ए डिभिजन लिग: फ्रेन्ड्सलाई हराउँदै जावलाखेल फेरि शीर्ष स्थानमा उक्लियो

A+ A A-

जावलाखेल युथ क्लब शहीद स्मारक ‘ए’ डिभिजन लिग फुटबलको शीर्ष स्थानमा उक्लिएको छ ।

बिहीबार ललितपुरको च्यासल मैदानमा भएको खेलमा फ्रेन्ड्स क्लबलाई ४–१ गोल अन्तरले पराजित गर्दै जावलाखेल फेरि शीर्ष स्थानमा उक्लिएको हो । खेलमा सुरुआती अग्रता जावलाखेल युथ क्लबले नै लिएको थियो ।

खेलको २०औँ मिनेटमा राहुल राहुलले गोल गर्दै जावलाखेललाई सुरुआती अग्रता दिलाएका थिए । अब्दुल अजिजले प्रहार गरेको कर्नरमा डिफेन्डर राहुलले हेडर गोल गरेका थिए । त्यसपछि खेलको २६औँ मिनेटमा एनकोटो मासोआबीले गोल गर्दै जावलाखेलको अग्रता दोब्बर पारेका थिए ।

मासोआबीले अब्दुल अजिजकै पासमा गोल गरेका थिए । पहिलो हाफमा २–० को अग्रता लिएको जावलाखेलले दोस्रो हाफमा थप दुई गोल गर्दा एक गोल भने खान पुग्यो । खेलको ६३औँ मिनेटमा जावलाखेलका लागि मासोआबी व्यक्तिगत दोस्रो तथा टोलीका लागि तेस्रो गोल गरेका थिए । पेनाल्टी क्षेत्रभित्र फ्रेन्ड्सका एन्जल महर्जनले ह्यान्ड गरेपछि जावलाखेलले पेनाल्टीको अवसर पाएको थियो । पेनाल्टीमा मासोआबी चुकेनन् ।

खेलको ८०औँ मिनेटमा फ्रेन्ड्सका लागि श्यामबाबु क्यापछाकीले गोल गर्दै अग्रता ३–१ मा झारेका थिए । तर, इन्जुरी समयमा फोडे फोफनाले गोल गरेपछि जावलाखेल युथ क्लब फ्रेन्ड्स क्लबमाथि ४–१ गोल अन्तरको जित निकाल्न सफल भयो । जितसँगै जावलाखेल फेरि लिगको शीर्ष स्थानमा उक्लिएको छ । शीर्ष स्थानमा उक्लिएको जावलाखेलको १७ खेलबाट ३० अंक भएको छ ।

१६ खेलबाट ३० अंक नै जोडेको चर्च ब्वाइज युनाइटेड क्लब हेड टु हेडका आधारमा दोस्रो स्थानमा झरेको छ । पहिलो लेगमा जावलाखेलले चर्च ब्वाइजलाई १–० गोल अन्तरले पराजित गरेको थियो । जावलाखेलसँग पराजित भएको फ्रेन्ड्स क्लब भने १७ खेलबाट १९ अंकका साथ लिगको ११औँ स्थानमा छ ।

प्रकाशित मिति: बिहीबार, वैशाख २८, २०८० १७:३२