कक्षा १२ को नतिजा प्रकाशित

A+ A A-

कक्षा १२ को नतिजा प्रकाशित भएको छ । राष्ट्रिय परीक्षा बोर्डले शुक्रबार परीक्षाफल प्रकाशित गरेको हो । गत १६ जेठदिख २५ जेठसम्म परीक्षा सञ्चालन भएको थियो ।

नतिजा प्रकाशन गर्नुपूर्व राष्ट्रिय परीक्षा बोर्डको बैठक बसेको थियो । बोर्डले ग्रेडिङ पद्दतिअनुसार नतिजा प्रकाशन गरेको हो ।

बोर्डका अध्यक्ष डा. महाश्रम शर्माका अनुसार यस वर्ष परीक्षा उत्तीर्ण हुनका लागि प्रयोगात्मक परीक्षामा ४० र सैद्धान्तिक परीक्षामा ३५ प्रतिशत ल्याउनै पर्ने व्यवस्था गरिएको छ । त्योभन्दा कम अङ्क ल्याएको खण्डमा पुनःपरीक्षा दिनुपर्ने बोर्डले जनाएको छ ।

नियमिततर्फ ३ लाख ६३ हजार आठ, ग्रेड वृद्धितर्फ ३० हजार ४५ र आंशिकतर्फ ३ हजार १३२ गरी कुल तीन लाख ९६ हजार १८५ विद्यार्थीले परीक्षामा सहभागिता जनाएका थिए ।

तीमध्ये नतिजामा ४ हजार १७९ जनाले ३.६१ देखि ४ जीपिए, ३० हजार १०७ जनाले ३.२१ देखि ३.६० जीपीए, ६५ हजार २८४ जनाले २.८१ देखि ३.२० जीपीए, ६४ हजार ९३ जनाले २.४१ देखि २.८० जीपीए, १० हजार ९०० जनाले २.०१ देखि २.४० जीपीए र ३५ जनाले १.६१ देखि २ जीपीए ल्याएका छन् ।

'यस वर्ष १ लाख ८८ हजार विद्यार्थी नन ग्रेडिङमा परेका छन् । त्यसमध्येमा १ लाख ३० हजार ८७८ जनाले मात्रै ग्रेड वृद्धि परीक्षामा सहभागी हुन पाउँछन्,' शर्माले भने ।

दुई विषयमा निर्धारित प्रतिशतभन्दा कम ल्याउने विद्यार्थी पुनःग्रेड वृद्धि परीक्षा सहभागि हुन पाउँछन् । बोर्डले देशभरका १ हजार २९२ परीक्षा केन्द्रमा परीक्षा केन्द्रमा परीक्षा सञ्चालन गरेको थियो ।

बोर्डले यस वर्षको नतिजामा ग्रेड वृद्धि परीक्षामा सहभागी हुन पाउने १ लाख ३० हजार ८७८ परीक्षार्थीका लागि आउँदो असोज ३० र ३१ गते परीक्षा सञ्चालन गर्ने गरी आजै परीक्षा तालिकासमेत सार्वजनिक गरेको अध्यक्ष शर्माले जानकारी दिए ।

बोर्डका अनुसार नतिजा राष्ट्रिय परीक्षा बोर्डको वेबसाइट www.neb.gov.np, नेपाल टेलिकमको वेबसाइट www.neb.ntc.net.np मा गएर हेर्न सकिन्छ । त्यसैगरी एसएमएसबाट पनि नतिजा हेर्न सकिने छ । त्यसका लागि neb लेखेर एक स्पेस दिई आफ्नो सिम्बोल नम्बर टाइप गरी १६०० नम्बरमा र नेपाल टेलिकमको १६०१ मा एसएमएस पठाएर पनि हेर्न सकिने छ ।

प्रकाशित मिति: शुक्रबार, भदौ १७, २०७९ १७:४३