तेह्रथुमको आठराईमा ओलीविरुद्ध प्रदर्शन

A+ A A-

नेकपा एमालेका अध्यक्ष केपी शर्मा ओलीविरुद्ध तेह्रथुमको आठराईमा विरोध प्रदर्शन भएको छ । शुक्रबार ओलीविरुद्ध आठराईमा विरोध प्रदर्शन भएको हो । विरोध प्रदर्शनलाई मध्यनजर गर्दै ठूलो संख्यामा सुरक्षाकर्मी परिचालन गरिएको छ ।

बिहीबार पाँचथरको फिदिम बसेर ओली आज तेह्रथुमस्थित आफ्नै जन्मथलो पुगेका हुन् । तेह्रथुममा उनले तेह्रथुम बहुप्राविधिक शिक्षालय भवनको उद्घाटन गरे ।

तेह्रथुम आउने क्रममा पहिचानवादीहरूले 'कोशी प्रदेश' नामकरण गरिएको विरोधमा ओलीविरुद्ध नाराबाजी गर्दै कालो झण्डा देखाएका हुन् । आफूविरुद्धको नाराबाजी सुन्दै तेह्रथुम पुगेका ओलीले विद्यालयको भवन उद्घाटन गर्न आफू आउँदा केही व्यक्तिहरू कराएको टिप्पणी गरे ।

'यहाँ यत्रो विद्यालय बनाएको छ । यसको उद्घाटन गर्न म आउँदै छु । जमिन उपलब्ध गराएको छ, मिलाएको छ । रकम उपलब्ध गराएको छ, मिलाएको छ । सीटीईभीटीलाई भनेको छ । यहाँ विद्यालय ल्याइदेउ भनेको छ,' ओलीले भने, 'अनि यहाँ विद्यालय बनाएर उद्घाटन गर्न आउँदा किन आएको ? विद्यालयको उद्घाटन किन चाहियो ? किन विद्यालय चाहियो ? कराउँदै थिए उ त्यहाँ मास्थिर पोखरीमा ।'

उनले मध्यपहाडी राजमार्ग आफ्नो पार्टीले परिकल्पना गरेको दाबी गरे । उनले पहाडमा मान्छे अडिनका लागि विकास गर्नुपर्छ भनेर आफूहरूले विकासको पहल गरेको दाबी गरे ।

ओलीले आजै तेह्रथुमको खानेपानी आयोजनाको शिलान्यास गर्ने कार्यक्रम छ । उक्त शिलान्यास गर्ने स्थल वरपर पहिचानवादीहरूले नाराबाजी गरिरहेका छन् । ओली आउँदा विरोध प्रदर्शन गरेकाहरूले उनी फर्कंदा पनि कालो झण्डा देखाउने तयारीका साथ नाराबाजी गरिरहेका हुन् ।

कोशी प्रदेश भ्रमणमा रहेका ओली आजै पाँचथर फर्कने कार्यक्रम छ । यसअघि ओली इलममा कार्यकर्ता प्रशिक्षणमा सहभागी भएका थिए । झापामा पनि ओलीविरुद्ध ढुंगामुढा भएको थियो ।

प्रकाशित मिति: शुक्रबार, वैशाख १५, २०८० १५:४६