उम्मेदवारी खारेज भएपछि सर्वाेच्चमा मुद्दा हाल्न काठमाडाैं आउँदै राजु गुरुङ

उम्मेदवारी खारेज भएपछि सर्वाेच्चमा मुद्दा हाल्न काठमाडाैं आउँदै राजु गुरुङ

A+ A A-

रुपन्देही निर्वाचन क्षेत्र नम्बर २ बाट नेकपा एकीकृत समाजवादीका उम्मेदवार राजु गुरुङले उम्मेदवारी खारेजी भएपछि अब कानुनी उपचार खोज्ने प्रतिक्रिया दिएका छन् । बैंकिङ कसुर गरेको नाममा निर्वाचन आयाेगले उनकाे उम्मेदवारी खारेज गरेकाे छ । आयाेगकाे याे निर्णयका विरुद्ध अब आफू सर्वाेच्च अदालतमा जाने उनले बताए ।

सर्वाेच्चमा निवेदन दिन आफू काठमाडाैं आइरहेकाे उनले जानकारी दिए । 'म अब सर्वाेच्च अदालत जाने हाे । काठमाडाैं आउन प्लेन चढिसकेँ', उनले भने । रुपन्देही २ मा एलालेले उपाध्यक्ष विष्णु पौडेललाई उठाएकोमा गठबन्धनका उम्मेदवार गुरुङको उम्मेदवारी खारेजीमा परेको छ ।

उम्मेदवारी खारेजमा परेका गुरुङविरुद्ध कालोसूचीमा नाम चढेको भन्दै उजुरी परेको थियो । तोकिएको अवधिमा गुरुङले कालोसूचीबाट हटेको प्रमाण पेस नगरेपछि निर्वाचन कार्यालयले उनको उम्मेदवारी खारेज गर्ने निणर्य गरेको बताएकाे छ । गुरुङले अन्तिम समयसम्म पैसा बुझाउनका लागि प्रयास गरे पनि ठूलो रकम भएकाले पैसा जुटाउन नसकेकाे बताइन्छ ।

गुरुङसहित एकीकृत समाजवादीका वरिष्ठ नेता झलनाथ खनालका छोरा निर्भिक चित्रकार खनालसहितका नाममा रहेको कम्पनीले वेस्ट प्रोजेक्ट कन्स्ट्रक्सन्स एन्ड सप्लार्यसका अध्यक्ष अञ्जित विष्टलाई दिएको चेक बाउन्स भएपछि उनीहरूविरुद्ध २०७६ साउन ६ गते मुद्दा दर्ता भएको थियो ।

काठमाडौं जिल्ला अदालतले नर्थ वेस्ट नेपाल इन्फ्रा प्रालिका अध्यक्ष गुरुङ र सञ्चालक खनाल, फुर्वा छिरिङ शेर्पा, सन्जिव राई र शक्तिमान डंगोलसमेतले दिएको चेक अनादर सम्बन्धी मुद्दामा २०७८ मंसिर १२ गते उनीहरूमाथि जरिवाना गर्ने फैसला गरेको थियो।

गुरुङ लगायतलाई जनही दुई हजार जरिवाना र २ करोड २५ लाख रुपैयाँको चेक काटिएको मितिदेखि २०७६ साउन ६ गते सम्मको सयकडा १० प्रतिशतका दरले कानुन बमोजिमको ब्याजसहित भुक्तानी दिनुपर्ने फैसला गरेको थियो ।

गुरुङको उक्त कम्पनीले २०७३ साल फागुन २० गते २५ लाख, फागुन ३० गते २५ लाख, चैत १५ गते २४ लाख, चैत ३० गते ५४ लाख, २०७४ वैशाख १५ गते २५ लाख, वैशाख ३० गते ३० लाख, जेठ १५ गते ३५ लाख रुपैयाँ गरी सातवटा चेक दिएकामा बैंकमा पर्याप्त रकम नभएको भन्दै फिर्ता भएपछि उनीहरूविरुद्ध उजुरी परेको थियो ।

चाईनिज कम्पनीहरूले निर्माण ठेक्का पाएका विभिन्न काममा पेटि ठेकेदारको रूपमा काम गर्ने प्रालिले निर्माणको लागि ल्याएका सामग्रीको पैसा चाईनिज कम्पनीले नदिएकोले पैसा दिन नपाएको उनीहरूले जिल्ला अदालत काठमाडौंमा बयान दिएका थिए ।

रुपन्देही २ मा सत्ता गठबन्धन यतिबेला उम्मेदवारविहीन अवस्थामा छ । यो समयमा गुरुङ उम्मेदवार नभएपछि कसलाई समर्थन गर्ने भन्ने बारेमा पनि आन्तरिक छलफल चलिरहेकाे छ । २०७४ सालमा एमाले नेता विष्णु पौडेलसँग प्रतिस्पर्धा गरेका कांग्रेस नेता युवराज गिरीले शीर्ष नेताहरूको अकर्मन्यताका कारण मैदान खाली भएकाे बताएका छन् । गिरीले आफूले उम्मेदवारी खारेज हुन सक्ने विषयमा पटक पटक भने पनि नेताहरूले बेवास्ता गरेकाे आराेप लगाए ।

प्रकाशित मिति: बुधबार, असोज २६, २०७९ ११:१६