माधव नेपालको आरोप- केपी ओली पूर्वराजा ज्ञानेन्द्रलाई भेट्न सुटुक्क जान्छन्

माधव नेपालको आरोप- केपी ओली पूर्वराजा ज्ञानेन्द्रलाई भेट्न सुटुक्क जान्छन्

A+ A A-

एकीकृत समाजवादीका अध्यक्ष माधवकुमार नेपालले नेकपा एमालेका अध्यक्ष केपी शर्मा ओली पूर्वराजा ज्ञानेन्द्र शाहको निवासमा सुटुक्क जाने गरेको आरोप लगाएका छन् ।

आगामी स्थानीय तहको चुनावमा साँठगाँठ गर्न लागि ओली सुटुक्क पूर्वराजा शाहको निवासमा जाने गरेको नेपालले बताए । अखिल नेपाल महिला संघ (समाजवादी) ले शुक्रबार काठमाडौंमा आयोजना गरेको कार्यक्रममा उनले ओली दक्षिणपन्थी भएकाले दक्षिणपन्थी शक्ति राप्रपासँग पनि चुनावमा मिलेर जाने प्रयास गरिरहेको दाबी गरे ।

'यो गठबन्धनलाई तोड्नका लागि केपी ओली लागि परेका छन् । तर उनी पनि गठबन्धन गर्दैछन्, कोसँग थाहा छ ? सुटुक्क ज्ञानेन्द्रको निवासमा पुग्ने गरेका छन् । राप्रपासँग साँठगाँठ गर्न खोजिरहेका छन्,' नेपालले भने, 'विदेशीहरूसँग दलाली गर्ने पार्टीहरूसँग तालमेल गर्न खोजिरहेका छन् । किनभने उनीहरू दक्षिणपन्थी शक्ति हुन् । दक्षिणपन्थी शक्तिहरू उनीहरूसँग मिल्छन् ।'

आफूहरू वामपन्थी, लोकतान्त्रिक शक्ति भएकाले कांग्रेसलगायतका शक्तिहरूसँग चुनावी तालमेल गरेर अघि बढ्ने उनको भनाइ थियो ।

सत्तारुढ गठबन्धनसँग मिलेर चुनावमा जाने अडान लिएको भन्दै प्रधानमन्त्री शेरबहादुर देउवा र पत्नी आरजु देउवाप्रति उनले आभार व्यक्त गरे । 'आरजुजीले भन्नुभएछ– म कैलालीबाट उठछु । त्यसका लागि गठबन्धन चाहिन्छ । गठबन्धनको पक्षमा छु भनेर उहाँले पनि भन्नुभयो । धन्यवाद छ उहाँलाई पनि,' उनले भने ।

त्यसका लागि कांग्रेसको संस्थागत निर्णयको पर्खाईमा आफूहरू रहेको नेपालको भनाइ थियो । ‘शेरबहादुरजीले पटकपटक भन्नुभएको छ– यो गठबन्धनसँगसँगै हामी चुनावमा जानेछौँ । अब पार्टीले नै के निर्णय गर्छ, हामी पर्खेर बसिरहेका छौँ,' उनले भने ।

अन्य वामपन्थी राजनीतिक शक्तिहरूले पनि आफ्नो पार्टीसँग चुनावी तालमेलका लागि प्रस्ताव गरिरहेको उनले जानकारी दिए ।

प्रकाशित मिति: शुक्रबार, चैत ११, २०७८ १४:३९