'आठौँ धारा नेपालगञ्ज म्याराथन' आज, विजेतालाई डेढ लाख रुपैयाँ पुरस्कार

म्याराथनको पूर्वसन्ध्यामा शुक्रबार नेपालगञ्ज मन्थन गरिएको थियाे । सो मन्थनमा सहरको इतिहासबारे साहित्यकार सनत रेग्मी र लेखक तथा पत्रकार नरेन्द्रजंग पिटरले छलफल गरेका थिए ।

A+ A A-

नेपालगञ्ज म्याराथनको आठौँ संस्करण आज हुँदैछ । नेपालगञ्जको बीपीचोकबाट बिहान ७ बजे आठौँ धारा नेपालगञ्ज म्याराथन सुरु हुने आयोजक क्रियटिभ ह्याण्डसले जनाएको छ ।

एसोसिएसन अफ इन्टरनेसनल म्याराथन्स एन्ड डिस्टेन्स रेसेस (एम्स) ले मान्यता दिएको आधिकारिक रुटमा आयोजना गरिने म्याराथनमा भारतीय धावकसमेत सहभागी छन् । यो एम्सको वार्षिक क्यालेन्डरमा परेको नेपालको एक मात्र म्याराथन प्रतियोगिता हो ।

दशक लामो सशस्त्र द्वन्द्वको अन्त्य गर्ने ५ मंसिर २०६३ को विस्तृत शान्ति सम्झौताको स्मरणमा सन् २०१५ देखि म्याराथन गर्न थालिएकाे हाे । मध्यपश्चिम द्वन्द्वबाट सबैभन्दा धेरै प्रभावित भएकाे थियाे । द्वन्द्व अन्त्य भई मुलुक शान्तितर्फ प्रवेश गरेको दिनको स्मरणमा सुरु गरिएको म्याराथनलाई प्राविधिक रूपमा सबल बनाउँदै अन्तर्राष्ट्रिय स्तरको बनाइएको क्रियटिक ह्याण्डसका अध्यक्ष टीएस ठकुरीले बताए ।

म्याराथनका विजेताले १ लाख ५० हजार रुपैयाँ पुरस्कार पाउनेछन् । गत वर्ष १ लाख १० हजार पुरस्कार राशि रहे पनि यस वर्ष बढाइएकाे छ । नेपालगन्ज म्याराथनमा शीर्ष ८ धावकलहरू नगद पुरस्कारबाट पुरस्कृत हुनेछन् भने उपविजेताले ६० हजार, तेस्रो हुनेले ३० हजार र चौथो हुनेले १५ हजार रुपैयाँ पुरस्कार पाउनेछन् । पाँचौँदेखि आठौँस्थानसम्म आउने धावकलाई क्रमशः १०, ८, ७ र ६ हजार रुपैयाँ पुरस्कार प्रदान गरिने रेस डाइरेक्टर चन्द्रबहादुर गुरुङले जानकारी दिए ।

त्यस्तै, महिला हाफ म्याराथनमा पनि पुरस्कार बढाएर विजेताका लागि ६० हजार बनाइएको छ । यसअघि विजेताले ५५ हजार पाएका थिए । महिलातर्फको हाफ म्याराथनमा उपविजेताले ३० हजार, तेस्रोले १५ हजार र चौथो हुनेले १० हजार रुपैयाँ पुरस्कार जित्नेछन् । पाँचौँदेखि आठौँ स्थानसम्म आउनेले क्रमशः ८ हजार, ७ हजार, ६ हजार र ५ हजार रुपैयाँ पुरस्कार प्राप्त गर्नेछन् ।

पुरुष १० किमी खुलातर्फ विजेताले ३० हजार, उपविजेताले १५ हजार र तेस्रोले १० हजार रुपैयाँ पाउनेछन् भने महिलातर्फ ५ किमी खुलामा विजेतालाई २० हजार, उपविजेतालाई १० हजार र तेस्रो हुनेलाई ७ हजार रुपैयाँ पुरस्कार दिइनेछ । त्यस्तै, विद्यालय स्तरीय ५ किलोमिटर छात्र दौडमा प्रथमलाई १० हजार, दोस्रोलाई ७ हजार र तेस्रोलाई ५ हजार एवं ३ किमी छात्रातर्फ प्रथमलाई १० हजार, दोस्रोलाई ७ हजार र तेस्रोलाई ५ हजार रुपैयाँ पुरस्कार दिइनेछ ।

ह्विलचेयर रेसतर्फ शीर्ष तीन जनालाई क्रमशः १० हजार, ७ हजार र ५ हजार रुपैयाँ नगद पुरस्कार दिइनेछ भने प्रतियोगिताको कुल पुरस्कार राशि ५ लाख ८५ हजार रुपैयाँ छ । कर्पोरेट रनतर्फका विजेतालाई पोखरा अन्तर्राष्ट्रिय म्याराथनको रन फर फनमा सहभागी गराइनेछ । विजेतालाई हवाई टिकटसहित दुई दिनको आवास तथा भोजनको समेत व्यवस्था गरिएको छ ।

प्रकाशित मिति: शनिबार, मंसिर २४, २०७९ ०६:१३