कैदी शम्भु भारतीलाई होटेल पुर्‍याउने असई निलम्बित

A+ A A-

डिल्लीबजार कारागारका कैदी शम्भु भारतीलाई उपचारको नाममा वीर अस्पताल लैजाने भन्दै ललितपुरकाे पुल्चोकस्थित होटेल हिमालय पुर्‍याएको घटनाको ललितपुर प्रहरीले छानबिन गर्ने भएको छ ।

ललितपुर प्रहरीले सो घटनाको छानबिन गर्न ललितपुर प्रहरी परिसर जाउलाखेलका प्रहरी उपरीक्षक (एसपी) दुर्गा सिंहको नेतृत्वमा तीन सदस्यीय छानबिन समिति बनाएको हो ।

छनबिन समितिका अन्य सदस्यमा प्रहरी नायव उपरीक्षक (डीएसपी) सन्तोष तामाङ र एकजना प्रहरी सहायक निरीक्षकसमेत रहेका छन् । डिल्लीबजार कारागारमा संयुक्त राष्ट्र संघअन्तर्गत सुडानको डार्फरमा तैनाथ नेपाल प्रहरीका लागि खरिद गरिएको बन्दोबस्तीका सामान (एपीसी) खरिद प्रकरणमा दोषी ठहर भएका भारतीलाई डिल्लीबजार कारागार प्रशासनले २० कात्तिकमा उपचारको लागि वीर अस्पताल लैजान अनुमति दिएको थियो ।

सो अनुमतिपछि कारागार प्रहरीले भारतीलाई लिन प्रहरी सहायक निरीक्षक (असई) प्रकाश ढाँटको नेतृत्वमा दुई जना प्रहरी खटाएको थियो । तर, भारतीलाई उपचारपछि डिल्लीबजार फर्काउनुको साटो पुल्चोकस्थित होटल हिमालयमा पुर्‍याएको खुलेको थियो ।

सो प्रकरणमा डिल्लीबजार प्रहरीले असई प्रकाश ढाँटलाई स्पष्टिकरण सोधिसकेको छ । स्पष्टीकरण चित्तबुझ्दो नभएको भन्दै उनलाई महानगरीय प्रहरी कार्यालय रानीपोखरीले उनलाई निलम्बन गरेको छ । घटनामा संलग्न अन्य प्रहरीमाथि अनुसन्धान भइरहेको रानीपोखरी प्रहरीका प्रमुख डीआईजी सैलेश थापाले जानकारी दिए ।

कारागार प्रशासनले भारतीलाई अस्पताल लैजान दिएको अनुमति पत्र, वीर अस्पतालको चेक गरेको कागजपत्र होटल हिमालयमा छाडेको भेटिएको थियो ।

सो पत्र पुल्चोक प्रहरी प्रभागहुँदै डिल्लीबजार कारागार पुग्दासमेत ललितपुर प्रहरी परिसरलाई जानकारी नै नदिइएको भन्दै ललितपुर प्रहरीले पुल्चोक प्रहरी प्रभागमाथि आन्तरिक छानबिन सुरु गरेको ललितपुर प्रहरीले जनाएको छ ।

‘हामीले होटल हिमालयमा भारती आएको नआएकोबारे अनुसन्धान सुरु गरेका छाैं, र यसमा पुल्चोक प्रहरीको भूमिकाका बारेमा समेत अनुसन्धान सुरु भएको छ । आज भोलिमा प्रतिवेदन तयार हुन्छ,’ छानबिन समितिका सदस्य डीएसपी तामाङले भने ।

होटेल हिमालयमा भारती गएको नगएकोबारे अनुसन्धान गर्न होटेलको सीसीटीभी पनि हेरिने डीएसपी तामाङको भनाइ छ । भारतीले प्रहरीसँगको मिलोमतोमा उपचार गराउने बहानामा होटल हिमालय पुगेको समाचार शिलापत्रले प्रकाशित गरको थियो ।