प्रभु साह र रघुवीर महासेठलाई कडा कारबाही गर्न माग

A+ A A-

नेपाल कम्युनिस्ट पार्टी (नेकपा) प्रदेश २ को शपथग्रहण समारोह विधानविपरीत गराइएको भन्दै पदाधिकारीद्वारा पदच्यूत गर्न माग गरिएको छ । मंगलबार काठमाडौंस्थित नेकपा कार्यालयमा १६ केन्द्रीय सदस्यले पार्टीले माथिदेखि तलसम्म विधान, नियमावली, अन्तरपार्टी निर्देशन तथा परिपत्रहरू उल्लंघन गरेको भन्दै प्रदेश इन्चार्ज, अध्यक्ष र सचिवलाई पदच्यूत गर्न माग गरेका हुन् ।

विधि र अनुशासनमा यथाशीघ्र अगाडि बढाउन माग गर्दै नेकपा केन्द्रीय सचिवालयमा प्रदेश नम्बर २ का सह–इन्चार्ज तथा केन्द्रीय सदस्यहरू नागेन्द्र चौधरी र महेन्द्र पासवानसहित १६ जनाले पत्र दर्ता गराएका छन् ।

नेकपा केन्द्रीय समितिको परिपत्रलाई उल्लंघन गर्दै अध्यक्ष र महासचिवको निर्देशनविपरीत शपथग्रहण राखेर असहज परिस्थिति सृजना गरेको भन्दै नेकपा प्रदेश २ का इन्चार्ज सत्यनारायण मण्डल, सह–इन्चार्ज विश्वनाथ शाह, अध्यक्ष प्रभु साह र सचिव सुमन प्याकुरेललाई पदमुक्त गरी कडा कारबाही गर्न माग गरिएको हो ।

केन्द्रीय कार्यालयमा दर्ता गराइएको सो पत्रमा हस्ताक्षर गर्ने केन्द्रीय सदस्यमा रामचन्द्र झा, गोपाल ठाकुर, रामचन्द्र यादव, श्रीप्रसाद साह, सुधीरप्रसाद साह, रत्नेश्वर गोइत यादव, रामकुमार शर्मा, ममता गिरी, सरला यादव, दिनेश राई, जगतप्रसाद यादव, शत्रुधन महतो, बोधमाया यादव, रवीन्द्र बैठालगायतका रहेका छन् ।

नेकपाका केन्द्रीय सदस्यहरूले बुझाएको पत्रमा पार्टीको अन्तरिम विधानको धारा ३४ (ख) विपरीत रघुवीर महासेठलाई पार्टी स्थायी कमिटीबाट हटाउनुपर्ने, प्रदेश दुई कमिटीमा मनोनयन गरिएका नेताहरूको नाम हटाएर अन्य वरिष्ठ र सक्षम नेताहरू समावेश गर्नुपर्ने माग गरिएको छ । त्यस्तै, नेकपाको अन्तरिम विधानको धारा ३६ (ख) तथा विशेष परिपत्र ४ (क) विपरीत प्रदेश २ का सबै जिल्ला कमिटीहरूमा मनोनयन गरिएका तथा योग्यता नपुगेकाहरूको मनोनयन रद्द गरी वरिष्ठ र सक्षमहरूलाई मनोनयन गर्दै शपथग्रहण गराउनुपर्ने माग गरेका छन् ।

नेकपा प्रदेश २ का इन्चार्ज र अध्यक्षलगायतका पदाधिकारीले षड्यन्त्रपूर्वक पर्सा र बारामा गराइएको शपथग्रहण रद्द गरी जिल्ला कमिटीमा मनोनयन गरिएको त्रुटि सच्याएर शपथग्रहण गर्न सो पत्रमार्फत आग्रहसमेत गरिएको छ । उनीहरूले जिल्ला कमिटीमातहतका पार्टी कमिटीहरूमा समेत अवैधानिक र विधिविपरीत ढंगबाट कमिटी गठन गर्ने कार्यलाई तत्काल रोक्नसमेत माग गरेका छन् ।

प्रकाशित मिति: बुधबार, असोज १, २०७६ ०३:५२