संविधान दिवस : घरघरमा दीपावली गर्न प्रदेश सरकारकाे आह्वान

A+ A A-

सुदूरपश्चिम प्रदेश सरकारले संविधान दिवसको अवसरमा घरघरमा दीपावली गर्न आह्वान गरेको छ । प्रदेश सरकारले संविधान दिवसको अवसर पारेर असोज २, ३ र ४ गते साँझ सबै सरकारी कार्यालय र आम नागरिकको घरमा सरसफाइसहित दीपावली गर्ने जनाएको छ ।

बुधबार मुख्यमन्त्री कार्यालयमा पत्रकार सम्मेलन गर्दै संविधान दिवसका अवसरमा आयोजना गरिने कार्यक्रमबारे जानकारी गराइएको हो ।

सरकारले २ असोजमा सबै मन्त्रालय, निकाय, सरकारी कार्यालयले आ–आफ्नो स्थानमा राष्ट्रिय झण्डा एवं व्यानर सजाएर नगरको शृंगार र सरसफाइ गर्ने, सबै कार्यालय र आम नागरिकको घर–घरमा सरसफाइ र दीपावली गर्ने तथा प्रदेशको सामाजिक विकास मन्त्रालयले खेलकुद कार्यक्रम आयोजना गर्ने भएको छ ।

३ असोज बिहान ७ बजे ट्राफिक चौराहबाट धनगढी रंगशालासम्म झाँकीसहित प्रभातफेरी गर्ने तथा ४ असोजमा सबै कार्यालय हाताभित्र र गोदावरीमा पनि वृक्षरोपण गरिने भएको छ ।

संविधान दिवसको अवसर पारेर असोज २, ३ र ४ गते साँझ सबै सरकारी कार्यालय र आम नागरिकको घरमा सरसफाइसहित दीपावली गरिने मुख्यमन्त्री कार्यालका निमित्त सचिव अर्जुनप्रसाद पोखरेलले बताए ।

उनका अनुसार कार्यक्रम सहजीकरणका लागि मुख्य मन्त्रीको अध्यक्षतामा ‘संविधान दिवस सुदूरपश्चिम प्रदेश मूल समारोह समिति’ गठन गरिएको छ भने चारवटा उपसमिति पनि गठन गरिएको छ ।

आन्तरिक मामिला तथा कानून मन्त्रालयका सचिवको अध्यक्षतामा मञ्च व्यवस्थापन उपसमिति, सामाजिक विकास मन्त्रालयका सचिवको अध्यक्षतामा प्रभातफेरी एवं झाँक्री व्यवस्थापन उपसमिति, मुख्यमन्त्री कार्यालययका सचिवको अध्यक्षतामा प्रचारप्रसार उपसमिति र उद्योग पर्यटन वन तथा वातावरण मन्त्रालयका सचिवको अध्यक्षतामा फलफूल तथा वृक्षारोपण उपसमिति गठन गरिएको छ ।

प्रकाशित मिति: बिहीबार, असोज २, २०७६ ०१:१८