राउपछि सार्वजनिक गरेको छ । पक्राउ पर्नेमा दाङको पुरन्धारा–९ का भीमबहादुर घर्ती मगर, नुवाकोटका नकुर तामाङ, रसुवाको आमाछोदिङ– ५ का दावाछिरिङ तामाङ, रामेछाप मन्थलीका कुमारबहादुर बुढाथोकी, रसुवाका तेन्जिन तामाङ र सोहीका सञ्जीव वाइबा रहेका छन् । उनीहरूले शुक्रबार गुरुङको ५० लाख रुपैयाँ लुटेका थिए ।

को हुन् ५० लाख लुटिने गुरुङ ?

पुर्ख्याैली घर सिन्धुपाल्चोकको मेलम्चीका गुरुङ नेपाली सेनाको सुवेदारबाट अवकाशप्राप्त सैनिक हुन् । अवकाश हुँदासम्म कमाएको केही रकम र पुर्ख्याैली सम्पत्तिबाट जोगिएको रकमले उनले स्वयम्भु, भगवानपार्कमा घर बनाएका छन् ।

सेनाको जागिरबाट अवकाश पाएपछि भगवानपार्कमा घर बनाएका गुरुङले जग्गा कारोबारमा हात हाले । विभिन्न ठाउँमा सस्तोमा जग्गा किन्ने र नाफा आउने भएपछि बेच्ने गर्छन् ।

यसरी लुटियो ५० लाख

जग्गा कारोबारी गुरुङ र लुटेरा समूहबीच लामो समयदेखिको चिनजान थिएन । १५ दिनअघि मात्र बालाजुको एक चिया पसलमा उनीहरूको भेट भएको हो । सामान्य कुरा गर्दै जाँदा लुटेरा समूहका मुख्य नाइके भीमबहादुर घर्तीमगरले आफू पनि जग्गा कारोबोरी नै भएको बताए ।

मगरको कुरा सुनेका गुरुङ र उनीहरूबीच कुरा हुन थाल्यो । मगरले धापासीमा आफूसँग १९ आना जग्गा रहेको र किन्ने भए प्रतिआना १५ लाखको हिसाबले दिनेसमेत बताएका थिए । यत्ति भन्दा गुरुङलाई उनी जग्गा कारोबारी नै हुन् भन्ने लागेको थियो ।

यसरी कुरैकुरामा उनले आफ्ना बाजेसँग बहुमूल्य ढुंगासमेत रहेको बताए । फोटोेसमेत देखाए । गुुरुङले त्यो सजिल्लै पत्याए । हेर्ने सोच बनाए । तर, घर्तीमगरले किन्ने सोच र पैसा ‘शो’ गरे मात्र देखाउने सर्त राखे । उनले त्यो सर्त पनि माने ।

‘कता छ सामान गुरुङले भीमबहादुर लाई सोधे ?’

‘उनको उत्तर थियो– तारकेश्वर शान्तिधामनजिक छ ।’

‘कहिले हेर्ने ?’ भीमबहादुरले भने, ‘९ माघ शुक्रबार बिहान १० बजे ।’ एक दिनको भेटमै कुराको छिनोफानो गरेका गुरुङ र घर्तीमगरबीच फोनमा समेत थोरै मात्र कुराकानी भएको महानगरीय अपराध महाशाखाका प्रखुख एसएसपी सहकुल थापाको भनाइ छ ।

‘कसरी यत्ति चाँडै विश्वस गरे र ५० लाख लिएर उनी भेट्न गए ? हामी पनि अचम्ममा परेका छौं,’ एसएसपी थापाले भने ।पहिलो दिनमै कुराको छिनोफानो गरेका गुरुङ र उनका साथी अर्जुन सिलवाल शुक्रबार झोलाभरि ५० लाख लिएर तारकेश्वर–२, काभ्रेस्थलीको शान्तिधाम पुगे । त्यहाँ पुग्दा उनलाई बहुमूल्य ढुंगा देखाउने घर्तीमगरसँग अन्य पाँच जना पनि थिए । उनीहरू ६ जना तीनवटा २ सय २० सीसी क्षमता भएका बजाजको मोटरसाइकलमा त्यहाँ पुगेका थिए ।

पैसा ल्याएको थाहा पाएका उनीहरूले भेट्नासाथ गुरुङ र उनका साथी सिलवाललाई नियन्त्रणमा लिएका थिए । लुट्ने योजनासहित शान्तिधाम पुगेका उनीहरूले सुरूमा खुकुरी र रड देखाएको र पछि भाग्ने बेला आँखामा खुर्सानी हालेर पैसाको झोला लिएर भागेको प्रहरीको भनाइ छ ।

यसरी परे प्रहरीको फन्दामा

५० लाख लिएर लुटेरा फरार भएपछि गुरुङलाई दिउँसै सपनाजस्तो लागेको थियो । एकछिनअघि झोलाभरि पैसा बोकेर गएका उनीसहित उनका साथी सिलवालले लुटेरा समूहको पिटाइ पनि खाएका थिए ।

शान्तिधामबाटै गुरुङले बालाजु प्रहरीलाई आत्तिँदै फोन गरेर भने,‘सर, मेरो शान्तिधामबाट ५० लाख लुटियो ।’ बालाजु प्रहरीलाई आएको सूचना भेरिफाई गर्दै महानगरीय अपराध महाशाखाको टोली शान्तिधाम पुग्यो ।

घटनाको प्रकृति र पीडितलाई थप सोधपुछ गरे । घटनास्थलको मोबाइल लोकेसन हेरे । मोबाइल लोकेसन र हुलियाका आधारमा शुक्रबार नै सुरूमा रसुवाका तेन्जिङ र सञ्जीव बालाजुबाट पक्राउ परे । उनीहरू पक्राउ गर्न सफल भएको प्रहरीले अन्य ४ जनालाई भने ४८ घण्टाभित्र पक्राउ गरेको हो ।

लुटेको पैसाले मस्ती

प्रहरीका अनुसार शुक्रबार साँझ नै पक्राउ परेका रसुवाका तेन्जिङ र सञ्जीवबाहेक अन्य चार जनाले शुक्रबारको राति लुटेको पैसाले मस्ती गरेका छन् ।

लुुटेरा समूहका मुख्य योजनाकार भीमबहादुर घर्ती मगरले लुटेको रकममध्ये ३ लाख ३० हजारमा बजाजको २ सय २० सीसीको मोटरसाइकल किने । अनि सोही मोटरसाइकलमा आफ्नो केटी साथीलाई लिएर नगरकोट पुगेर मस्ती गरेको खुलेको प्रहरीको भनाइ छ ।त्यस्तै, दावा छिरिङले आफूले लिएको ऋण तिरे भने कुमार बुढाथोकी र नकुर तामाङले घरभाडा तिर्नेदेखि फाइनान्सको किस्ता तिर्ने काम गरेको र काठमाडौंको महँगो होटलमा बसेर मस्ती गरेको खुलेको छ ।

१८ लाख मात्र बरामद

प्रहरीले ५० लाख लुटेको मध्ये उनीहरूको साथबाट जम्मा १८ लाख ७५ हजार ५ सय रुपैयाँ मात्र नगद बरामद गरेको छ । नगदबाहेक नयाँ किनेको मोटरसाइकल र सुनको औंठी १ थान, डकैतीमा प्रयोग भएका अन्य तीनवटा मोटरसाइकल र मोबाइलहरू बरामद भएको प्रहरीले जनाएको छ ।पक्राउ परेका मध्ये सञ्जीव तामाङ यसअघि नक्कली सुनसहित पक्राउ परेर १ लाख धरौटीमा छुटेको अभियुक्त भएको खुलेको छ । उनीहरूमाथि थप अनुसन्धान भइरहेको अपराध महाशाखाको भनाइ छ ।