नेपालको साफ च्याम्पियन लक्ष्य, आज भुटानसँग खेल्दै

A+ A A-

साफ महिला च्याम्पियनसिप फुटबल आज (मंगलबार)बाट दशरथ रंगशालामा सुरु हुँदैछ । च्याम्पियन बन्ने लक्ष्य बनाएको आयोजक नेपालले उद्घाटन खेलमा भुटानसँग प्रतिस्पर्धा गर्दैछ ।

समूह ‘बी’ मा रहेको नेपालले आफ्नो पहिलो खेलमा भुटानसँग खेल्न लागेको हो । खेल साँझ ५ः३० बजेदेखि सुरु हुनेछ । भुटानलाई पराजित गर्दै नेपाल सुखद सुरुवात गर्ने लक्ष्यमा छ । नेपाल उपाधिको प्रमुख दाबेदार टिम हो ।

गोलकिपर एन्जिला तुम्बापो सुब्बाको कप्तानीमा नेपालले साफ च्याम्पियनसिप खेल्दैछ । जसरी भए पनि यो पटक साफ च्याम्पियनसिपको उपाधि जितेरै छाड्ने दृढ संकल्पमा नेपाली महिला फुटबल टिम रहेको छ । प्रशिक्षक कुमार थापा नेपालले साफ च्याम्पियनसिपको उपाधि जित्नेमा विश्वस्त छन् ।

भन्छन्, ‘हामीले सात हप्तादेखि अभ्यास गरिरहेका छौँ । विगतको कमिकमजोरीलाई सुधार गर्दै च्याम्पियन बन्ने नै हाम्रो लक्ष्य हो ।’ यता, एन्जिला पनि आफ्नो कप्तानीमा नेपाललाई च्याम्पियन बनाएरै छाड्ने बताउँछिन् । ‘हरेक खेलाडीको कप्तान बन्ने सपना हुन्छ । त्यो मेरो पूरा भएको छ । हामी राम्रो खेल्दै उपाधि जित्न चाहन्छौँ’, उनले भनिन् ।

उपाधि जित्न भारत नै बाधक

सात राष्ट्रको सहभागिता रहेको प्रतियोगितामा अहिलेसम्म नेपाल चार पटक फाइनल पुगेर उपाधि जित्न असफल भएको छ । २०१० मा बंगलादेशमा पहिलो पटक आयोजना भएको साफ महिला च्याम्पियनसिपमा नेपाल फाइनलमा पुगेको थियो । त्यो फाइनल खेलमा नेपाल भारतसँग १–० गोलअन्तरले पराजित हुँदै उपविजेता बनेको थियो ।

२०१२ मा श्रीलंकामा भएको दोस्रो साफ महिला च्याम्पियनसिपको फाइनलमा भारतसँग ३–१ गोलले हार्दै दोस्रो पटक विजेता बन्ने नेपालको सपना तुहिएको थियो । पाकिस्तानमा भएको तेस्रो संस्करणमा भने फाइनलमा भारतसँग ६–० को हार ब्यहोरेको थियो ।

लगातार तेस्रो पटक फाइनलमा पुगेको नेपाल भारतमा २०१६ मा भएको चौथो संस्करणमा भने सेमिफाइनलबाटै बाहिरियो । २०१९ मा मोरङको विराटनगरमा आयोजना भएको पाँचौँ संस्करणमा नेपाल फाइनलमा पुग्यो । घरेलु मैदानमा पहिलो पटक साफ च्याम्पियनसिपको उपाधि जित्ने लक्ष्य बनाएको नेपाललाई फेरि तगारोको रूपमा भारत थियो । फाइनलमा ३–१ गोलले हारेसँगैँ उपाधि जित्ने नेपालको सपना फेरि टुटेको थियो ।

एक खेल जिते नेपाल सेमिफाइनल

घरेलु टिम दशरथ रंगशालामा उत्रिँदै गर्दा लक्ष्य हुनेछ स्पष्ट जित । सधैँ उपाधि नजिक पुगेर जित्न नसकेको नेपाल यो पटक भने जसरी भए पनि जित्न चाहन्छ । यतिबेला नेपाली खेलाडीको सपना नै साफ च्याम्पियन बन्ने हो । नेपाल रहेको समूह ‘बी’ मा भुटान र श्रीलंका रहेका छन् । यीमध्ये नेपालले कुनै एक टिमलाई जिते सेमिफाइनलमा स्थान बनाउने छ ।

समूह ‘ए’ मा भारतसँगै बंगलादेश, पाकिस्तान र माल्दिभ्स छन् । उद्घाटन खेलमा आज भुटानसँग खेल्ने नेपालले भदौ २७ गते श्रीलंकासँग प्रतिस्पर्धा गर्नेछ । भुटान र श्रीलंकाबीचको खेल भने २४ गते हुनेछ । यता, समूह ‘ए’ मा भने २२ गते भारत र पाकिस्तानले प्रतिस्पर्धा गर्नेछ ।

यही दिन दोस्रो खेलमा माल्दिभ्स र बंगलादेशले प्रतिस्पर्धा गर्नेछन् । भदौ २५ गते भारत र माल्दिभ्स तथा बंगलादेश र पाकिस्तान प्रतिस्पर्धा गर्नेछन् । २८ गते माल्दिभ्स पाकिस्तान बंगलादेश र भारतबीच प्रतिस्पर्धा हुनेछ । दुवै समूहबाट विजेता र उपविजेता गरी चार टिम सेमिफाइनलमा प्रवेश गर्नेछन् ।

दुवै सेमिफाइनल खेल भदौ ३१ गते हुनेछन् । फाइनल खेल असोज ३ गते हुनेछ । प्रतियोगिता सञ्चालन गर्न करिब ३ करोड ४७ लाख ६७ हजारभन्दा बढी रकम लाग्ने एन्फाले अनुमान गरेको छ । प्रतियोगितामा टिमहरूको र म्याच अफिसियलहरूको खानपिन र बसोबास खर्च साफले ब्यहोर्ने छ ।

खेल मैदानको तयारी, स्थानीय यातायात र अन्य स्थानीय खर्च एन्फाले ब्यहोर्ने छ । प्रतियोगिताका लागि भनेर साफले २ करोड ५० लाख एन्फालाई दिएको वरिष्ठ उपाध्यक्ष तथा मूल आयोजक समितिका संयोजक वीरबहादुर खड्काले जानकारी दिए । खेल हेर्न आउने दर्शकको लागि एन्फाले टिकट दर तोकिसकेको छ । भीआईपीतर्फ पाँच सय र साधारण प्याराफिटतर्फ तीन सय रुपैयाँ छ ।

राष्ट्रिय महिला फुटबल टिम

गोलकिपरः एञ्जिला तुम्बापो सुब्बा, अञ्जना राना मगर, उषा नाथ डिफेन्डरः गीता राना, पुनम जर्घामगर, निशा थोकर, हिराकुमारी भुजेल, अमृता जैसी, विमला विके, समिक्षा घिमिरे मिडफिल्डरः विमला चौधरी, मञ्जली कुमारी योञ्जन, इन्दिरा राई, अनिता बस्नेत, अनिता केसी, प्रीति राई, सरु लिम्बू, दीपा राई, दीपा शाही फरवार्डः सावित्रा भण्डारी, रश्मी कुमारी घिसिङ, रेखा पौडेल, अमिशा कार्की

प्रकाशित मिति: मंगलबार, भदौ २१, २०७९ ०७:०६